قصة حياة فولدمورت-3- التخلص من توم ريدل

  خطوات على طريق المجد والخلود

وصلنا في الحلقات السابقة، لحد ما توم ريدل فتح غرفة الأسرار واتحكم في البازيليسك، ومع موت أول ضحية من ضحايا البازيليسك ( موننج مرتيل) صنع أول هوركوركس باستخدام دفتر يومياته، واتكلمنا في حلقة كاملة عن كل شيء عن الهوركوركس، معناه وفايدته وأثاره الجانبية وطريقة تدميره، وهركوركسس فولديمورت، امتى وازاي صنعها ومين دمرها.

بعد ما قفل توم ريدل غرفة الأسرار ووضع جزء من روحه في دفتر يومياته، عشان يضمن ان يجي طالب تاني بعده يفتح غرفة الأسرار ويكمل اللي هو ماقدرش يكمله في وقت وجوده في المدرسة، كانت السنة الدراسية الخامسة ليه في هوجورتس على وشك الانتهاء، كان قدام كل اللي في المدرسة طالب مثالي ، أخد لقب بيرفكت في سنة خامسة ، طالب عبقري شاطر في كل المواد وبياخد الدرجات النهائية في كل الامتحانات، ودود ، قريب من مدرسينه، بيحترمهم وهما بيحبوه، كان راسم لنفسه صورة متكاملة فيها كل حاجة كويسة، لكنها كانت صورة مزيفة بيخبي وراها سعيه لامتلاك القوة المطلقة وتعلم فنون السحر الأسود والخطوات اللي بدأها في طريقه انه يكون أعظم ساحر مظلم في تاريخ السحر، طريقه للخلود والهروب من الموت.

في أجازة سنة خامسة لما كان عمره 16 سنة، تقريبا في أغسطس 1943، وبعد ما قدر يتتبع عيلة جونت ويعرف مكانهم، راح لكوخ جونت في ليتل هانجلتون ، طبعا كان مستني يلاقي عيلة سحرية عظيمة محترمة بيدل مظهرها ومكانتها على عراقة أصلها ونسبها، لكن كل اللي لقاه راجل شعره طويل مغطي ملامحه وهدومه متقطعة ومتوسخة، بيعيش في كوخ ماليه خيوط العنكبوت والتراب، حتى التربيزة الوحيدة الموجودة في الكوخ كانت متغطية بالتراب والأكل المتعفن والحلل المصدية والأزايز الفاضية، أول ما دخل توم ريدل كوخ جونت وشاف مورفن ضاعت أحلامه بالعيلة العريقة وحس بالاشمئزاز من شكل الكوخ واللي عايش فيه، أما مورفن ساعة ماشافه فكان هيهاجمه بعصايته وسكينته لأنه افتكره في الأول توم ريدل الأب، لكن توم كلمه بلغة التعابين وطلب منه يتوقف عن مهاجمته، لما سمع مورفن توم بيتكلم بلغة التعابين اتخض لدرجة انه اتخبط في التربيزة ووقع اللي عليها، ووقف يبحلق في توم.

توم سأله : فين مارفولو

مارفولو مات من زمان

امال انت تبقى مين

أنا مورفين ابنه، بس انت مين ؟ انا افتكرت في الأول انك العامي ، انت شبهه بالضبط، بس هو أكبر منك دلوقتي

بتتكلم عن مين ؟ مين العامي ده؟

العامي اللي بيعيش في البيت الكبير على الطريق، ريدل اللي حبته أختي واتجوزته ، وبعدين هجرها وسابها ورجع، بس هي تستاهل لأنها اتجوزت عامي حقير

توم فهم من كلام خاله مورفن ان ابوه العامي بعد ما اتجوز امه واكتشف انها ساحرة هجرها وسابها تموت وحيدة في لندن بعد ما اضطرت تولده في الملجأ وتسيبه يتربى هناك، وطبعا شعر بكره وحقد على أبوه اللي كان السبب في موت امه وتربيته يتيم في ملجأ حقير وقرر ينتقم منه.

