قصة حياة فولدمورت (6) أين اختفى، وكيف عاد؟

أين اختفى فولدمورت بعد هزيمته الأولى ، وكيف عاد؟

اتكلمنا في الحلقة اللي فاتت بالتفصيل، عن محاولة فولدمورت قتل هاري بوتر، لخوفه من تحقق النبوءة اللي تنبأت بها الأستاذة تريلاوني، بمولد طفل هيكون قادر على هزيمة اللورد المظلم نهائيا.

اختار فولدمورت ، هاري بوتر، واعتبره هو المقصود بالنبوءة، وراح لبيت عيلة بوتر في جودريكس هولو، وبالفعل نجح في قتل جيمس وليلي بوتر، لكن بسبب تضحية ليلي وسحر الحب، لما حاول يقتل هاري، ارتدت عليه تعويذة القتل ودمرت جسمه تماما ، وفضلت روحه هايمة بدون جسد، زي الطيف. وباختفاء فولدمورت انتهت حرب السحرة الأولى، واتقبض على كتير من أكلة الموت، وجزء منهم ادعى انه كان تحت تأثير تعويذة التحكم، ورجعوا تاني لمكانتهم السابقة في العالم السحري.

لكن يا ترى إيه اللي حصل لفولدمورت بالظبط؟

فولدمورت صنع 6 هوركوركس عشان يهرب من الموت، وتفضل روحه متعلقة بالدنيا مهما حصل لجسمه، لما تعويذة القتل ارتدت عليه، دمرت جسمه، وأصبح روح هائمة، طيف، أقل من شبح.  خاف فولدمورت من وصول كشافيين وزارة السحروأعضاء جماعة العنقاء لبيت عيلة بوتر، بعد ما انفجر وخبر موتهم انتشر، وساعتها كانوا هيقضوا عليه بمنتهى السهولة، لأنه فقد كل قواه السحرية، بفقدانه لجسده، وأصبح عاجز عن استخدام عصايته السحرية.

اتسللت روح فولدمورت بسرعة وقدرت توصل للغابة المظلمة في ألبانيا، نفس المكان اللي سافر له من سنين ولقى فيه تاج روينا ريفنكلو، اللي حوله بعد كده لهوركوركس. فولدمورت استخبى في الغابة دي في انتظار ان اكلة الموت يدوروا عليه ويوصلوا له، عشان يساعدوه على استعادة جسمه وقواه السحرية اللي فقدها كلها، ماعدا قوة واحدة بس، هي قوة الاستحواذ، واللي استخدمها في الاستحواذ على أجساد الحيوانات الموجودة في الغابة، وخصوصا التعابين، لكن استحواذه على اجساد الحيوانات كان بيسبب لها الضعف والمرض وبيخليها تموت بسرعة جدا، وبالتالي يضطر فولدمورت للانتقال لحيوان جديد. الاستحواذ على أجساد الحيوانات ماكانش مرضي للورد المظلم، لأنه فضل عاجز وضعيف وغير قادر على استخدام السحر لأن الحيوانات طبعا غير قادرة على ممارسة السحر أو الإمساك بالعصا السحرية، وفي نفس الوقت كان فولدمورت ما يقدرش يغامر ويخرج لعالم البشر، سواء السحرة أو العامة، ويستحوذ على جسم إنسان، لأنه كان عارف إن اكيد العالم السحري كله، ووزارة السحر وأعضاء جماعة العنقاء بيدوروا عليه وفي انتظار أي إشارة تدل على وجوده، وبالتالي ماكانش قدامه غير إنه ينتظر أكلة الموت يعثروا عليه.

