قصة حياة فولدمورت-4- حرب السحرة الأولى

 

 حرب السحرة الأولى

وقفنا في الحلقة اللي فاتت لما فولدمورت حاول يرجع لهوجورتس كمدرس لمادة الدفاع ضد فنون السحر الأسود، لكن دامبلدور رفض، وواجهه باللي سمع عنه من انغماسه في السحر الأسود وجمعه لمجموعة من السحرة حواليه، واللي كان بيسميهم ( أكلة الموت).

والنهاردة هنتكلم عن حرب السحرة الأولى، اللي كان في أحداث كتير بتمهد لها، يمكن من 1940 وقبلها كمان، مع محاولة جريندلوالد للسيطرة على العالم السحري، واللي حصل بعد ما هزمه دامبلدور من محاولات للإصلاح قابلها رفض وتمرد من بعض السحرة أنقياء الدم والمواليين لفكرة التفوق السحري على العامة.

 لكن حرب السحرة الأولى بدأت رسميا سنة 1970، لما بدأ فولدمورت في بناء جيشه من السحرة والمخلوقات السحرية المظلمة، عشان يقدر يتحكم في العالم السحري ومن بعده العالم كله.

احنا عارفين ان هدف فولدمورت الوحيد تقريبا كان انه يكون أعظم وأقوى ساحر مظلم في التاريخ، ويكون عنده قدرات سحرية خارقة ماحدش قبله امتلكها، وأهمها انه يكون خالد، وعشان كده اتعلم أندر فنون السحر الأسود وأقواها وأشدها إظلاما، وعمل الهوركوركسس اللي بتضمن ان روحه تفضل متعلقة بالحياة حتى لو فقد جسده بأي طريقة.

فولدمورت ماكانش بيهتم بأي حد غير نفسه وبس، وكان بيعامل أتباعه من أكلة الموت على انهم خدم مش أصدقاء ولا مساعدين حتى، طيب شخص بالأهداف دي، والقسوة دي وعدم الاهتمام بالاخرين، إيه اللي هيقوله للناس يخليهم يساعدوه ويتبعوه وينفذوا أوامره؟

فولدمورت استغل ان العالم السحري بقاله فترة بيمر بتغييرات كتير في النظام الاجتماعي أزعجت العائلات نقية الدم وخلتهم قلقانين على مكانتهم.

من التغييرات دي، ان في سنة 1962 ولأول مرة في العالم السحري، يكون وزير السحر ساحر من أصل عامي مش نقي الدم ولا حتى هجين، وده شيء كان مرفوض جدا من السحرة أنقياء الدم، لدرجة ان في أعضاء كتير من المحكمة السحرية قدموا استقالتهم اعتراضا على اللي حصل.

كمان بدأ بعض السحرة يقولوا ان العامة مش أقل من السحرة وانهم مش أغبياء وجهلة زي ما بيتقال عنهم، لدرجة ان في كتب اتنشرت في الوقت ده بتدعم الكلام ده.

بدأ يكون في قوانين تمنع الرياضات السحرية الخطيرة وقوانين تمنع تربية المخلوقات السحرية الخطيرة والمظلمة، وطبعا بعض السحرة أنقياء الدم اعترضوا على القوانين دي ورفضوها.

ده غير القوانين اللي ساعد دامبلدور على وجودها، واللي بتحمي العامة والسحرة من أصل عامي والمخلوقات السحرية من أي ممارسات مظلمة أو مضرة.

كمان السكويب المولودين لوالدين من السحرة لكنهم هما نفسهم مش سحرة، ومعاهم كتير من الأقليات السحرية، بدأوا يطالبوا بحقوقهم والمساواة بالسحرة أنقياء الدم.

كل التغيرات دي سببت القلق للعائلات السحرية العريقة، ورفضوها رفض تام، وكانوا طبعا عايزين يمنعوها بأي طريقة، وده اللي أقنعهم فولدمورت انه هيساعدهم على تحقيقه.

فولدمورت كان بيقنع أتباعه ان هدفه هو ان السحرة أنقياء الدم يكون لهم مكانتهم العالية والمحترمة في العالم والمميزات اللي بتتناسب مع عراقة أصلهم ونقاء دمهم، وانهم لازم مايخفوش قدراتهم ويمارسوا سحرهم في أي مكان بدون خوف من كشف أمرهم، وعشان كده لازم العالم السحري بقيادتهم يظهر ويتحكم في العامة ويحكم العالم كله، لأنهم مميزين وأفضل من كل الباقيين، أفضل من السحرة اللي أصلهم من العامة وأفضل من المخلوقات السحرية التانية ، زي الأقزام والعمالقة والمستذئبين وغيرهم من المخلوقات السحرية، وبالطبع هما أفضل من العامة اللي بيجوا في آخر درجة خالص.