في ثواني كان صعق خاله مورفن وأخد عصايته السحرية وراح على بيت توم ريدل الأب واستخدم عصاية خاله في قتل أبوه وجده وجدته بتعويذة القتل أفاداكادفرا، ورجع تاني لكوج جونت ، كان خاله مورفن لسة فاقد الوعي تحت تأثير تعويذة الصعق، فحط عصايته جنبه وزرع في دماغه ذاكرة مزيفة بتقنعه انه هو اللي قتل توم ريدل الأب وعيلته، وقبل ما يمشي أخد من ايده خاتم مارفولو جونت ، اللي لبسه بعد كده في هوجورتس لفترة كتذكار من جريمته ، وكدليل على عراقة نسبه .

الصبح اكتشفت الخادمة الصغيرة اللي بتشتغل في بيت عيلة ريدل جثثهم الموجودة في البيت الكبير وعلى وشهم نظرة رعب مفزعة، ولأن لعنة القتل أفاداكدافرا ما بتسيبش أي أثر ظاهر على الجسم، فشلت شرطة العامة انها تعرف سبب الوفاة ، وبعد ما قبضوا على فرانك بيرس العامل اللي بيشتغل في بيت ريدل بتهمة قتلهم، أطلقوا صراحه لأنهم مالقوش أي دليل على ان موتهم كان بفعل فاعل أصلا ، وقالوا انهم ماتوا بسكتة قلبية وقفلوا القضية على كده.

لكن وزارة السحر لما وصلها خبر الجريمة دي، كانوا متأكدين انها جريمة سحرية، ومع اول خطوة من خطواتهم للتحري عن الموضوع، اكتشفوا إن ساحر قضى 3 سنين من حياته في أزكبان بتهمة مهاجمة العامة واستخدام السحر عليهم بيعيش قريب من البيت اللي حصلت فيه الجريمة، مش بس كده ده العامي اللي اتحبس بسبب مهاجمته كان هو نفسه واحد من الضحايا. لما راحوا يقبضوا على مورفن جونت ماقاومش نهائي، ولا اضطروا انهم يستجوبوه أو يستخدموا معاه أي طريقة سحرية زي قراءة الأفكار (الليجليمنسي) او جرعة الحقيقة (فيريتاسيروم)، أول ما قبضوا عليه اعترف بفخر شديد انه هو اللي قتل عيلة ريدل، وقالهم تفاصيل عن الجريمة مستحيل اي حد غير القاتل يعرفها، واعترف انه كان بيخطط لقتلهم من زمان بس كان مستني الفرصة المناسبة ، وسلم لهم عصايته كدليل، ولما فحصوها لقوا انها فعلا العصاية المستخدم في قتل عيلة ريدل، فتم الحكم على مورفن جونت بالسجن في أزكبان مدى الحياة، وفعلا فضل هناك لحد ما مات، بالرغم من ان دامبلدور في رحلته للبحث عن تاريخ فولديمورت، كان قدر يوصل لمورفن ويستخلص من دماغه ذكرى مقابلته لتوم ريدل ويقدمها للمحكمة السحرية كدليل براءة، لكن مورفن مات قبل ما المحكمة تاخد قرارها النهائي ببراءته.

بعد مارجع توم ريدل لمدرسة هوجورتس بفترة، استخدم جريمة قتله لأبوه وأجداده وحول خاتم مارفولو جونت لتاني هوركوركس، وحطه في صندوق دهبي ورجع تاني لكوخ جونت ودفنه هناك بعد ما حط تعاويذ دفاعية قوية جدا على الكوخ تمنع اي حد من دخوله او الاقتراب منه، وحط على الخاتم نفسه لعنة قاتلة ، في حالة ان اي ساحر قدر يتجاوز تعاويذه الدفاعية ويلاقي الخاتم ويحاول يلبسه، فاللعنة اللي على الخاتم هتتسبب في موته مباشرة، وده اللي حصل فعلا لما دامبلدور وصل لكوخ جونت وقدر يتخطى التعاويذ الدفاعية اللي عليه ويلاقي الخاتم، ولما شافه وعرف ان الحجر الأسود اللي فيه هو حجر البعث ، وده الشيء اللي ماعرفوش فولدمورت لما كان الخاتم معاه، لما عرف دامبلدور حقيقة الحجر ولبس الخاتم أصابته اللعنة القاتلة اللي حولت ايده لعضو ميت أسود وكانت هتقتقله في الحال لولا قوته كساحر عظيم وتدخل بروفيسور سنيب اللي عالجه مؤقتا ومنع انتشار اللعنة في جسمه ، لكنه قاله انه مش هيقدر يعالجه تماما وان اللعنة هتقضي عليه في ظرف سنة.