أكلة الموت في الوقت ده كانوا على تلات أقسام، أول قسم كان شايف إن فولدمورت أكيد مات، وإن ده السبب الوحيد الممكن لاختفاؤه، والقسم التاني واللي كان منهم عليى سبيل المثال، لوسيوس مالفوي، وجويل وكراب وماكنير، كان بيشك إن فولدمورت ممكن يكون لسة حي، لكنه ضعيف، وهما أجبن من إنهم يدوروا عليه ويواجهوا العالم السحري، في حين إن فولدمورت مش قوي عشان يحميهم، وكان كل همهم الاندماج في العالم السحري تاني ونفي تهمة إنهم كانوا من أكلة الموت، لكن في نفس الوقت، عندهم استعداد يرجعوا تاني لجانب فولدمورت لو ظهر ورجع قوي زي الأول. القسم التالت، كان الأشد ولاء لفولدمورت، زي بيلاتريكس ورودلف ليسترانج، وبارتي كراوتش جونيور، ودول كانوا مؤمنين تماما إن استحالة اللورد المظلم يموت، وإنه أكيد موجود في مكان ومحتاج مساعدتهم عشان يرجع تاني أقوى من الأول، وبالفعل بدأوا يدوروا عليه، وعن أي معلومة توصلهم لمكانه، ولما شكوا ان كشافين وزارة السحر وأعضاء جماعة العنقاء فرانك وأليس لونجبوتم، ممكن يكون عندهم معلومات مخبينها عن مكان فولدمورت أو حالته، مسكوهم وعذبوهم بتعويذة كروشيتوس المحرمة، مرات كتيرة ومتواصلة، لدرجة انهم فقدوا عقلهم من شدة التعذيب وتم وضعهم في مستشفى سانت مونجوس للأمراض والإصابات السحرية لبقية حياتهم.

أما بيلاتريكس ورودولف ليسترانج وبارتي كراوتش الابن فتم القبض عليهم ومحاكمتهم، والحكم عليهم بالحبس في أزكبان مدى الحياة.  ولآخر لحظة من المحاكمة، وبعد نطق الحكم، كانوا بيعلنوا ولاؤهم لفولدمورت، وإنه أكيد هيرجع.

وبكده اضطر فولدمورت يفضل مستخبي حوالي 10 سنين في الغابة الألبانية، يستحوذ على أجساد الحيوانات، وينتظر أكلة الموت.

العالم السحري كمان كان زي أكلة الموت منقسم حوالين نهاية فولدمورت، فيه اللي كان شايف إن  فولدمورت خلاص انتهى ومش هيرجع تاني، وفيه اللي زي هاجريد، شايف إنه مامامتش لأنه مكانش إنسان كفاية عشان يموت زي البشر، وفيه دامبلدور،اللي كان عارف ومتأكد إن الحكاية لسة مانتهتش، وإن فولدمورت لسة موجود، هو بس أضعف من إنه يرجع دلوقتي، لكنه أكيد هيدور على طريقة يقدر يرجع بيها تاني، وبدأ ينشر الفكرة بين السحرة ويحذرهم، ويحاول كمان إنه يمنع فولدمورت من الوصول لأي شيء يساعده على الرجوع، زي مثلا حجر الفيلسوف، اللي كان بيستخدمه صديقه الكميائي نيكولاس فلاميل، لتصنيع إكسير الحياة اللي بيبعد شبح الموت عن أي شخص يشربه باستمرار.

أقنع دامبلدور نيكولاس فلاميل، إنه يحتفظ بحجر الفيلسوف في خزنة مشددة الحراسة جوة بنك جرينجوتس، عشان يحميه من فولدمورت وأتباعه.

في سنة 1990 الأستاذ كيورينيس كويريل، أستاذ دراسات العامة في هوجورتس، سنة أجازة من التدريس، السبب الظاهر للأجازة دي، كان إنه يكتسب خبرة عملية، ويتعرف على المخلوقات السحرية المختلفة ويستكشف العالم السحري، لكن السبب الحقيقي كان البحث عن فولدمورت. كويريل كان عايز يلاقي فولدمورت ويكون له السبق والمجد ويخلد إسمه في عالم السحرة، ويوقف الناس اللي كانت بتضحك على عصبيته وتأتأته عند حدهم، ده طبعا لو قدر يتغلب على فولدمورت اللي المفروض ضعيف دلوقتي ويسلمه لوزارة السحر، ولو ماقدرش يتغلب عليه، يبقى يتبعه ويتعلم منه أسرار وفنون السحر الأسود ويصبح ساحر قوي والكل يخاف منه ويحترمه.

كويريل كان ساحر كويس وذكي جدا، والدليل على كده، إنه قدر فعلا يوصل لمكان فولدمورت في ألبانيا . لكن مع ضعف فولدمورت، كان كويريل أضعف من إنه يتغلب عليه، واختار إنه يكون تابع له، ولما عرف فولدمورت إن كويريل بيشتغل مدرس في هوجورتس، قدر يقنعه إنه يلتصق بيه زي الكائن الطفيلي، ويرجع معاه لهوجورتس، ويساعده في الحصول على حجر الفيلسوف، وعشان يخبي وجه فولدمورت الملتصق براسه من الخلف، لبس كويريل عمامة ضخمة، وماكانش بيقلعها خالص، وقال إنها هدية من أمير إفريقي، مكافأة له لقضاءه على زومبي.