أقنع فولدمورت أتباعه انهم عشان يعملوا ده وياخدوا المكانة اللي يستحقوها، لازم يتخلصوا من كل السحرة اللي من أصول غير سحرية، ويفضل السحر مقتصر بس على العائلات العريقة اللي ورثوها من جدودهم، ولازم كمان يتخلصوا من كل خونة الدم من العائلات السحرية اللي شايفين ان السحرة انقياء الدم مش أفضل من الباقيين، وان كل المخلوقات والبشر متساويين،وانهم باتباعه هيسيطروا على العالم كله، بس ده مش هيجي غير بتدمير النظام الحالي تماما والتخلص من كل الأعداء وغير المواليين، اللي بيحاولوا يمنعوهم من تحقيق هدفهم.

 أقنع فولدمورت أتباعه انه هيقدر على اللي فشل فيه جريندلوالد وسلازار سليزرين نفسه من قبله، لأن القوى السحرية اللي بيتمتع بيها والمهارات اللي اكتسبها من ممارسته لفنون السحر الأسود اللي ماحدش قبله جمعها، جعلته أقوى من كل السحرة العظماء دول ، وكان بيروج لقوته بين أتباعه بطرق كتير، سواء مواجهة أقوى السحرة المعاديين له والقضاء عليهم، في الوقت اللي كان صعب على أفضل أتباعه مواجهة السحرة دول، أو عن طريق استخدام أنواع السحر الصعبة جدا اللي مابيقدرش يستخدمها بالمهارة دي غيره تقريبا، زي الليجليمنسي أو قراءة الأفكار والتحكم في العقول، كان بيستمتع بقراءة أفكار أتباعه قبل أعداؤه، وطبعا كان معروف ان مستحيل حد يقدر يكدب عليه، لأنه هيدخل جوة عقله مهما حاول يمنعه وهيعرف انه بيكدب، وكان بيستخلص المعلومات من أعداؤه عن طريق الليجليمنسي، وبعدين يزرع في عقولهم أفكار مؤلمة جدا كانت بتقودهم للجنون، وبعد ما يفقدوا عقلهم تماما من شدة التعذيب، كان بيقتلهم.

 

السحرة انضموا لفولدمورت لأسباب مختلفة، منهم اللي كان فعلا مؤمن بكلامه وان لازم السحرة أنقياء الدم هما بس اللي يحكموا ويتحكموا ويكون لهم المجد والقوة والعظمة، وباقي السحرة والعامة والمخلوقات السحرية يخدموهم ويكونوا تحت أمرهم، وفي اللي كان الكلام ده مايفرقش معاه أوي لكنه طمعان في القوة والمجد اللي بيقدمهم فولدمورت لأتباعه، وفي اللي خاف لو عارض ومانضمش لفولدمورت انهم يقتلوه ويقتلوا عيلته زي ما عملوا فعلا في ناس كتير، وفي اللي فولدمورت اتحكم فيهم بتعويذة التحكم الغير مغتفرة (امبريوس كيرس) فكانوا بيطيعوه وينفذوا أوامره والمهمات اللي بيأمرهم بيها وهما غير واعيين للي بيعملوه. حتى اللي مانضمش ليه من السحرة أنقياء الدم، كانوا بيدعموا قضيته في السر وشايفين انه صح وعلى حق.

فولدمورت ماكتفاش بأكلة الموت من السحرة، لكنه ضم ليه مخلوقات سحرية تانية معروفة بقوتها وعنفها زي العمالقة والمستذئبين.

المخلوقات دي كانت مكروهة في العالم السحري ومنبوذة وبتعيش في مناطق بعيد عن السحرة ، لأنهم كانوا مابيلتزموش بقانون سرية السحر وبيهاجموا العامة والسحرة كمان ويقتلوهم، وهو استغل ده وضمهم ليه ووعدهم ان هيكون لهم مميزات ومكانة في العالم السحري، وطبعا هيكون مسموح لهم انهم يهاجموا العامة وخونة الدم والمخلوقات السحرية الأقل شأنا براحتهم.