في السنتين الباقيين له في هوجورتس ، استمر توم ريدل في بحثه عن ممتلكات مؤسسي المدرسة ، وبعد ماعرف ان السيدة الرمادية شبح منزل ريفنكلو هي هيلينا ريفنكلو بنت روينا ريفنكلو مؤسسة المنزل، بدأ يتقرب منها ويتكلم معاها، وكعادته قدر يؤثر عليها بلباقته وحسن معاملته لحد ماوثقت فيه واعتبرته صديق وحكت له عن تاج امها روينا ريفنكلو اللي الأسطورة كانت بتقول ان اللي يلبسه بيديه حكمة وقوة عقلية، وعشان كده كان كتير من الناس بيدور عليه ويتمنى امتلاكه، لكن بعد موت روينا ماحدش شافه أبدا ولا قدر يتوصل لمكانه، وده لأنها في خلافها مع امها سرقت التاج وهربت على غابة في ألبانيا وخبته هناك في قلب شجرة عظيمة، سعاتها قرر توم ريدل ان أول حاجة هيعملها بعد ما يخلص دراسته في هوجورتس انه هيروح ألبانيا يجيب تاج روينا ريفنكلو.

حاول توم ريدل انه يلاقي اي حاجة تانية من ممتلكات مؤسسي هوجورتس في فترة وجوده في المدرسة لكنه ماقدرش يوصل لحاجة في الوقت ده.

استمر توم في تميزه الدراسي، وأخد لقب ( هيد بوي) أو رئيس الطلاب في سنته السابعة في هوجورتس، ونجح في كل امتحاناته بدرجات استثنائية لدرجة انه أخد وسام الاستحقاق السحري على اجتهاده وتميزه واتقانه.

بعد تخرجه مباشرة قدم توم ريدل طلب لمدير مدرسة هوجورتس بروفيسور ديبيت ، عشان يشتغل في المدرسة كمدرس لمادة الدفاع ضد فنون السحر الأسود، طبعا التدريس في حد ذاته ماكانش هو السبب اللي خلاه يتقدم بطلب تعيينه كمدرس في المدرسة، لكنه كان عايز يفضل في المدرسة أطول فترة ممكنة، لنها قبل كل شيء بيته الحقيقي والوحيد ، ولأنه كان شايف ان في أسرار كتير عن المدرسة وكنوزها السحرية لسة ما اكتشفهاش، وطبعا كمدرس هيكون له حرية اكبر ووصول أأمن وأسهل لأماكن كتير مجهولة من المدرسة، ده غير انه كان عنده أمل انه أثناء بحثه في المدرسة وأسرارها ممكن يوصل لحاجات تانية من ممكتلكات المؤسسين، والهم من ده كله، انه هيكون له علاقة مباشرة وتأثير كبير على الجيل الجديد من السحرة ، طلاب المدرسة، اللي ممكن يقدر بسهولة يؤثر عليهم ويضمهم لأتباعه ويكونوا هما نواة جيشه القادم اللي هيسيطر بيه على العالم السحري، وبتدريسه وتدريبه لهم هيضمن مع ولائهم تفوقهم وإتقانهم لفنون السحر الأسود، ويضمن انهم سحرة أقوياء ممكن يعتمد عليهم.

لكن أمل ده ماتحققش، بروفيسور ديبت مدير المدرسة كان بيحبه ومعجب بيه لكنه كان شايف انه لسة صغير جدا على انه يكون مدرس، ده غير ان دامبلدور اللي كان عنده احساس ان توم ريدل مش زي مابتظاهر خالص، قدر يقنع مدير هوجورتس برفض طلب توم للتدريس في المدرسة، وبالفعل اعتذر بروفيسور ديبيت لتوم ريدل عن قبول طلبه لصغر سنه، لكنه قاله انه ممكن يقدم طلب تاني للتدريس في هوجورتس بعد مايكبر شوية.

