اقرا هاري بوتر بالمصري- قطر هوجورتس السريع

اسمع هاري بوتر بالمصري  

باب كابينة القطر اللي قاعد فيها هاري اتفتح، ودخل أصغر ولد من الأولاد اللي شعرهم أحمر وسأل وهو بيشاور على الكرسي الفاضي اللي قدام هاري ( في حد قاعد هنا؟ أصل باقي الكباين مليانة على الآخر)

هاري هز راسه، فقعد الولد، وبص لهاري لحظة وبعدين بص بسرعة من الشباك، وكأنه ماكانش بيبص على هاري، كان لسة فيه حاجة سودة على مناخيره.

اخواته التوأم رجعوا تاني للكابينة وقالوا ( رون، احنا هنطلع قدام، في نص القطر ، لي جوردان معاه تارانتولا عملاقة ، هنروح نتفرج عليها)

قال رون بصوت واطي ( ماشي )

بعدين التوأم بصوا لهاري وقالوا له ( هاري ، احنا ماعرفناش نفسنا، احنا فريد وجورج ويزلي، وده رون، أخونا، ياللا، نشوفك بعدين)

رون وهاري قالوا ( باي ) والتوأم خرجوا وقفلوا باب الكابينة وراهم

قل رون بسرعة ومن غير تفكير ( هو انت فعلا هاري بوتر؟) هاري هز راسه، فقال رون ( بجد، أنا كنت فاكره مقلب من مقالب فريد وجورج. انت فعلا عندك.... عارف .... الل...) وشاور رون على قورة هاري.

هاري رفع الشعر عن قورته عشان تظهر علامة البرق، رون كان بيبص للعلامة ومش قادر يرفع عينيه من عليها، وقال ( هو ده المكان اللي انت عارف ميييين.....)

قال هاري ( اه ، بس انا مش فاكر أي حاجة من اللي حصل ليلتها)

قال رون بلهفة ( مش فاكر أي حاجة خالص؟)

( يعني، مش فاكر غير نور أخضر قوي ، هو ده اللي أنا فاكره بس)

( وااااو) قالها رون وفضل يبص لهاري وندبته وبعد شوية، أخد باله انه لسة مركز في وش هاري، فبص من الشباك بسرعة.

هاري كان شايف رون شخص مثير للإعجاب والاهتمام، زي ما رون كان شايفه بالظبط فسأله ( هي عيلتك كلها سحرة؟)

قال رون ( آه ، عيلتنا كلها سحرة، تقريبا كده ماما عندها قريب من بعيد بيشغل محاسب، بس احنا مابنتكلمش عنه أبدا)

( على كده انت فعلا تعرف كتير من السحر) هاري كان بيفكر ان أكيد عيلة ويزلي دول من العائلات السحرية القديمة اللي كان الولد الشاحب في حارة دياجون بيتكلم عنهم.

رون قال ( انا سمعت انك كنت عايش مع العامة، هما العامة دول عاملين ازاي؟)

( فظاع، هما مش كلهم طبعا، بس خالتي وجوزها وابنها فظاع، يا ريت كان عندي 3 اخوات سحرة)

رد رون اللي كان شكله متضايق وهو بيتكلم ( خمسة، انا  السادس في اخواتي اللي يروح هوجورتس، تقدر تقول ان الكل مستنيين مني حاجات كتير، بيل وتشارلي اتخرجوا من هوجورتس خلاص، بيل كان رئيس الطلبة، وتشارلي كان كابتن فريق الكويديتش، دلوقتي بيرسي رائد الفصل وفريد وجورج بيعملوا مشاكل كتير بس درجاتهم كويسة جدا، والكل بيحبوهم وبيقولا دمهم خفيف، الكل مستنيين مني أكون شاطر وكويس زي اخواتي، بس مهما هعمل، وايه يعني ماعملتش حاجة جديدة ، ما كلهم عملوا كل حاجة  قبل مني. ده غير ان لما يكون عندك 5 اخوات، عمرك ما هيجيلك حاجة جديدة أبدا، أنا أخدت روب بيل القديم، وعصاية تشارلي القديمة، وفار بيرسي القديم، ودخل ايده في جيبه وطلع فار رمادي تخين ونايم، وقال ( اسمه سكابرز، فار عديم الفايدة، مابيصحاش من النوم غير كل فين وفين، بيرسي جاله بومة هدية من بابا عشان بقى رائد الفصل، بس ماقدروش، قصدي انا خدت سكابرز بدل بيرسي)