بالرغم من ان فولدمورت وأكلة الموت من السحرة أنقياء الدم ، كانوا بيحتقروا المستذئبين والعمالقة وغيرهم من المخلوقات السحرية، وشايفينهم أقل منهم بكتير، لكنهم كانوا شايفينهم أعلى درجة من السحرة من أصول عامية ومن العامة، وبيقدروا عنفهم وقوتهم، وعايزين يستفيدوا منها في حربهم ويوجهوها لمصلحتهم.

حاول فولدمورت كمان يضم ليه الأقزام أو ( الجوبلينز) لكنهم فضلوا على الحياد، ما انضموش ليه وكمان ما اعلنوش انهم اعداؤه، لكن ده كان سبب في غضبه عليهم لدرجة انه قتل عيلة كاملة منهم .

فولدمورت كمان كان عنده جيش من الجثث، ودي حاجة مافيش ساحر قبله عملها أبدا، كان بيقتل المشردين والفقرا من العامة اللي ماحدش هيدور عليهم ولا اختفائهم هيلفت الأنظار، وبعدين يستخدم نوع من السحر الأسود اسمه النكرومانسي للتحكم في الجثث دي، كانت أكبر مهمة وكلها فولدمورت لجيش الجثث هي حماية قلادة سلازار سليزرين اللي حولها لهوركوركس واخفاها في الكهف الصخري في البحر.

فولدمورت عمل لنفسه شعار سماه العلامة المظلمة أو ال ( دارك مارك)، كان عبارة عن جمجمة بيخرج من بقها تعبان، ورسم العلامة دي على دراع كل أتباعه من اكلة الموت زي الوشم، وعن طريقها كان بيقدر يستدعيهم عنده في أي وقت وأي مكان.

وزيادة في الحرص والحماية، أكلة الموت ماكانوش يعرفوا بعض.

 أعضاء جيش أكلة الموت كانوا دايما لابسين أقنعة بتخفي شخصياتهم، كانوا زي الخلايا السرية المكونة من مجموعات ، وكل مجموعة ماتعرفش التانية وده كان بغرض الحماية، عشان يمنعوا أي هجمات مضادة تستهدفهم ، ولنشر الرعب أكتر، لأن زي ما أسمائهم كانت مجهولة، عددهم كمان كان مجهول ، وده بيخلي الناس تفتكر انهم أكتر بكتير من الحقيقة، ده غير إن كل السحرة كانوا بيخافوا من بعض، كل ساحر خايف ان يكون أخوه او صديقه او ابنه من أكلة الموت اللي ماحدش عارفهم.

 في البداية كانت هجمات أكلة الموت بسيطة ومخفية ماحدش يعرف عنها حاجة، مرة على مشرد من العامة ومرة على ساحر من أصل عامي مالوش اهل او اصدقاء يدوروا عليه، لكن مع الوقت زادت ثقتهم بنفسهم وقوتهم، وايمانهم بإن فولدمورت لا يقهر، وانضم لهم الكتير من المخلوقات السحرية المظلمة، وأصبح اصطياد العامة رياضة زي صيد الحيوانات، بيمارسها اكلة الموت من السحرة والمستذئبين والعمالقة للمتعة وتقضية الوقت، وبدأ الرعب ينتشر في العالم السحري. وزارة السحر ماكانتش عارفة تسيطر على الموقف، لا عارفة تقبض على اللي بيعملوا كده ولا تمنعهم، ووقتها وجهدها مستنزفين مابين محاولة معالجة المصابين وإخفاء آثار القتل والتعذيب، وخلق مبررات مقنعة للعامة على اختفاء اهلهم ، ومسح ذاكرة العامة اللي نجوا او شهدوا على اي نشاط سحري.

 في الوقت ده سنة 1971 أسس الباس دامبلدور جماعة العنقاء الأولى، وبالرغم من ان وزارة السحر ماعترفتش بالجماعة ككيان بيساعد في حرب أكلة الموت، انضم للجماعة سرا، كتير من أفضل مدافعي الوزارة ضد السحر الأسود، زي أليستور مودي، وفرانك وأليس لونجبوتم ، وانضم كمان موظفين من الوزراة زي ألفياس دوج، وديدالوس ديجل، ده غير سحرة كتير تانيين ، زي فيبيان وجديون بريويت وغيرهم من السحرة. ولحماية أعضاء جماعة العنقاء وحفاظا على سرية اتصالاتهم، اخترع دامبلدور لأول مرة طريقة التواصل عن طريق سحر الباتروناس.