بس الناس كانت بتقول إنها مليانة توم عشان تطرد مصاص دماء قابله في ألبانيا وخايف يجي وراه هنا. بالرغم من ان كويريل كان طول عمره شخصية غريبة وغير واثقة في نفسها، لكن بعد عودته مع فولدمورت زادت غرابته وتاتأته وعصبيته، وانتشرت إشاعات عن مصاصي الدماء والساحرة الشريرة اللي قابلهم في سفريته، والمشاكل اللي وقع فيها، وازاي أثر كل ده عليه.

في سنة 1991، نفس السنة اللي دخل فيها هاري بوتر مدرسة هوجورتس، رجع فولدمورت مع كويريل لبريطانيا، وقبل بداية العام الدراسي بشهر، راح كويريل عشان يسرق حجر الفيلسوف من بنك جرينجوتس، لكن روبيوس هاجريد اللي كان في اليوم ده بيساعد هاري بوتر انه يشتري مستلزمات المدرسة، وصل قبل كويريل لجرينجوتس بأمر من دامبلدور، وأخد حجر الفيلسوف من الخزنة 713 في بنك جرينجوتس عشان يتم الاحتفاظ بيه في هوجورتس تحت عين دامبلدور، وتعاويذ وتدابير حماية قوية جدا اشترك في صنعها سنايب وماكونجال ودامبلدور، مع هاجريد اللي قدم لهم كلبه ذو الثلاث رؤوس عشان يحمي مدخل الغرفة اللي فيها الحجر.

مع فشل كويريل في الحصول على حجر الفيلسوف قبل نقله، دخل فولدمورت معاه لهوجورتس، وقدروا يعرفوا المكان اللي أخفى فيه دامبلدور حجر الفيلسوف، وبدأت محاولاتهم للحصول عليه ، ولقتل هاري بوتر.

أول محاولة للحصول على الحجر كانت يوم الهالوين، لما كويريل سمح لترول إنه يدخل المدرسة عشان الكل ينشغل بمطاردته، ويقدر هو يتسلل ويسرق الحجر، لكن سيفروس سنايب اللي كان بيشك في نوايا كويريل لسرقة الحجر، راقبه ومنعه من الوصول إليه.

حاول كويريل قتل هاري بوتر اكتر من مرة، أولهم لما لعن المكنسة السحرية بتاعته في أول ماتش كويديتش يلعبه، عشان يقع من عليها، لكن سنايب حاول ينقذه بالتعويذة المضادة، بس هرميوني جرانجر لما شافته بيحرك شفايفه وبيركز نظره على هاري، افتكرت انه هو اللي بيلعن المكنسة، وأشعلت النار في طرف عبايته عشان تمنعه، واتخبطت في كويريل فقطعت تركيزه البصري على هاري، وفشلت محاولة القتل الأولى.

تاني محاولة لقتل هاري كانت في الغابة المحرمة أثناء عقابه هو ودراكو مالفوي، وخروجهم مع هاجريد للغابة المحرمة للبحث عن قاتل حيوان وحيد القرن. كان استحواذ فولدمورت على جسم كويريل بيضعفه وكان هيؤدي إلى موته، وعشان كده أمره فولدمورت غنه يتغذي على دماء وحيد القرن اللي ليها قوى سحرية وشفائية قوية جدا وفريدة من نوعها، لكنها في نفس الوقت بتلعن اللي بيستخدمها من أول ماتلمس شفايفه. في ليلة دخول هاري ودراكو للغابة المحرمة، كان كويريل هناك بيتغذى على دم وحيد القرن، وكان على وشك يقتلهاري لولا أنقذه القنطور فيرنز.

قدر كويريل إنه يخدع هاجريد ويعرف منه الطريقة الوحيدة للسيطرة على فلافي، الكلب ذو الثلاث رؤوس، اللي بيحمي حجر الفيلسوف، وهي الموسيقى لأنها بتخليه يهدى وينام.

