قصة حياة فولدمورت-2- من الملجأ للعالم السحري

 فولدمورت من الملجأ للعالم السحري

وقفنا في الحلقة اللي فاتت عند موت ميروب جاونت، أم توم ريدل، اللي هيبقى فولدمورت، بعد ما ولدته في ملجأ العامة، وسمته توم على اسم أبوه، ومارفولو على اسم ابوها، وقالت لهم ان اسم عيلته ريدل.

بعد موت ميروب ، ماحدش سأل خالص عن توم الصغير ، كان جده مارفولو مات ، وأبوه نسى ميروب وابنها ومافكرش يدور عليهم أو يسأل عنهم، وخاله مورفن كمان، مافكرش يدور على أخته، اللي شايفها خائنة للدم، وتستاهل كل اللي يجرالها.

اتربى توم ريدل في الملجأ، كان مكان نضيف مرتب ومش بيسيئوا معاملة الأطفال، لكنه كان مكان بارد، مظلم، كئيب، مايعوضش الأطفال عن الأسرة والبيت.

توم ريدل من صغره كان ولد غريب، ده حتى ماكانش بيعيط زي الأطفال.

كان ديما لوحده، ماعندوش اصحاب، شايف انه مميز وأحسن من كل الباقيين، وان فيه شيء مختلف، ماكانش فاهمه لكن كان حاسه كويس جدا، حتى اسمه كان بيكرهه لأنه اسم منتشر، وفي ناس كتير بتتسمى بيه، كان عايز يبقى متفرد ومختلف، حتى في اسمه.

 الولاد في الملجأ كانوا بيخافوا منه، ماحدش شافه بيهددهم ولا بيأذيهم، ولا عمرهم اشتكوا منه، لكنهم كانوا بيخافوا منه، ويا ويل اللي يزعل توم، لازم تحصله حاجة مؤلمة، كأنها نوع من العقاب، لكن ماحدش برده كان بيشوف توم وهو بيعمل أي حاجة

زي يوم ما اتخانق مع زميله في الملجأ(بيلي ستابس)، وتاني يوم لقوا أرنب بيلي مخنوق ومتعلق في السقف، الكل كان شبه متأكد ان توم هو الي عمل كده،بس ماحدش يقدر يثبت،  أصل توم الطفل الصغيرهيعمل كده ازاي، هيوصل للخشب المتعلق في السقف ازاي.

 ويوم لما راحوا رحلة للبحر، وأخد اتنين من زمايله، وراحوا عند الكهف اللي في الجرف الصخري، بعيد عن الباقيين، يومها رجعوا الولاد مرعوبين، بس ماقالوش اي حاجة عن اللي حصلت لهم هناك، وتوم قال انهم بس كانوا بيستكشفوا الكهف، وانه ماعملش فيهم أي حاجة، حتى اسألوهم، الأولاد ماقالوش ان توم أذاهم او عمل فيهم اي حاجة ، بس فضلوا ساكتين وشاردين، ومارجعوش لطبيعتهم ابدا.

 زي ما احنا عارفين، كل طفل بيتولد وعنده موهبة سحرية سواء من نسل سحري أو من العامة ، بيتسجل اسمه ويتحفظ مكانه في مدرسة هوجورتس، وبيدخلها لما يتم ١١ سنة.

 لما وصل عمر توم ١١ سنة، ولأنه بيعيش في ملجأ مع العامة اللي مايعرفوش اي شيء عن العالم السحري، ماكانش ينفع انهم يبعتوله بومة بجواب القبول في هوجورتس، كان لازم حد من المدرسة يروح له ويفهمه الموضوع واحدة واحدة، الواحد ده كان دامبلدور، اللي كان في الوقت ده ، مدرس مادة التحويل في مدرسة هوجوراتس.