لكن بالرغم من كل جهود وزارة السحر وجماعة العنقاء في مواجهة أكلة الموت ومحاولة تتبعهم ومنعهم، إلا إن الجهود دي كلها فشلت، وقتل أكلة الموت كتير من السحرة والساحرات ، ومع كل عملية قتل ، كان أكلة الموت بترسم العلامة المظلمة فوق بيت الساحر اللي تم قتله ، أو فوق المكان اللي قتلوه فيه ، عشان ينشروا الرعب والخوف في قلوب السحرة ، ويظهروا مدى قوتهم وانتشارهم ، وده فعلا اللي حصل، لدرجة ان السحرة أصبحوا بيخافوا من مجرد ذكر اسم فولدمورت، وأطلقوا عليه ( الذي لا ينبغي ذكر اسمه) وبصيغة غير رسمية، كانوا بيسموه ( أنت تعرف من).

وفي سنة 1975 أصبح هارولد منكوم وزير السحر الجديد، وأمر بنشر أعداد أكتر من الديمينتورز حوالين أزكبان، وبدأ بارتي كراوتش الأب مستشار القانون السحري يكتسب مكانة عالية في الوزارة لحد ما وصل لمنصب رئيس قسم تنفيذ القانون السحري، وبالاشتراك مع الوزير أخدوا خطوات قوية ومهمة لمحاولة السيطرة على أكلة الموت ، لكن للأسف فضلت قوة فولدمورت وجيشه من أكلة الموت في ازدياد، وفشلت الوزارة في السيطرة على الوضع.

ولأن دامبلدور كان الساحر الوحيد اللي بيخاف فولدمورت من مواجهته، لقوته ومهارته العظيمة، فضلت هوجورتس المكان الوحيد الآمن في العالم السحري، واستمر الطلاب في تعلم فنون السحركالعادة.

ومع كل دفعة جديدة من السحرة بتتخرج من هوجورتس، كان جزء بينضم لجماعة العنقاء وجزء تاني بينضم لأكلة الموت.

سنة 1987 انضم لأكلة الموت سيفيروس سنايب وبيلاتريكس ليسترانج ولوسيوس مالفوي وكتير من زملائهم في سليزرين، وحاول فولدمورت انه يضم ليه جيمس بوتر وسيريوس بلاك وريموس لوبين وبيتر بيتجرو ، وحتى ليلي بوتر اللي كانت من أصل عامي حاول يضمها بسبب موهبتها السحرية القوية جدا، لكنهم كلهم رفضوا الانضمام إليه وانضموا لجماعة العنقاء.

فولدمورت شاف في بعض السحرة الصغيرين الجداد اللي انضموا ليه موهبة قوية وولاء كامل فبدأ يقربهم منه ، وبعدين اختار منهم أقواهم وأشدهم ولاء ليه، سيفروس سنايب وبيلاتريكس ليسترانج، وعلمهم كتير من أسرار وفنون السحر الأسود الخاصة بيه، ووكل ليهم المهمات الخطيرة.

مع الوقت أصبح سنايب أقرب أعوانه إليه، وإن كان ماقالش ده بشكل مباشر، وده طبعا لمهارته وذكاؤه وولاءه، بس كمان لأن كان في حاجات تانية مشتركة بينهم، زي انهم الاتنين هجيني الدم، من أم ساحرة وأب عامي، وكل واحد فيهم بيكره أبوه اللي كان بيحتقر السحرة وبيعامل أمه الساحرة أسوء معاملة، وكان السبب في إنه عاش طفولة حزينة وبائسة، ومن شدة ثقة فولدمورت في سنايب كان بيسمح له انه يتصرف من نفسه وبدون الرجوع لفولدمورت إلا في الضرورة القصوى، ويمكن الثقة دي مع غرور فولدمورت هما اللي سمحوا لسنايب إنه يكون بعد كده جاسوس لجماعة العنقاء من غير فولدمورت ما يشك فيه ولا يحاول يمارس عليه الليجليمنسي.

استخدم فولدمورت اتنين من أعوانه المقربين لحفظ اتنين من قطع الهوركوركس اللي صنعها، لكنه بالطبع ماقالش لهم انها هوركوركس.

أولها كانت مذكراته اللي حفظها مع لوسيوس مالفوي، وفهمه ان فيها نوع من السحر القوي هيساعد بعد تهريبها لهوجورتس على فتح حجرة الأسرار، وأمره يحفظها في قصر عيلة مالفوي بأمان لحد ما يصدر له الأمر بتهريبها للمدرسة، وده طبعا لأنه كان خايف يحاول يستولي على المدرسة بالقوة ويواجه دامبلدور، ففضل انه يخترقها من الداخل بفتح غرفة الأسرار، لكن ده ما حصلش زي ما كان مخطط له.