رون ودانه بقت وردي، تقريبا كان شايف انه اتكلم أكتر من اللازم، لأنه سكت وبص من الشباك تاني.

هاري كان شايف ان مافيش أي مشكلة ان الواحد ما يبقاش معاه فلوس يشتري بومة، هو نفسه عمره ما كان عنده فلوس لحد شهر فات، فبدأ يحكي لرون عن كل الحاجات دي، وازاي دايما كان بيضطر يلبس هدوم دادلي القديمة، وانه ماجالوش ولا هدية عيد ميلاد كويسة ، كلامه خفف عن رون كتير.
( ولحد ما هاجريد قالي، ماكنتش أعرف حاجة خالص عن اني ساحر، او عني أهلي ، أو عن فولدمورت)

رون شهق، فقال هاري (في ايه؟)

رد رون وهو مصدوم وفي نفس الوقت معجب بشجاعة هاري ( انت قلت اسم ( انت عارف مين) انا كنت فاكر انك انت بالذات....)

قال هاري ( انا مابحاولش أكون شجاع ولا حاجة، أنا بس ماكنتش أعرف ان المفروض مانقولش اسمه، فاهمني؟ انا قدامي حاجات كتير جدا لازم اتعلمها، اراهنك اني هكون أسوء واحد في الفصل) أخيرا قال هاري الحاجة اللي كانت قلقاه جدا طول الفترة اللي فاتت

( ما تخافش، مش هتبقى أسوء واحد في الفصل ولا حاجة، في طلبة كتير بيجوا من عائلات عامية وبيتعلموا بسرعة)

الكلام أخدهم، وفي الوقت ده كان القطر خرج بيهم من لندن، وبدأ يمشي في وسط الغيطان المليانة بالبقر والغنم، فضلوا سكتين شوية، بيتفرجوا من الشباك على الغيطان والطرق الضيقة اللي بيعدي عليها القطر.

على الساعة 12 ونص، كان في صوت كركبة جاية من الممر، بعدين فتحت باب الكابينة ست مبتسمة عندها غمازات، وقالت ( مش عايزين أي حاجة من عربية الأكل يا حبايبي؟)

هاري اللي ماكانش فطر ولا أكل أي حاجة لحد دلوقتي، قام وقف بسرعة، لكن رون اللي ودانه احمرت تاني، قال بصوت واطي ومش واضح انه جايب معاه ساندويتشات.

خرج هاري للممر، لما كان عايش مع عيلة درسلي، عمر ماكان معاه فلوس للحلويات، ودلوقتي ، وجيوبه مليانه فضة ودهب هيشتري شكولاتة مارس على أد ما يقدر يشيل، بس الست  اللي بتبيع حلويات، ماعندهاش شكولاتة مارس، بس كان عندها بنبوني بيتي بوتس بكل النكهات، ولبان دروبل، أفضل بالونة لبان، وضفادع الشيكولاتة، وفطاير والقرع العسلي، وكيكة المرجل، وعصيان العرق سوس السحرية، وحاجات تانية كتير، أول مرة هاري يشوفها في حياته. هاري كان عايز يجرب كل الحلويات اللي في العربية، وفعلا اشترى منها كلها، ودفع للست 11 سيكل فضي و7 كنوت برونزي.