 أخد دامبلدور ميعاد من مديرة الملجأ مدام كول، وراح لها وقدم نفسه على انه مدرس، وبيقدم لتوم فرصة للتعليم في مدرسته، المديرة كانت متشككة وسألته اسئلة كتير، انت من أهله؟ مدرستك اسمها ايه؟ يعني انت بتقدم له منحة مجانية؟ بس هو ماقدمش اصلا على منحة؟ حصل عليها ازاي؟ ولما كان من المستحيل ان دمبلدور يقول لها الأجوبة المقنعة اللي هي مستنياها، طلع دامبلدور عصايته السحرية، وحركها حركة بسيطة، وأخد ورقة بيضا من على مكتب مدام كول وادهالها، بصت فيها شوية وبعدين قالت، (تمام ، كده مافيش حاجة مخالفة لللوايح والقوانين)، وبدأت تحكي لدمبلدور عن توم ريدل من يوم ولادته ، وانها كانت الموظفة اللي استقبلت امه يوم ماجات الملجأ قبل ولادته بساعة وسمته بالاسم اللي اخترته امه، وعاش في الملجأ لان مافيش حد من اهله سأل عنه، وبدأت تحكيله عن شخصيته الغريبة، لكنها اتوقفت فجأة، لما حست ان كلامها ممكن يخليه يرجع في قراره بإنه ياخد توم مدرسته، لكن دمبلدور طمنها ان مافيش اي حاجة ممكن تخليه يغير رأيه، اتطمنت المديرة وكملت حكاياتها عن توم ريدل وخوف الأولاد منه، والمواقف الغريبة اللي بتحصل للي يزعلوه، او يكونوا قريبين منه بزيادة، زي حادثة الأرنب والكهف، وان اكيد كل اللي في الملجأ هيحسوا براحة كبيرة لما توم يمشي ويروح مدرسته الجديدة.

 لكن دمبلدور قالها، ان توم هيضطر يرجع يقضي الأجازة الصيفية في الملجأ، حست المديرة بخيبة أمل، لكنها رجعت قالت، ان ده مهما كان، أفضل من انه يكون موجود هنا طول الوقت.

بعد ما خلصت مدام كول كلامها عن توم، سألت دامبلدور لو كان يحب يقابل توم ويتكلم معاه ، وأخدته لحد أوضة توم وعرفته عليه، وكانت لسة هتقوله هو جاي ليه ، لما رجعت في كلامها، وقالت له هو هيقولك، وسابتهم ومشيت.

الأوضة كانت فاضية تقريبا، مافيهاش غير سرير ودولاب، وعلى السرير قاعد ولد في ايده كتاب.

 توم ماكانش شبه عيلة جاونت خالص، كان نسخة من ابوه، زي ما امه اتمنت قبل ماتموت، كان طويل ووسيم، بشعر أسود ووش شاحب.

 مد دامبلدور ايده وسلم عليه، بعدين شد كرسي وقعد جنب سريره.

 لما دمبلدور عرفه بنفسه وقاله انا بروفسور دامبلدور ، توم فكر انه دكتور او اخصائي نفسي، جاي يفحصه بطلب من مدام كول.

 دامبلدور حاول يقنعه انه مش دكتور، لكن توم ماكانش مصدقه.

حاول توم يتعامل مع دامبلدور، بنفس الطريقة اللي بيتعامل بيها مع كل اللي حواليه، طريقة الأمر، اللي صعب تطلع من طفل في سنه، واللي كانت بترهب اللي حواليه وتخليهم يطيعوه، وبلهجة أمر قوية وصوت عالي، قال توم لدامبلدور ( قولي الحقيقة)، بس توم فشل في إرهاب دامبلدور، ومابانش عليه انه اتأثر بطريقته ولهجته، وفضل مبتسم بلطف، استغرب توم من رد فعله فسأله تاني بحذر( انت مين)

 ( انا قلت لك قبل كده، اسمي الأستاذ دمبلدور، وبشتغل في مدرسة اسمها هوجورتس ، وجاي أعرض عليك مكان في المدرسة لو حبيت)