خرج توم ريدل من هوجورتس وسافر مباشرة لغابات ألبانيا وقدر يوصل للشجرة اللي فيها تاج روينا ريفنكلو، وبعد ما أخده قتل فلاح ألباني واستخدم جريمته في صنع تالت هوركوركس، ووضع جزء من روحه في تاج ريفنكلو.

بعد رجوعه من ألبانيا لبريطانيا، كان كل المجتمع السحري مستني من توم ريدل انه هيكون في مكانة مرموقة لأنه كان مشهور بعبقريته السحرية واجتهاده ولباقته، وبالفعل عُرض عليه أكتر من وظيفة في وزارة السحر ، لكنه فاجيء الكل برفض الوظايف المهمة دي كلها، واشتغل في وظيفة بائع في محل بيرجن وبيركس لبيع وشراء الأغراض السحرية، وخصوصا أغراض السحر الأسود والكنوز السحرية الأثرية.

وظيفة توم في المحل كانت إقناع السحرة إنهم يبيعوا ممتلكاتهم السحرية الثمينة اللي ورثوها عن أجدادهم واللي كانوا بيرفضوا التخلي عنها لقيمتها المعنوية والمادية، بأقل من سعرها كمان، وبالفعل توم كان ماهر جدا كعادته في الإقناع

وعن طريق شغله في محل بورجن وبيركس ، قدر يتعلم أكتر عن السحر الأسود والأدوات السحرية المستخدمة فيه والأثار السحرية الملعونة وغيرها ، وقدر كمان يدخل بيوت السحرة ويتعرف على كنوزهم السحرية.

من أكتر الساحرات اللي كان توم بيتردد على بيتها لإقناعها ببيع كنوزها السحرية، كانت ساحرة غنية عجوزة من نسل هيلجا هافلباف اسمها هيبزباه سميث

هيبزباه كانت بتمتلك كنوز سحرية لا تقدر بثمن ، ورثت بعضها واشترت البعض الآخر لحبها الشديد لاقتناء الأشياء الأثرية والقيمة، وكان السيد بوركس بيحاول معاها دايما انها تبيع له بعض من كنوزها لكنها كانت دايما ترفض ده، فكان بيبعت لها توم ريدل لقدرته العجيبة على الإقناع، ومع تردده الكتير عليها ووسامته ولباقته الشديدة، قدر يتقرب منها وتعامله كصديق مقرب وتطلعه على أسرارها وكنوزها اللي ماحدش يعرف انها تمتلكها أصلا.

وفي مرة من المرات، زارها توم عشان يقنعها تبيع درع معدني نادر من صنع الجوبلنز، لكنها في اليوم ده لسوء حظها قررت توريه أهم كنزين بتمتلكهم،كاس هيلجا هافلباف اللي ورثته عن اجدادها، و قلادة سلازار سليزرين اللي اشترتها من السيد بورك نفسه، واللي احنا عارفين طبعا انه اشتراها زمان من ميروب جونت أم توم ريدل ب 10 جاليون بس.توم كان شايف ان قلادة سليزرين دي لازم تكون ملكه بما انه وريث سلازار سليزرين الوحيد الباقي، ده غير انها كانت بالفعل ملك امه قبل ما ياخدها السيد بورك ببلاش تقريبا، وكمان هي وكاس هيلجا هافلباف من ممتلكات اتنين من مؤسسي هوجورتس ، واحنا عارفين طبعا انه من زمان بيدور على ممتلكات المؤسسين عشان يحولها لهوركوركس