رون كان بيبحلق في هاري وهو راجع الكابينة شايل كل الحلويات دي، اللي حطها على كرسي فاضي، فقال رون ( انت جعان أوي للدرجة دي؟)

قال هاري وهو بيقطم قطمة كبيرة من فطيرة القرع العسلي ( هموت من الجوع )

طلع رون لفة مكعبرة وفتحها، كان فيها 4 ساندويتشات، أخد منها واحد وقال ( دايما بتنسى اني مابحبش ساندويتشات اللحمة المشوية)

مسك هاري فطيرة وقال ( تبدل معايا؟... ياللا)

( مش هيعجبك، ناشف، أصلها ماعندهاش وقت) وقال رون بسرعة ( انت عارف طبعا، مع خمس ولاد صعب تلاقي وقت كفاية)

 ( ياللا ، خد فطيرة ) قال هاري اللي عمره ما كان عنده أي حاجة يشاركها مع حد، ولا أي حد يشارك معاه حاجة. كان شعور لطيف وهو قاعد مع رون بياكلوا كل الفطاير والكيك والحلويات اللي اشتراها ( طبعا السندويتشات اتنست خالص)

مسك هاري علبة ضفادع الشكولاتة وسأل رون ( هو ده ايه، دي مش ضفادع حقيقية، صح؟) كان بدأ يحس ان بعد اللي شافه، مافيش حاجة ممكن تفاجئه

قال رون ( لا مش ضفادع حقيقية، بس شوف الكارت اللي فيها بتاع مين، أنا ناقصني كارت اجريبا)

( مين)

( اه، طبعا، انت مش عارف ، ضفادع الشيكولاتة بيكون جواها كروت بنجمعها، عليها صور السحرة  والساحرات المشهورين، أنا عندي يجي 500، ناقصني بس أجريبا و بتوليمي)

فتح هاري علبة ضفادع الشيكولاتة وطلع الكارت، كان مرسوم عليه وش راجل ، لابس نضارة على شكل هلال وعنده مناخير طويلة متنية، وشعر فضي طويل وشنب ودقن ، وتحت الصورة مكتوب اسم ألباس دامبلدور

قال هاري ( هو ده بقى دامبلدور!)

قال رون ( ماتقولش انك عمرك ماسمعت عن دامبلدور) ممكن تديني ضفدع ؟ يمكن ألاقي أجريبا المرة دي ، شكرا

قلب هاري الكارت بتاعه وقرا اللي مكتوب عليه ( الباس دامبلدور، مدير مدرسة هوجورتس الحالي، يعتبره الكثيرين أعظم ساحر في العصر الحديث، وهو مشهور بالذات لهزيمته ساحر الظلام جريندلوالد  عام 1945، ولاكتشافه الاستخدامات الاثنى عشر لدم التنين، وعمله في الكيمياء مع شريكه نيكولاس فلاميل. يستمتع بروفيسور دامبلدور بسماع الموسيقى الكلاسيكية محدودة الآلات ولعب البولينج).

لما قلب هاري الكارت تاني على وشه اتفاجىء لما لقى ان صورة دامبلدور اختفت من على الكارت وقال لرون ( ده اختفى)

قال رون ( أكيد ، مش معقول هيفضل في الكارت طول اليوم ، بس هيرجع تاني، لااا الكارت بتاعي عليه مرجانة ، انا عندي يجي ستة منها، تاخدها؟ انت ممكن تبدأ تجمع الكروت من دلوقتي)

رون كان بيبص لكوم ضفادع الشيكولاتة المحطوطة على الكرسي ومستنية حد يفتحها فقال هاري ( خد راحتك، انت عارف ، في عالم العامة، الناس بتفضل موجودة في صورها على طول)

قال رون بدهشة ( معقولة، بيفضلوا ثابتين طول الوقت؟ مابيتحركوش خالص، شيء غريب)