 بس على عكس المتوقع، توم قام من على سريره، وبعد عن دامبلدور بسرعة وهو غضبان جدا، وقاله ( انت مش هتقدر تخدعني ، انت جاي من مصحة الأمراض العقلية، بس انا مش هدخل مصحة، انا ماعملتش حاجة للأولاد في الكهف ، حتى اسألوهم)

 وبصبر غريب قال دمبلدور( انا مش جاي من مصحة ، انا مدرس، ولو قعدت وهديت، هقولك كل حاجة عن مدرستي، هوجورتس)

وأخيرا نجح دامبلدور انه يقوله، ان مدرسته مدرسة لتعليم السحر،

 ( يعني اللي انا بعمله ده اسمه سحر؟)

 ( هو ايه اللي انت بتعمله؟)

توم وشه احمر جدا، زي مايكون عنده حمى، وبدأ يحكي بحماس شديد، عن قدراته في تحريك الأشياء من غير مايلمسها، وانه يخلي الحيوانات تطيع أوامره من غير ما يدربها، وانه كمان ممكن يخلي اللي بيزعلوه يتألموا، ويحصلهم حاجات سيئة

 كان بيترعش من شدة حماسه، فقعد على سريره تاني وقال بصوت واطي كأنه بيكلم نفسه ( كنت عارف اني مميز ومختلف ) كان سعيد جدا ، بس السعادة دي خلت ملامحه قاسية ووحشية

سأل دامبلدور ان كان هو كمان ساحر ، وأمره تاني، انه يثبت له انه ساحر، بس دامبلدور قاله، انه لو كان هينضم لمدرسة هوجورتس، فلازم يتكلم معاه باحترام لأنه هيكون استاذه

 اتجمدت تعابيره للحظة، وبعدين بدأ يتكلم بلطف وأدب واحترام،وطلب من دامبلدور بكل ذوق، انه يوريه شيء من السحر، طلع دامبلدور عصايته وشاور على الدولاب، فاشتعلت فيه النار، صرخ توم وقام بفزع من على سريره، بس قبل ما يقول ولا كلمة، كانت النار اختفت، والدولاب لسة سليم زي ماهو

 بص توم لدامبلدور بصة مليانة بالجشع وهو بيسأله عن العصاية ومنين يقدر يجيب واحدة زيها قال دمبلدور( كل حاجة في وقتها)

 كان في صوت حركة خفيفة بيخرج من دولاب توم، قال دامبلدور (في حاجة عايزة تخرج من دولابك )

ولأول مرة ظهر الخوف على توم

 ( افتح الدولاب)

اتردد توم شوية، وبعدين راح فتح الدولاب، كان فيه صندوق ورق بيتهز، الصندوق كان فيه يويو و هارمونيكا وحاجات بسيطة زي كده، تذكارات انتصار أخدها توم من الأولاد اللي خوفهم وأذاهم، طبعا من غير مايعرفوا.

 سأله دامبلدور ان كانت دي حاجته، ولما قال انها مش ملكه، فهمه دامبلدور ان السرقة ممنوعة في هوجورتس ، وان في قوانين لازم يتبعها والا هيتعاقب وممكن يتفصل من المدرسة،وكلمه عن وزارة للسحر وازاي بتحاسب اللي بيكسر القوانين، وانهم في هوجورتس زي ما هيعلموه السحر، هيعلموه يتحكم فيه لأن كل ساحر جديد لازم يعرف القوانين ويتبعها، وقاله كمان انه لازم يرجع الحاجات اللي في الصندوق لأصحابها ويعتذر لهم

 توم كان بيسمع لدامبلدور ووشه خالي من اي تعبير، ماكانش مبين اي نوع من الندم او الخجل او الخوف ،وبعدين قال بصوت برده خالي من اي تعبير (حاضر يا أستاذ) وسكت لحظة وبعدين كمل ( بس انا ماعنديش فلوس)