قبل نهاية العام الدراسي بأيام قليلة، بعت كويريل بومة بجواب مزيف لدامبلدور، يقوله إنه مطلوب حالا في لندن ، في وزارة السحر، وبعد رحيل دامبلدور، تسلل للممر الممنوع من الدور الثالث، وسحر الآلة الموسيقية  فعزفت الموسيقى بدون توقف، وفضل فلافي نايم طول ما هي بتعزف فلافي، وتخطى كويريل  دفاعات ماكونجال وسنايب ووصل للحجرة اللي فيها مراية اريسيد.

وقف قدام المراية وشاف نفسه ماسك الحجر في اديه، لكنه ماعرفش يوصله ازاي. في الوقت ده وصل هاري بوتر اللي كان فاكر انه بيحمي حجر الفيلسوف من سنايب،وذهل لما عرف ان كويريل هو اللي بيسعى لسرقة الحجر وان هو اللي حاول قتله أكتر من مرة.

أمر فولدمورت كويريل إنه يوقف هاري قدام مراية اريسيد، وشاف هاري نفسه ماسك الحجر وبعدين حس بيه جوة جيبه فعلا، لأن آخر دفاعات دامبلدور كانت إن  الشخص اللي بيدور على الحجر لكنه مش هيستخدمه، هو بس اللي هيلاقيه. كذب هاري على كويريل في اللي شافه في المراية، لكن فولدمورت عرف إنه بيكذب وأمر كويريل غنه يشيل العمة ويخليه يواجه هاري، وحاول يغريه عشان يسلم الحجر لكن هاري رفض. حاول كويريل يمسكه وياخد منه الحجر بالعافية، لكن اول ما هاري لمسه، ايده اتحرقت، فانتهز هاري الفرصة ومسك وش كويريل بإيديه الاتنين وبدأ كويريل في التحول لتراب، لكن فولدمورت قدر يخرج من جسمه قبل ما يموت، ورجع تاني طيف ضعيف جدا، يمكن أضعف من الأول، ورجع يعيش في غابات ألبانيا، ويستحوذ على أجساد الحيوانات، في انتظار إن تابع مطيع تاني يقدر يوصل له.

في السنة التانية من وجود هاري بوتر في هوجورتس، كان فولدمورت هيرجع تاني لجسمه المادي عن طريق مذكرات توم ريدل اللي خباها لوسيوس مالفوي في كتب جيني ويزلي، واللي قدرت تسيطر على جيني وتخليها تفتح غرفة الأسرار وتطلق وحش البازيليسك، واتكلمنا بالتفصيل قبل كده في حلقة الهوركوركس عن فتح غرفة الأسرار ، والبازيليسك ومذكرات توم ريدل، وازاي قدر هاري بوتر يقتل البازيليسك بسيف جودريك جريفندور ويطعن المذكرات بناب البازيليسك ويدمرها ويمنع رجوع فولدمورت وينقذ جيني ويزلي من الموت

في السنة التالتة لهاري في هوجورتس، ماحصلش أي محاولات لعودة فولدمورت. اللورد المظلم كان لسة مستخبي في غابات ألبانيا، وحيد وضعيف، وماحدش من اكلة الموت بيدور عليه. لكن حصل حاجة مهمة جدا في السنة دي هيكون لها تأثير كبير ومباشر على عودة من لا ينبغي ذكر اسمه لقوته الكاملة.

زي ما قلنا قبل كده في حلقة النبوءة وسقوط فولدمورت، سيريوس بلاك كان متهم بخيانة عيلة بوتر وتسليمهم لفولدمورت، وقتل صديقهم بيتر بيتجرو مع 12 من العامة، ومحكوم عليه بالسجن مدى الحياة في أزكبان، بس الحقيقة ان بيتر بيتجرو كان هو الخائن. ولأنه أنيميجوس غير مسجل، وماحدش غير جيمس وسيريوي ولوبين، يعرف انه بيقدر يتحول لفار، فهو اتحول لفار وقطع صابعه وزيف موته عشان يبعد عنه شبهة الخيانة، ويهرب كمان من أكلة الموت اللي كانوا شايفين إنه خانهم وانه السبب في هزيمة فولدمورت.