هاري بص للكارت تاني، وشاف دامبلدور بيرجع جواه وبيبتسم له، رون كان مشغول بأكل الشيكولاتة ومش مهتم يشوف صور السحرة والساحرات اللي على الكروت، بس هاري ماكانش قادر يبعد عنيه عنهم، وبعد شوية بقى معاه سحرة كتير غير دامبلدور ومورجانة، زي هينجست اوف وودكرافت والبريك جرانيون، وسيرس، وبارسيليوس، وميرلين، واخيرا بطل يبص على صورة دروديس كليودنا اللي كانت بتهرش مناخيرها، وبدأ يفتح علبة من بنبونب بيرتي بوتس بكل النكهات

رون حذر هاري ( خلي بالك من البنبوني ده، لما بيقولوا انه بكل النكهات ، فهما بيقصدوا انه فعلا بكل النكهات، انت صحيح هتلاقي كل النكهات العادية زي الشيكولاتة والنعناع والمربى، بس ممكن تلاقي كمان بنبوني بطعم السبانخ او الكبدة او حتى الكرشة. جورج بيقول انه في مرة لقى واحدة بطعم المخاط) رون مسك واحدة خضرا وبص له كويس وبعدين قطم حتة صغنونة من طرفها ( يعععع، شفت، اهي دي بطعم الفول النابت)

قضوا وقت ممتع جدا وهما بيجربوا البنبوني اللي بكل النكهات، هاري داق بنبوني بطعم التوست وجوز الهند والفاصوليا البيضا والفراولة والكاري والقهوة والنجيلة والسردين، ده حتى كان عنده الشجاعة انه يدوق واحدة لونها رمادي غريب، رون مارضاش يلمسها خالص، وطلعت بطعم الفلفل.

القطر طلع من الريف والغيطان ، وبيمر دلوقتي على غابات وأنهار ملتوية وتلال لونها أخضر غامق.

باب الكابينة خبط ودخل الولد ابو وش مدور اللي شافه هاري على رصيف 9 ¾ ، كان شكله معيط وهو بيقول ( اسف، بس ماحدش فيكم شاف ضفدع؟)

ولما هزوا راسهم انهم ماشافوش الضفدع بدأ يندب ( ضفدعي ضاااع، كل شوية بيهرب مني) فقال هاري (هتلاقيه) ورد الولد بحزن (اه، اكيد، بس لو شفته) وبعدين سابهم ومشي

قال رون ( انا مش عارف هو زعلان اوي كده ليه، انا لوكنت مكانه كنت هضيع الضفدع ده بأسرع ما يمكن، ولو اني يعني ماليش حق اتكلم بعد ماجبت سكابرز) الفار كان لسة نايم وبيشخر في حجر رون اللي كمل كلامه وهو قرفان ( الفار ده ممكن يموت من غير ماناخد بالنا أصلا، انا حاولت امبارح اني أغير لونه واخليه أصفر عشان يكون شكله أحسن شوية بس التعويذة مانفعتش ، استنى هوريك)

دعبس رون شوية في صندوقه، وبعدين طلع عصاية شكلها قديم ومبهدل خالص، كان خشبها متكسر منه حتت صغيرة وفي حاجة بيضا باينة من طرفها فقال رون ( شعر اليونيكورن طلع من قلب العصاية خلاص، عموما)  كان يادوب بيرفع ايده بالعصاية، لما باب الكابينة اتفتح تاني، الولد صاحب الضفدع رجع بس المرة دي معاه بنت. البنت اللي كانت لابسة روب هوجورتس قالت ( ماحدش شاف ضفدع؟ ضفدع نيفيل ضايع.)

البنت كان شعرها بني منفوش وسنانها اللي قدام كبيرة وبتتكلم زي ماتكون مدرسة بتكلم الطلبة اللي عندها في الفصل.