بعد يومين بس من زيارة توم ريدل لها ماتت هيبزيباه سميث، توم ريدل قتلها بنوع نادر من السم وسرق القلادة والكاس ، وكعادته في اتهام غيره بجرايمه، زرع ذكرى مزيفة في دماغ قزمة المنزل هوكي اللي كانت بتخدم هيبزيباه ، بإنها هي اللي اتلخبطت وحطت السم على مشروب الكاكاو بدل السكر، ولأن القزمة اعترفت، ولأنها كانت عجوزة جدا ومش مركزة، وزارة السحر سلمت باعترافها واعتبرت انها قتلت سيدتها بالخطأ ومادورتش ورا الموضوع أكتر من كده. بعد موت هيبزيباه سميث، قدم توم ريدل استقالته من محل بوجين وبيركس واختفى تماما، حتى ان أهل هيبزيباه لما اكتشفوا اختفاء القلادة والكاس وشكوا انه يكون أخدهم ودوروا عليه، ماقدروش يوصلوا لمكانه ولا لأي معلومة عنه.

وفي وقت مش معروف بالضبط بعد الحادثة دي ، استخدم توم ريدل موت هيبزيباه سميث في صنع الهوركوركس الرابع، وقتل كمان مشرد من العامة لصنع الهوركوركس الخامس، واللي حفظهم طبعا في قلادة سليزرين  وكاس هافلباف.

اختفى توم ريدل تماما لمدة 10 سنين، ماحدش عارف كان فين بالضبط أو كان مع مين أو بيعمل ايه طول المدة دي، لكن الإشاعات بتقول انه بدأ في الفترة دي في التخلي عن اسم توم ريدل نهائيا، واستخدام لقب لورد فولدمورت بشكل صريح وعلني. سافر فولدمورت في جميع أنحاء أوروبا وآسيا، واتعلم فنون السحر الأسود حتى الأنواع النادرة والغير مستخدمة والصعبة منه، واتعرف على سحرة كتير من سحرة الظلام سيئي السمعة ، واللي أصبحوا بعد كده أعضاء في جيش الظلام التابع له، واللي سماهم أكلة الموت أو ديث ايترز.

انشغل فولدمورت كمان في الفترة دي بتجاربه السحرية المظلمة اللي بيسعى من خلالها لتعزيز قوته عن طريق الخضوع لبعض التغييرات الجسدية والعقلية اللي بالفعل خلته أقوى لكن أقل إنسانية ، وقال بنفسه عن الفترة دي انه دفع حدود السحر لأماكن ماحدش تجرأ للوصول لها قبله، بمعنى أوضح فولدمورت عمل كل حاجة تخليه أقوى ، استخدم السحر الأسود المعروف ، والتعاويذ المظلمة المتداولة ، وجرب حاجات كتير ماكانتش معروفة ولا حد قبله عملها من شدة ظلامها وشرها، كل ده عشان يحصل على القوة المطلقة ويضمن انه يكون أقوى ساحر في التاريخ السحري، وان ماحدش يقدر يهزمه أبدا أو يوقف خطته للتحكم في العالم السحري ومن بعده العالم كله.

مع كل التجارب السحرية المظلمة دي وكمان الخمس هوركوركسس اللي صنعهم بالفعل، كانت ملامحه بدأت تتغير، توم ريدل الوسيم ماعادش موجود ، صحيح لسة مابقاش فولدمورت الشبيه بالثعبان اللي هيكون عليه بعد كده، لكنه فقد كتير من انسانيته، عيونه أصبحت حمرا طول الوقت، وجلده أصبح شاحب زي التلج، وملامحه بقت مشوشة ، كأنه تمثال شمع مش متقن أكتر منه إنسان، وزيادة في فرض الغموض حوالين شكله وهيئته، بدأ في لبس عباءة سودا طويلة بتغطيه تماما من راسه لرجليه وطاقيتها بتخفي ملامحه وتضفي عليه هالة من الغموض وتزرع الخوف في قلب اللي يشوفه.

بعد 10 سنين رجع فولدمورت تاني لبريطانيا وطلب مقابلة دامبلدور اللي أصبح مدير مدرسة هوجورتس، وطلب تعيينه في المدرسة كمدرس لمادة الدفاع ضد فنون السحر الأسود.