تاني هوركوركس كان كاس هيلجا هافلباف ، واللي أمر بيلاتريكس ليسترانج انها تحفظه في خزينة عيلتها في بنك جرينجوتس، طبعا من غير ماتعرف انه هوركوركس.

فولدمورت كان كتير بيلمح لأكلة الموت إنه وصل لسر الخلود ، لكنه ماصرحش لحد أبدا إنه عمل هوركوركس، وكان متأكد إن مستحيل أي شخص ممكن يفهم تلميحاته ويخطر بباله الهوركوركس.

سنة 1979 قرر فولدمورت إنه يختبر الدفاعات والتعاويذ السحرية اللي بيحمي بيها قطع الهوركوركس، فبدأ بقلادة سلازار سليزرين المخبأة في الكهف الصخري، وطلب من ريجيولاس بلاك ، الأخ الأصغر لسيريوس بلاك، وآكل الموت الجديد ، اللي كان عمره ساعتها يادوب 18 سنة، انه يستعير قزم عائلته المنزلي ( كريتشر)، فأمر ريجيولاس كريتشر إنه يروح مع فولدمورت، وطلب منه إنه يرجع البيت تاني بعد ما يخلص مهمته على طول.

أخد فولدمورت كريتشر وراحوا للكهف الصخري، وأجبره إنه يشرب الجرعة السحرية اللي بتغطي القلادة وسابه في الكهف الصخري وهو معتقد إنه مش هيقدر يطلع من الكهف، و أكيد هيموت ، لو مش بسبب الجرعة، فبسبب جيش الجثث اللي بيحمي القلادة.

غرور فولدمورت واحتقاره لكل الكائنات السحرية الأقل منزلة، نساه ان أقزام المنازل لها سحر خاص بيها تقدر تستخدمه، وده اللي عمله كريتشر فعلا ، لما استخدم سحر أقزام المنازل في الرجوع لبيت عيلة بلاك، وحكى كل اللي شافه لريجيولاس، اللي كان بدأ يشك في نوايا فولدمورت ويكره العنف والقتل الغير مبرر، وكان احتقار فولدمورت لكريتشر وتركه له يموت في الكهف ، هو الشيء اللي أثبت لريجيولاس قسوة وعنف فولدمورت وفساد أفكاره. ربط ريجيولاس بين تلميحات فولدمورت بالخلود واللي حكاه القزم، وقدر يفهم ان  فولدمورت عمل هوركوركس، فقرر يدمر الهوركوركس عشان فولدمورت مايكونش خالد، وصنع قلادة مزيفة تشبه قلادة سليزرين بالظبط وخبى في قلبها ورقة  بيقول فيها لفولدمورت إنه اكتشف خطته واخد القلادة الحقيقية ، وأمر كريتشر ياخده للكهف الصخري تاني، وهناك ساعده كريتشر يتخطى دفاعات فولدمورت السحرية، لكن لما وصلوا للحوض اللي فيه القلادة، رفض ريجيولاس انه يعرض كريتشر لألم شرب الجرعة السحرية مرة تانية، وبدأ يشربها هو، وأمر كريتشر إنه بعد ما يخلص شرب الجرعة ، يستبدل القلادة الحقيقية بالمزيفة وياخدها ويرجع البيت ويحاول يحطمها بأي طريقة. وفعلا، بعد ماشرب ريجيولاس الجرعة وحس بالعطش القاتل اللي بتسببه حاول يشرب من البحيرة فشدته الجثث الموجودة فيها وفشل كريتشر في إنقاذه، وأخد القلادة الحقيقية ورجع بيت عيلة بلاك ، لكنه فشل في تحطيمها مهما حاول.

سنة 1980 كانت قوة فولدمورت في قمتها ، وأحكم سيطرته أكتر وأكتر على العالم السحري، وبدأ بعض من السحرة اللي كانوا على الحياد واللي كانوا بيقاوموه كمان، يحسوا ان خلاص مافيش فايدة من المقاومة، وان فولدمورت أصبح خلاص أقوى ساحر في التاريخ ومافيش أي حد هيقدر على هزيمته والقضاء عليه أو على جيشه من أكلة الموت، وبالتالي بدأ السحرة دول ينضموا لأكلة الموت، وبدأت أصعب وأعنف فترة من الحرب.