 قال رون ( احنا قلناله اننا ماشفناش الضفدع)

بس البنت ماكانتش سمعاه ، كانت مركزة مع العصاية السحرية اللي في ايده( ايه ده ، انت هتعمل تعويذة سحرية، ياللا ورينا ) وقعدت على الكرسي اللي قدامه

 رون اتخض من الامتحان المفاجيء ( اممم ماشي )

 اتنحنح وحرك عصايته وقال ( يا شمس يامنورة، يا زهرة الربيع، يا زبدة يا طرية، خلوا لون الفار المكلبظ الغبي ده يصفر)  لكن مافيش حاجة حصلت، سكابرز فضل لونه رمادي، ده حتى فضل نايم ماصحيش

 قالت البنت( انت متأكد ان دي تعويذة حقيقية؟ شكلها كده تعويذة اي كلام، صح؟ انا اتدربت على شوية تعاويذ بسيطة وعرفت اعملهم كلهم صح، مافيش ولا ساحر في عيلتي، كانت مفاجأة كبيرة لما جالي جواب هوجورتس، بس انا كنت فرحانة اوي طبعا، هوجورتس على ماسمعت  احسن مدرسة لتعليم السحر، انا حفظت الكتب كلها صم، بس ياريت ده يكون كفاية.

 على فكرة انا اسمي هرميوني جرانجر انت اسمك ايه؟ قالت الكلام ده كله بسرعة جدا. هاري بص لرون، وحس براحة لما فهم من وشه المصدوم انه كمان زيه ماحفظش الكتب صم

قال رون بصوت مش واضح ( انا رون ويزلي)

وقال هاري ( وأنا هاري بوتر )

قالت هرميوني ( بجد، انت فعلا هاري بوتر، أنا عارفة كل حاجة عنك، أصلي اشتريت شوية كتب خارجية، عشان أعرف شوية حاجات عن العالم السحري وتاريخه، انت موجود في كتاب تاريخ السحر الحديث، وكتاب نهضة وسقوط فنون السحر الأسود، وكتاب أعظم الأحداث السحرية في القرن العشرين)

قال هاري بذهول ( أنا موجود في كل الكتب دي؟)

قالت هرميوني ( يا ربي ، انت ماتعرفش؟ أنا لو مكانك كنت هدور على كل كلمة اتكتبت عني، وكل كتاب اتقال فيه اسمي. حد فيكم عارف هيكون في أي منزل؟ انا سألت كتير، يا ريت أكون في جريفندور، لحد دلوقتي شكله أحسن منزل، انا سمعت ان دامبلدور نفسه كان في جريفندور، ولو ان رافنكلو مش هيبقى وحش أوي، عموما، الأحسن نرجع ندور على ضفدع نيفيل، وانتم غيروا هدومكم، اعتقد قربنا نوصل) وسابتهم ومشيت ومعاها الولد اللي ضفدعه ضايع.

( مش مهم هكون في أي منزل، المهم ماتكونش البنت دي معايا ) قالها رون وهو بيرمي عصايته في صندوقه ( تعويذة غبية، جورج  اللي قالهالي، أراهن انه كان عارف انها تعويذة فاشلة)

سأله هاري ( هما اخواتك في أي منزل؟)

قال رون اللي رجع كئيب تاني (ماما وبابا كمان كانوا في جريفندور، مش عارف هيقولوا ايه لو صنفوني في منزل تاني، أعتقد رافنكلو مش هيكون وحش، بس تخيل كده لو صنفوني في سليذرين)

( ده المنزل اللي كان فيه فولد.... قصدي انت عارف مين؟)

قال رون ( آه) ورجع قعد في على الكرسي وهو محبط وحزين

قال هاري وهو بيحاول يبعد تفكير رون عن المنازل ( بس انت عارف، أعتقد طرف شنب سكابرز لونه أفتح شوية، هو اخواتك اللي خلصوا دراسة بيعملوا ايه دلوقتي؟) هاري كان بيفكر ، يا ترى السحرة بعد ما بيتخرجوا من المدرسة بيشتغلوا ايه؟

قال رون ( تشارلي في رومانيا بيدرس التنانين، وبيل في أفريقيا بيعمل شغل لجرينجوتس، عرفت اللي حصل في جرينجوتس؟ الخبر اتنشر في المتنبيء اليومي، بس أكيد انت مابتوصلكش المتنبيء اليومي عند العامة، تصدق في حد حاول يسرق خزنة من الخزاين مشددة الحراسة)