عاش بيتر بتيجرو على شكل فار لمدة 12 سنة، كحيوان أليف لبيرسي ويزلي، ومن بعده رون ويزلي، وأطلقوا عليه اسم سكابرز. لكن نقطة تحول الأحداث كانت رحلة لمصر راحتها عيلة ويزلي واتصوروا صورة جماعية ظهر فيها سكابرز، ونزلت الصورة في جريدة المتنبىء اليومي، اللي أخدها معاه وزير السحر كورنيليوس فادج، في جولته التفقدية لسجن أزكبان، ولما طلبها منه سيريوس بلاك اداهاله. سيريوس بلاك شاف صورة عيلة ويزلي، وعرف سكابرز في الحال، ولأنه هو كمان أنيميجوس غير مسجل، بيتحول لكلب، قدر بتحوله وجسمه الضعيف من سوء التغذية إنه يتسلل من بين قضبان زنزانته ويهرب من سجن أزكبان، ويبقى أول حالة مسجلة  في التاريخ لهروب سجين من أزكبان.

سيريوس قدر بعد محاولات كتير انه يقبض على بيتر بيتجرو في شكل الفار، لكن هاري بوتر منعه من قتله، وكان عايز يسلمه لوزارة السحر عشان يتحاكم، وده اداه فرصة ذهبية للهروب تاني والاختفاء تماما عن العيون.

بعد هروب بيتجرو أصبحت حياته مهددة من كل اتجاه، وخصوصا في وجود سيريوس اللي أكيد هيدور عليه تاني ومش هيسيبه. ماكانش قدامه غير طريقة واحدة للنجاة، إنه يلاقي فولدمورت ويساعده يرجع تاني عشان يضمن حمايته.

سافر بيتر بيتيجرو في شكل الانيميجوس، ولما وصل لغابات ألبانيا، عرف من الفيران اللي عايشين هناك ان في مكان في الغابة عايش فيه ظل أسود، بيستحوذ على الحيوانات ويقتلها، وفكر إن ده ممكن يكون فولدمورت، فقرر يروح للمكان ده. في طريقه للمكان الموجود فيه اللورد المظلم، وقف بيتر بيتجرو بشكله البشري عند نزل صغير عشان ياكل ويرتاح شوية من تعب السفر، وهناك قابل بيرثا جوركينز الموظفة في وزارة السحر، واللي كانت عارفة بيتر كويس، وزيها زي كل العالم السحري عارفة ان سيريوس بلاك قتله.

أقنعها بيتر انها تتمشى معاه شوية في الغابة القريبة عشان يشرح لها الحكاية. وهناك اتغلب عليها وأخدها معاه وقدمها هدية لفولدمورت اللي مارس عليها قدرته على الليجليمنسي، عشان يطلع منها كل المعلومات المهمة بصفتها موظفة في وزارة السحر، لكنه اتفاجيء ان في حد ألقى عليها سحر ذاكرة قوي جدا لإخفاء جزء من ذاكرتها. نجح فولدمورت في كسر سحر الذاكرة وعرف ان اللي عمله بارتي كراوتش الأب عشان يمنعها من إفشاء سر خطير جدا بيهدد مستقبله وحياته كلها.

قلنا قبل شوية ان بارتي كراوتش الابن كان من أكلة الموت شديدي الولاء لفولدمورت، وبعد اختفاؤه، حاول مع بيلاتريكس ورودلف لسترانج انهم يلاقوه وعذبوا اليس وفراك لونجبوتم لحد الجنون، واتقدموا للمحاكمة.

 بارتي كراوتش الأب كان رئيس المحكمة اللي بتحاكم ابنه، لكنه كان ضد فولدمورت وبيحارب السحر الأسود وحكم على ابنه بالسجن في أزكبان مدى الحياة.

 والدة بارتي الابن ماستحملتش اللي حصل وتعبت جدا، وقبل ماتموت طلبت من زوجها انه ياخدها تشوف ابنها في أزكبان واتفقت معاه انها تتنكر في شكل بارتي الابن عن طريق وصفة البوليجوس وتفضل مكانه في أزكبان وهو يرجع مع أبوه للبيت. وبالفعل قدر بارتي كراوتش الاب بمساعدة زوجته انه يهرب ابنه من أزكبان، وبعد فترة قصيرة ماتت الزوجة في السجن وافتكر العالم السحري ان اللي مات هو بارتي الابن، وزيف بارتي الأب حادثة موت لزوجته كمان عشان يبرر اختفاءها. لسنين طويلة حبس بارتي كراوتش الأب ابنه في البيت تحت تأثير تعويذة التحكم امبريوس كيرس، وأجبره يلبس عباية تخفي بشكل دائم ، وسابه تحت رعاية قزمة المنزل وينكي.