سلمه دامبلدور كيس فلوس وقاله مافيش مشكلة هوجورتس فيها صندوق لمساعدة الطلبة المحتاجين، عشان يشتروا كتب التعاويذ والهدوم، بس هتضطر تشتري بعض الحاجات المستعملة

عرض عليه دامبلدور انه يروح معاه دياجون الي، يساعده يشتري كتبه وحاجاته، لكن توم رفض، وقال انه بيعمل كل حاجة بنفسه، وعارف لندن كويس، بس يوصفله المكان وهو هيروح

 وصف له دامبلدور المكان، وازاي يوصل ليكي كالدرون، عشان يعدي منه لدياجون الي، وقاله لو احتجت مساعدة، اطلبها من توم، اللي بيشتغل في الليكي كالدرون، اكيد هتفتكر اسمه لأنه زي اسمك

بس توم بان عليه الضيق جدا لما سمع عن توم الساقي

سأله دامبلدور، ان كان مابيحبش اسم توم، فقاله ان الاسم عادي ومنتشر وناس كتير اسمهم توم، زي ما قلنا كان عايز يكون متفرد حتى في اسمه.

توم ماقدرش يمنع نفسه، من انه يسأل دامبلدور عن ابوه، توم ريدل الأب، كان شايف ان المفروض ابوه هو اللي يكون ساحر، وان امه مستحيل تكون ساحرة، ببساطة لأنها ماتت، كان فاكر ان قوى زي القوى السحرية أكيد تهزم الموت

كان بيخاف من الموت من السن الصغير ده ، الموت اللي كان السبب انه يتربى في الملجأ الحقير ده.

بس دامبلدور قاله انه مايعرفش اي معلومات عن ابوه واذا كان ساحر او لأ، واداله قايمة الطلبات وتذكرة هوجورتس اكسبرس، وشرح له ازاي هيروح لرصيف ٣/٤ ٩

قبل ما يخرج دامبلدور من الأوضة ، قال توم فجأة ( أنا بقدر اتكلم مع التعابين، هو كل السحرة بيقدروا يتكلموا مع التعابين؟)

دامبلدور ما بينش اي رد فعل، لكنه ركز في ملامح توم، كأنه بيدور على حاجة يكون ما أخدش باله منها، وبعدين قاله انها موهبة نادرة جدا، لكنها مع ذلك موجودة عند بعض السحرة

دامبلدور اخد باله من تصرفات توم مع زمايله، وصفاته اللي فيها كتير من القسوة والتعالي، وطبعا قدرته على الكلام مع التعابين، وقررانه لازم يراقب الولد ده كويس

 توم ريدل وصل لدياجون الي، واشترى كتبه وهدومه، واشترى كمان عصايته اللي كان قلبها ريشة من طائر الفينكس أو العنقاء.

 صانع العصيان السحرية قال انه ما اخدش من الطائر ده، غير ريشتين اتنين بس، واحدة أخدها فلدمورت، والتانية اخدها هاري بوتر بعد سنيييييين كتيرة، وفي ناس بتقول، ان طائر الفينكس اللي صنعوا من ريشته العصايتين، كان هو نفسه فاوكيس طائر دامبلدور

 السيد اوليفندر صانع العصا السحرية قال كمان، ان عصاية توم ريدل كانت قوية جدا، وانه كان فرحان بيها جدا، وده طبعا لحد ماخذلته بعدين في المقبرة، لما حاول يقتل هاري، يوم إعادته لجسمه البشري

سنة 1938 دخل توم ريدل هوجورتس ، وفي القاعة الكبيرة ساعة مراسم التصنيف، أول ما لمست قبعة التصنيف راسه صرخت سليزرين، ومين أولى بدخول منزل سليزرين، من وريث سليزرين نفسه.