( معقولة؟ وحصلهم ايه؟)

( ولا حاجة، ماتمسكوش أصلا، ماهو عشان كده الخبر مكسر الدنيا، بابا بيقول انه أكيد ساحر ظلام قوي جدا، عشان يقدر يتغلب على حراسة جرينجوتس، الغريبة ان مافيش حاجة اتسرقت من البنك، طبعا لما حاجة زي دي بتحصل، كل السحرة بتخاف ان يكون انت عارف مين هو اللي وراها)

فكر هاري في الخبر اللي سمعه، وفضل يقلبه شوية في دماغه، كان بدأ يحس بخوف كل ما حد يقول (انت عارف مين)، تقريبا ده جزء من دخول العالم السحري والاندماج فيه، كان مرتاح أكتر لما كان بيقول فولدمورت على طول من غير قلق ولا خوف.

سأله رون ( بتشجع أي فريق من فرق الكويديتش؟)

قال هاري ( انا ما اعرفش ولا فريق)

قال رون بصدمة ( ايه؟ دي أحسن لعبة في العالم) وبدأ رون يشرح لهاري كل حاجة عن الكويديتش، شرح له الأربع كور، ومواقع السبع لاعبين، وحكاله عن أشهر المباريات اللي حضرها مع اخواته، وعن المكنسة اللي هيشتريها لما يكون معاه فلوس، وكان بيقول له عن أجمل حاجة في اللعبة، لما باب الكابينة اتفتح تاني، بس المرة دي ما كانش نيفيل اللي ضفدعه ضايع ولا هرميوني جرانجر، كانوا 3 ولاد عرف منهم هاري على طول الولد اللي واقف في النص، كان الولد الشاحب اللي قابله في محل مدام مالكن للأرواب، وكان بيبص لهاري باهتمام أكبر من اللي عامله بيه في المحل في حارة دياجون .

قال الولد ( هو الموضوع بجد ولا ايه، كل اللي في القطر بيقولوا ان هاري بوتر في الكابينة دي، انت بقى هاري بوتر؟)

قال هاري  ( اه ) كان بيبص على الولدين التانيين وهو بيتكلم، الاتنين كان جسمهم ضخم وباين عليهم اللؤم، كانوا واقفين جنب الولد الشاحب، واحد على يمينه وواحد على شماله زي البودي جارد.

لما الولد الشاحب لاحظ ان هاري بيبص عليهم قال بدون اهتمام ( دول كراب وجويل، وانا اسمي مالفوي، دراكو مالفوي)

رون كح كحة صغيرة، كأنها بتخبي وراها ضحكة سخرية،فبص له دراكو وقال له ( شايف اني اسمي بيضحك؟ اعتقد مافيش داعي أسألك عن إسمك، بابا قالي ان كل عيلة ويزلي عندها شعر أحمر ونمش ، وولاد أكتر من انهم يقدروا يصرفوا عليهم، ورجع يبص لهاري وقال له ( هتعرف قريب يا بوتر ان بعض عائلات السحرة أحسن بكتير من الباقيين، أحسنلك ما تكونش صداقات مع النوع الغلط، انا ممكن أساعدك في الموضوع ده) ومد إيده عشان يسلم على هاري، بس هاري مامدش إيده وقال ببرود ( أعتقد إني بعرف أفرق كويس أوي بين الحلو والوحش بنفسي، شكرا)

دراكو مالفوي ما اتكسفش ولا وشه احمر، يادوب لمحة وردية بانت على خدوده الشاحبة وقال ببطء ( لو مكانك هاخد بالي كويس أوي يا بوتر، لازم تبقى مؤدب أكتر من كده وإلا هيحصلك نفس اللي حصل لمامتك وباباك، هما كمان ماكانوش عارفين ايه الأحسن لهم، خليك كده مصاحب الرعاع زي الويزلي وهاجريد ده، وكله على دماغك انت في الآخر)

هاري ورون وقفوا، ورون اللي وشه بقى أحمر زي شعره قال ( قول الكلام ده تاني...)