بالرغم من ان دامبلدور كان عارف كل التجارب المظلمة اللي عملها فولدمورت في الفترة اللي فاتت، والقوة اللي وصل لها وآكلي الموت المجتمعين حواليه وكأنهم جيش صغير، الا انه ما خافش منه للحظة ، بل رفض حتى انه يناديه فولدمورت وفضل يناديه توم مع ان فولدمورت نفسه قاله انه خلاص ماعادش حد بيناديه بالاسم ده، وده كان تصريح من دامبلدور بالعداء من وجهة نظر فولدمورت، وتحقير له ولقوته وهالة الخوف اللي بيرسمها حوالين نفسه.

فولدمورت طلب يكون مدرس الدفاع ضد فنون الظلام، وقال لدامبلدور ان طلاب المدرسة أكيد هيتعلموا منه حاجات ماحدش تاني يقدر يعلمها لهم،وانه أكيد سمع عن الأشياء العظيمة اللي عملها في سفرياته  لكن دامبلدور قاله ان الأشياء اللي وصلته عنه مؤسفة . فولدمورت رد بجمود ( ان أكيد الأخبار اللي وصلته أكاذيب ناتجة عن الغيرة والحقد على أعماله العظيمة اللي مد فيها حدود السحر لأبعد كتيرمن اللي عمله أي ساحر من قبله) لكن دامبلدور اعترض على كلامه وقاله انه يمكن خبير في نوع من السحر لكنه جاهل تماما بأنواع تانية

وبخبث قال فولدمورت ( أنا مالقيتش في بحثي أي دليل على صحة آرائك القديمة بإن الحب أقوى أنواع السحر)

ولما قاله دامبلدور انك يمكن بتدور في المكان الغلط، كانت فرصة فولدمورت في طلب الزظيفة تاني فقاله ( تمام ، ومافيش مكان أدور فيه أحسن من هوجورتس، اسمح لي أرجع المدرسة تاني وأعلم الطلاب ، أكيد المدرسة هتستفيد من علمي ومواهبي)

دامبلدور واجه فولدمورت بالمعلومات اللي وصلته عن أكلة الموت اللي بيصاحبوه في سفره واللي كانوا منتظرينه في هوجسميد في الوقت ده، لكن فولدمورت حاول يبرر انهم اصدقاء اوفياء وبس

بعد أخد ورد قال دامبلدور ( ياريت نتكلم بصراحة ، انت ليه جاي تطلب وظيفة انت مش عايزها، انت عايز ترجع هوجورتس لكن مش عشان التدريس، انت عمرك ما اهتميت بالتدريس ولا حتى لما قدمت على نفس الوظيفة دي من 10 سنين، وعارف اني مش هعينك وبالرغم من كده قدمت طلب للوظيفة، ياريت تقول السبب الحقيقي لطلبك ده)

كان الغضب والغيظ مغطيين ملامح فولدمورت لدرجة انه كان بعيد الشبه تماما في اللحظة دي عن توم ريدل، وقال ( يعني انت مش موافق على تعييني في الوظيفة دي، خلاص مافيش اي كلام تاني ممكن نقوله) وساب دامبلدور وخرج.

بالرغم من رفض طلبه للتدريس في هوجورتس، لكن زيارة فولدمورت للمدرسة كان لها بعض المكاسب، لأنه قدر يخبي تاج روينا ريفنكلوا واللي كان واحد من الهوركوركسس اللي صنعهم في غرفة احتياجات هوجورتس، ولأنه ماكانش عنده الوقت الكافي، اكتفى فولدمورت بإنه يخبي التاج في الغرفة بدون وضع أي تعاويذ دفاعية عليه، ده غير انه لشدة غروره كان فاكر ان مافيش حد غيره عرف أسرار هوجورتس ولا اتوصل لغرفة الاحتياجات ، واللي كانت بتظهر له كغرفة لإخفاء الأشياء بس، وان التاج هيكون في أمان للأبد واستحالة ان أي حد ممكن يلاقي التاج او يلاقي الغرفة أصلا.

بعد فشله في الحصول على منصب مدرس في هوجورتس، رجع فولدمورت تاني لجمع السحرة حواليه عشان يمهد للتحكم في العالم السحري، وبدأ بعض السحرة يرفضوا الانضمام ليه ويواجهوه وبكده بدأت حرب السحرة الأولى واللي هنتكلم عنها بالتفصيل في الحلقة الجاية.