في مرة من المرات راحت بيرثا جوركينز لبيت بارتي كراوتش الأب عشان تمضي بعض الأوراق الخاصة بالشغل في وزارة السحر، واكتشفت وجود بارتي الابن، فقام بارتي كراوتش الأب بإلقاء سحر ذاكرة قوي جدا عليها عشانيمنعها من إفشاء سره.  

ده كان السر الخطير اللي عرفه فولدمورت لما كسر تعويذة الذاكرة عن عقل بيرثا جوركينز. وعرف منها كمان ان دورة السحر الثلاثية هتقام السنة دي في هوجورتس، وان دامبلدور أقنع الكشاف السابق اليستور مودي المشهور باسم ماد اي مودي، بإنه يدرس مادة الدفاع ضد فنون السحر الأسود في هوجورتس.

بعد ما عرف فولدمورت كل المعلومات اللي بتملكها بيرثا جوركنز ، كان عقلها وجسمها أصابهم ضرر كبير جدا من التعاويذ اللي استخدمها فولدمورت عليها فقتلها فولدمورت، واستخدم حادثة قتلها لتحويل ثعبانه ناجيني للهوركوركس الأخير.

فولدمورت كان متأكد إن دامبلدور أكيد حطم حجر الفيلسوف عشان يقضي على أي فرصة له في الرجوعوالحصول على جسم جديد، فقرر إنه يلجأ لوصفة قديمة وقوية جدا من وصفات السحر الأسود، عشان يصنع جسمه الجديد، لكن الوصفة دي كانت محتاجة مكونات صعبة جدا مش موجودة غير في بريطانيا.

الوصفة كانت محتاجة عضمة من الأب، ودم من العدو يتاخد بالقوة، ولحم من الخادم، يتقدم كتضحية برضاه.

طبعا لحم الخادم هيقدمه بيتر بسهولة، لكن عضم الأب هناك في قبره في ليتل هانجليتون في بريطانيا. وبالرغم من إن دم العدو كان ممكن يكون من أي عدو من أعداء فولدمورت الكتير جدا، وبالفعل عرض عليه بيتر إنه يقبض على أي ساحر من أعداؤه وياخدو دمه، لكن فولدمورت رفض وأصر إن الدم يكون دم هاري بوتر بالذات.

لكن ليه هاري بوتر بالذات، ليه بيصعبها على نفسه أوي كده. فولدمورت كان عايز ينهي أسطورة هاري بوتر الطفل اللي نجا من الموت، وكان السبب في هزيمة سيد الظلام، ويثبت للعالم السحري إن دي كانت مجرد صدفة ومافيش حد أبدا أقوى منه. وكان كمان عايز يستفيد من سحر الحماية اللي في دم هاري، ويتشارك معاه فيه ويكسر تعويذة الحماية اللي بتمنعه من لمس هاري أو إنه يسبب له أي ضرر،  طبعا لما دم هاري يجري في عروقه هيقدر يلمسه من غير ما يحصل له أي ضرر زي ما حصل لكويريل قبل كده.

لكن عشان ده كله يحصل، لازم فولدمورت يرجع بريطانيا الأول.

بيتر بيتجرو ساعد فولدمورت في صنع جسد بدائي صغير باستخدام السحر الأسود ودم اليونيكورن وسم ناجيني، عشان روحه تسكنه بدل الاستحواذ على أجسام الحيوانات، ويقدر من خلاله يمارس بعض من سحره اللي ماكانش بيقدر يمارسه وهو في أجسام الحيوانات. لكنه كان جسد ضعيف جدا محتاج المساعدة في كل خطوة، ومحتاج ان بيتر ياخد من سم ناجيني ودم اليونيكورن ويغذيه بيهم يوميا عشان يحافظ على وجود الجسم ده.

فضل فولدمورت صناعة الجسد الضعيف ده على انه يستحوذ على جسم بيتر ويتنقل من خلاله، لأن العالم السحري كله يعرف ان بيتر مات، وظهوره هيجذب الانتباه وممكن يتسبب في فشل كل خططه. أخد بيتر بيتجرو فولدمورت ورجعوا لبريطانيا تاني، واستقروا في بيت عيلة ريدل القديم في ليتل هانجليتون، وبدأوا في تنفيذ خطتهم لعودة فولدمورت لجسمه من جديد.