من أول يوم ليه في المدرسة، أثبت توم ريدل انه طالب عبقري ومجتهد ، يمكن أفضل طالب شافته هوجورتس من سنين طويلة، زي ما قال دمبلدور بنفسه، ولأنه اتعلم من غلطته، لما أظهر جزء كبير من شخصيته الحقيقية لدامبلدور، في أول مقابلة بينهم في الملجأ، وخلّاه يحذر منه ويراقبه، بدأ يبين لأساتذته شخصية تانية مختلفة تماما ، شخصية الطالب العبقري المجتهد اللبق، اللي بيسحر كل اللي حواليه، بحسن سلوكه وكلامه الموزون المجامل ، لحد ما أصبح الطالب المفضل لكل المدرسين في المدرسة، وأولهم الأستاذ ديبيت مدير المدرسة، والأستاذ سلجهورن رئيس منزل سليزرين، اللي كانوا مفتونين بيه تماما، بس طبعا ما فكرش يجرب حظه مع دامبلدور تاني.

توم كان نجم المدرسة، لكنه كان بيضطر كل صيف يرجع للملجأ، أكتر مكان بيحتقره ويكرهه ويخشاه على وجه الأرض.

بمرور الأيام بدأ يجمع حواليه بعض طلاب سليزرين المنحدرين من عائلات سحرية نقية الدم طبعا، كانوا قدام الناس أصحاب ، لكن في الحقيقة هما كانوا تابعين له ، أقرب للخدم منهم للأصحاب، لأن توم ريدل عمره ما اهتم بيهم ولا اعتبرهم أصدقاء.

كان منهم الضعيف اللي بيدور على حماية، واللي بيحب الشهرة وبيحاول ياخد نصيبه منها، بظهوره جنب أشهر طالب في المدرسة، واللي عنده ميول للوحشية والشر، ومحتاج حد أكتر وحشية وشر منه، يوجهه ويعلمه أساليب وطرق جديدة، يمارس بيها وحشيته ويكبرها، وكانت المجموعة دي من أتباع توم ريدل، أول المنضمين لأكلة الموت بعدين.كان توم بيخطط لهم ويوجههم وهما ينفذوا، لكن ماحدش قدر أبدا، يربطهم بأي حادثة حصلت في المدرسة.

زي أي يتيم، توم كان بيحاول يعرف أي معلومات عن أهله، ولأنه مقتنع ان أمه عشان ماقدرتش تهزم الموت، تبقى أكيد مش ساحرة، ولأنه مقتنع كمان انه ساحر عظيم، عنده قدرات خارقة،أكيد ورثها عن أبوه، كان مؤمن ان أبوه كان ساحر عظيم، ولازم كان طالب هنا في هوجورتس، وأكيد أخد جوايز واتكرم ، عشان كده بدأ يدور على اسم ابوه، على كل جايزة في هوجورتس، وعلى كل قايمة شرف ، وبعدين دور في كل سجلات المدرسة، وكتب المكتبة، وأي مكان ممكن يكون فيه ذكر لأسماء السحرة، بس مالقاش أي ذكر خالص لاسم توم ريدل ولا لعيلة ريدل أو أي حد منها.

بعد بحث مضني، اقتنع توم أخيرا ان أبوه ماكانش ساحر ، وانه أكيد ورث دمائه السحرية من أمه، وده زود من كرهه لأسمه العامي الحقير، اللي بيفكره دايما ان ابوه عامي، وانه مش ساحر نقي الدم، عشان كده خطرت على باله فكرة، أخد حروف اسمه ( توم مارفولو ريدل) وبعترها، وغير ترتيبها، لحد ما عمل لنفسه اسم جديد ( لورد فولديمورت) الاسم اللي ساعتها وهو لسة طالب صغير قال، ان هيجي وقت والعالم السحري كله يخاف حتى ينطقه.