قال مالفوي بسخرية ( ايه ، هتعمل ايه؟ هتضربنا؟)

( لو مطلعتوش برة الكابينة دلوقتي حالا) قالها هاري بشجاعة أكتر بكتير من اللي كان حاسس بيها فعلا، أصل كراب وجويل كان أضخم منه هو ورون بكتير.

( بس احنا مالناش مزاج نمشي دلوقتي، ولا ايه يا ولاد؟ احنا خلصنا أكلنا وانت لسة عندكم أكل كتير)

جويل مد ايده عشان ياخد ضفدع شيكولاتة من جنب رون، وقبل ما رون يمد ايده عشان يمنعه، نط جويل لورا وهو بيصرخ، الفار سكابرز كان متعلق في صابعه وغارز سنانه الحادة جواه، كراب ومالفوي، رجعوا لورا برعب، وجويل فضل يلف حاولين نفسه وهو بيصرخ، ويهز ايده ويطوح سكابرز، لحد ما ساب صابعه وطار واتخبط في الشباك، وجريوا هما التلاتة علي برة واختفوا في ثانية، يمكن فكروا ان في فيران تانية جوة الحلويات ويمكن سمعوا صوت خطوات، لأن بعد ثواني دخلت هرميوني جرانجر للكابينة تاني.

قالت وهي بتبص للحلويات اللي واقعة على الأرض، ورون اللي ماسك سكابرز من ديله ( في ايه، ايه اللي حصل؟)

بص رون لهاري وقاله ( شكله أغمي عليه) وبعدين قرب لسكابرز وبص له كويس وقال ( لا ده شكله رجع نام تاني) سكابرز كان فعلا نايم.

قال رون ( هو انت قابلت مالفوي قبل كده؟)

هاري حكاله على كل اللي حصل في حارة دياجون، فرد رون بقلق وخوف ( انا سمعت عن عيلته قبل كده، كانوا أول ناس يرجعوا بعد اختفاء انت عارف مين ، وقالوا انهم كانوا مسحورين، بس بابا مش مصدقهم، بيقول ان ابو مالفوي مش محتاج حد يسحره عشان يبقى شرير، رون بص لهرميوني وقال لها ( نقدر نساعدك في حاجة؟)

( الأحسن تقوموا تلبسوا أروابكم، انا كنت لسة في أول القطر بسأل الكمساري، وقال اننا قربنا نوصل ، انتم ماكنتوش بتتخانقوا، صح؟هتقعوا في مشكلة قبل حتى مانوصل)

قال رون وهو مكشر في وشها ( سكابرز هو اللي كان بيتخانق مش احنا، تسمحي تطلعي برة عشان نغير هدومنا؟)

قالت هرميوني بتكبر ( ماشي، انا مادخلتش هنا غير عشان كلهم برة بيتسابقوا في الممر وبيتخانقوا ويلعبوا زي العيال، على فكرة، انت عارف ان في تراب على مناخيرك؟)

رون كان بيبحلق فيها وهي ماشية، هاري بص من الشباك، الدنيا كانت بدأت تضلم، كان شايف جبال وغابات ممتدة تحت السما البنفسجي، سرعت القطر كانت بتقل واحدة واحدة.

هاري ورون قلعوا الجواكت بتاعتهم ولبسوا الرواب السودة، روب رون كان قصير عليه شوية، كان ممكن تشوف الكوتشي بتاعه.

سمعوا صوت بيتردد في القطر وبيقول ( هنوصل هوجورتس بعد خمس دقايق، لو سمحتم تسيبوا صناديقكم وحاجاتكم واحنا هنوصلها للمدرسة)

معدة هاري كانت بتوجعه من القلق، ولما بص لرون لقى لونه شاحب تحت النمش اللي في وشه، الاتنين حطوا الحلويات الباقية في جيوبهم وخرجوا للمر وبدأوا يتحركوا مع باقي الطلبة.