من أهم السحرة اللي انضموا لأكلة الموت في الوقت ده، واللي كان انضمامه نقطة فارقة في الحرب كلها، بيتر بيتجرو، اللي كان عضو موثوق فيه جدا في جماعة العنقاء، والصديق المقرب لجيمس بوتر وسيريوس بلاك وريموس لوبين.

أهمية انضمام بيتر بيتجرو لأكلة الموت ماكانتش بسبب مهارته أو قوته أو شجاعته، لكن لأنه بدأ ينقل كل أخبار وتحركات أعضاء الجماعة لفولدمورت، وده أدي لأن أكلة الموت يتعقبوا كتير من أعضاء الجماعة ويقتلوهم بشكل منظم ومكثف. أعضاء الجماعة بدأوا يشكوا ان في جاسوس مابينهم، لكنهم لللأسف ما كانوش بيشكوا خالص في بيتر بيتجروا، على العكس، سيريوس بلاك كان بيشك إن ريموس لوبين صديقهم المستذئب اللي بيعيش متخفي بين المستذئبين بطلب من دامبلدور ، هو الجاسوس.

فقد العالم السحري في الوقت ده مجموعة من أقوى وأفضل السحرة ، زي الساحرة دوركاس ميدوز اللي قتلها فولدمورت بنفسه لأنها كلنت ساحرة قوية جدا وموهوبة وكانت تهديد كبير وحقيقي لأكلة الموت، وقتل أكلة الموت الساحرة ميرلين ماكينين وعيلتها كلها، والساحر إدجار بونز وزوجته وأولاده، و فيبيان وجيديون بريويت، وبينجي فينويك اللي قتلته بيلاتريكس بوحشية شديدة وشوهت جثته لدرجة إنهم مالقوش منه غير أجزاء بسيطة، ده غير السحرة اللي اختفوا وماحدش عرف ايه مصيرهم زي كارادوك ديربورن.

وكرد على عمليات القتل المنظمة والواسعة للسحرة وعائلاتهم، بدأت وزارة السحر حملة كبيرة جدا لمطاردة أكلة الموت، اشترك فيها أعظم المدافعين ضد السحر الأسود ، زي أليستر مودي وكينجسلي شاكلبوت، وفرانك لونجبوتم، واللي كانوا في نفس الوقت أعضاء في جماعة العنقاء، وأصدر بارتي كراوتش الأب أوامر بتسمح للمدافعين ضد السحر الأسود باستخدام التعاويذ المحرمة على أكلة الموت، وركزت الحملة في البداية على قتال العمالقة، فقضوا على كتير منهم بالتعويذة القاتلة (أفاداكدافرا) لدرجة انهم قتلوا قبايل كاملة منهم، وأجبروا الباقيين يهربوا ويستخبوا في الجبال البعيدة.

مع استمرار الحملة دي ، بدأوا يتعرفوا على كتير من السحرة أكلة الموت ويلاحقوهم ويقبضوا عليهم، فنجحوا في القبض على ايجور كاراكوف ودولوف وياكسلي ، وقتلوا ايفان روزير لما قاوم الاعتقال، لكن فولدمورت فضل بعيد عن أي مواجهة، لمرواغته الدايمة وقوته الاسطورية طبعا.

استمرت أعمال فولدمورت وأكلة الموت الوحشية، واستمرت كمان مقاومة جماعة العنقاء ومدافعي وزارة السحر، وبين الكر والفر والمعارك، استمرت الحياة كمان، كان السحرة بيتجوزوا ويأسسوا عائلات ويحاولوا يعيشوا حياة طبيعية ولو كان الموت بيهددهم في أي لحظة.

كان مر حوالي 10 سنين على حرب السحرة الأولى لما اتولد هاري بوتر ابن جيمس وليلي بوتر، ونيفيل لونجبوتم ابن فرانك وأليس لونجبوتم، اللي كانوا كلهم أعضاء في جماعة العنقاء، ومن أقوى السحرة اللي قاوموا فولدمورت واتسببوا في قتل وسجن كتير من أكلة الموت. بعد ولادة هاري ونيفيل بفترة ظهرت النبوؤة اللي كانت السبب في تخلص العالم السحري من فولدمورت وانتهاء حرب السحرة الأولى بعد سنين من الرعب والوحشية والموت.

يا ترى ايه هي النبوؤة دي، ومين تنبأ بيها، وازاي كانت السبب في نهاية الحرب؟

ده اللي هنعرفه الحلقة الجاية.