بعد ما يأس توم من انه يلاقي اسم ابوه، في قايمة السحرة اللي دخلوا هوجورتس، واقتنع ان امه هي الساحرة، فكر يدورعلى اسم جده لأمه (مارفولو) اللي سمته على اسمه، زي ماقالوا له في الملجأ، ولما وصل للسنة الرابعة له في هوجورتس كان أخيرا توصل لاسم مارفولو جاونت، وعرف انه من نسل سلازار سليزرين.

زي كل الطلاب في المدرسة، سمع توم كتير عن أسطورة غرفة الأسرار، اللي عملها سلازار سليزرين في مكان مخفي من القلعة، وعن الوحش الموجود فيها، وعن الوريث اللي هيعرف مكانها، ويخرج الوحش عشان يتخلص من كل السحرة المولودين للعامة، واللي من وجهة نظر سليزرين ما يستحقوش يتعلموا السحر، وطبعا هو كان وريث سلازار سليزرين في المدرسة في الوقت ده.

قضى توم سنته الخامسة في المدرسة، بيدور على غرفة الأسرار،وفعلا قبل نهاية السنة بفترة بسيطة، قدر يلاقي مدخل الغرفة ويفتحها، ويتحكم في وحش الباسيليسك العملاق الموجود فيها، ويطلقه في القلعة، وينشر الرعب في قلوب الأساتذة قبل الطلاب.

كان أول ضحية للباسيليسك، طالبة من العامة من منزل ريفنكلوا، اسمها ميرتل وارن أو موننج ميرتل زي ماكلنا عارفينها.

مدير المدرسة ومجلس الحكام، قرروا انهم لازم يقفلوا المدرسة ويبعتوا كل الأولاد لبيوتهم، عشان يحافظوا على سلامتهم ويمنعوا أي هجوم تاني.

توم ريدل كان قدر أخيرا في السنة دي، انه يقنع الأستاذ ديبيت، يسمح له يقضي أجازة اخر السنة في هوجورتس، ومايرجعش الملجأ، بس بعد الحوادث الأخيرة، وقفل المدرسة الإجباري، كان توم مضطر يرجع الملجأ، عشان كده فكر توم في طريقة تخليهم يرجعوا عن قرارهم في قفل المدرسة، طبعا الحاجة الوحيدة اللي تخليهم يعملوا كده، انهم يقبضوا على الوحش الطليق في هوجورتس.

توم ريدل قدر انه يقنعهم، ان الوحش اللي قتل موننج ميرتل، وعمل كل الحوادث دي ، هو عنكبوت الاكرومنتولا العملاق، اللي كان بيربيه نصف العملاق، روبيوس هاجريد الطالب في الصف الثالث.

قدر هاجريد يهرب عنكبوته أراجوج، لكنه اتعرض للفصل من المدرسة واتكسرت عصايته ، ولأن دامبلدور كان متأكد ان في حاجة غلط، وان هاجريد بريء، أقنعهم يسيبوه في المدرسة كحامل للمفاتيح .

وكمكافأة على كشف الوحش، وإعادة الأمن للمدرسة، أخد توم ريدل جايزة الخدمات الخاصة للمدرسة، واتعلق اسمه في قايمة شرف هوجورتس.

دامبلدور كان بيشك ان توم ريدل له علاقة بالحوادث دي، بس ماقدرش يثبت ده، فبدأ يراقبه عن قرب ، وعشان كده ماقدرش توم يفتح غرفة الأسرار تاني، لكنه استخدم دفتر يومياته بعد قتله لموننج ميرتل وصنع أول هوركوركس ووضع فيه جزء من روحه بطريقة تخليه يقدر يقود حد تاني، انه يفتح غرفة الأسرار ويكمل مهمته، بعد ما يتخرج من المدرسة، ويكون بعيد تماما عن الشبهة.

بس يعني ايه هوركوركس، وايه هي قواه السحرية، اللي خلت توم ريدل يصنع منه 7، حولوه من توم ريدل لفولديمورت.

ده اللي هنعرفه بالتفصيل الحلقة الجاية ان شاء الله.