القطر هدى شوية بشوية وبعدين وقف، والطلبة راحوا للباب ونزلوا منه لرصيف صغير ضلمة، هاري كان بيترعش من هوا الليل البارد. ظهرت لمبة بتتمايل يمين وشمال فوق راس الطلاب، وسمع هاري صوت مألوف بيقول ( طلاب سنة أولى، طلاب سنة أولى، اتجمعوا هنا، عامل ايه يا هاري؟)

وش هاجريد المتغطي بالشعر كان بيبتسم من فوق رؤوس الطلبة الماليين الرصيف وهو بيقول ( يا للا تعالوا ورايا يا سنة أولى؟ لسة حد من سنة أولى ما جاش، خلوا بالكم وانتم ماشيين، تعالوا ورايا يا سنة اولى)

طلاب سنة أولى كانوا بيتزحلقوا ويتكعبلوا وهما ماشيين ورا هاجريد في طريق ضيق منحدر، الدنيا كانت ضلمة حواليهم لدرجة ان هاري كان بيفكر ان أكيد في شجر كبير جدا على طول الطريق، ماحدش كان بيتكلم وهما ماشيين، لكنهم سمعوا صوت نيفيل، الولد اللي كل شوية يضيع ضفدعه، وهو بيعيط مرة أو اتنين.

التفت لهم هاجريد وقال ( ودلوقتي كلها ثواني وتشوف هوجورتس لأول مرة، هناك بعد اللفة الجاية دي) كل الولاد قالو في صوت واحد ( هييييييه)

الطريق الضيق اتفتح فجأة على شط بحيرة كبيرة سودة، وعلى الناحية التانية من البحيرة، كان هناك قلعة كبيرة واقفة على قمة جبل ، بأبراجها الكتيرة وشبابيكها المنورة بتلمع في السما المليانة نجوم.

كان في مجموعة من القوار بالصغيرة واقفة على شط البحيرة، وقال هاجريد للطلبة ( أربعة بس في كل قارب)، ركب هاري ورون في قارب، وركب معاهم نيفيل وهرميوني.

نادى هاجريد اللي كان راكب في قارب لوحده ( كلكم ركبتم؟ طيب ياللا بينا، اتحركوا)

بدأ سرب القوارب الصغيرة يتحرك كله في نفس الوقت، ويشق طريقهوسط البحيرة اللي كانت هادية وأمواجها ثابتة زي ما تكون مراية ازاز. كل الولاد كانوا ساكتين وبيبصوا على القلعة الكبيرة اللي حجمها كان بيزيد كل ما يقربوا من المنحدر الصخري اللي واقفة فوقه القلعة.

لما وصل اول قارب للمنحدر قال هاجريد بصوت عالي ( وطوا راسكم) كلهم وطوا راسهم، والقوارب أخدتهم وعدت من وسط نبات البلاب اللي كان عامل زي ستارة مغطية مدخل فتحة كبيرة في المنحدر، وفضلت ماشية شوية في نفق ضلمة بيمر من تحت القلعة، لحد ماوصلوا لمينا صغيرة تحت الأرض، وطلعوا من القوارب لمكان فيه صخور وحصى.

بعد ما كلهم نزلوا من القوارب ، فحصها هاجريد وبعدين قال ( انت يا ابني، الضفدع ده بتاعك)

قال نيفيل بفرحة ( تريفور) ومد ايده واخد الضفدع من هاجريد.

مشي الطلاب في طريق صخري ورا لمبة هاجريد ، لحد ما وصلوا أخيرا لأرض مستوية مزروعة نجيلة ناعمة وطرية جنب جدار القلعة، وبعدين طلعوا سلالم حجرية واتجمعوا قدام باب كبير جدا من خشب البلوط.

( كلكم هنا ، انت يا ابني، لسة ضفدعك معاك؟)

ورفع هاجريد ايده العملاقة وخبط على باب القلعة 3 خبطات.