ماهو الهوركوركس؟ وكيف تحول فولدمورت لشكله الشبيه بالثعبان؟

 ماهو الهوركوركس

في الحلقة اللي فاتت اتكلمنا عن دخول توم ريدل لهوجورتس وحياته فيها كطالب مجتهد محبوب، ووصلنا لحد ما فتح غرفة الأسرار، وخرج وحش البازيليسك اللي قتل موننج ميرتل، وساعده يحول مذكراته لأول هوركوركس من مجموع 7 ،هيصنعهم على مدار سنين حياته.

بس يعني ايه هوركوركس، وايه هي قواه السحرية، اللي خلت توم ريدل يصنع منه 7، حولوه من توم ريدل لفولديمورت.

توم كان مهتم جدا بالسحر الأسود ، وبيقرا كتير في القسم المحظور في المكتبة، وفي مرة وهو بيقرا في كتاب أسرار أبشع فنون السحر الأسود، لقى معلومات عن تعويذة، ممكن تخلي الساحر يحفظ جزء من روحه في شيء معين، عشان يقدر يحمي نفسه من الموت.

الشيء ده هو الهوركوركس

ولأن الهوركوركس من أشد أنواع السحر الأسود ظلاما، ماكانش معروف أوي في العالم السحري، عدد قليل اوي من السحرة كانوا يعرفوا يعني ايه هوركوركس، ومايعرفوش عنه غير معلومات بسيطة وسطحية، حتى أشهر الكتب اللي اتكلمت عن فنون السحر الأسود، ماكانش فيها ذكر للهوركوركس، والكتب اللي ذكرته مادخلتش في تفاصيل، اكتفت بإنها تقول انه شيء فظيع، المفروض ما نتكلمش عنه، وبالطبع كان الكلام عنه في هوجورتس ممنوع ، وكمان ممنوع اقتناء أي كتب بتشرح الهوركوركس، الكتاب الوحيد اللي كان فيه ذكر للهوركوركس وطريقة صنعه بشكل شبه مفصل، كان كتاب أسرار أبشع فنون السحر الأسود ، اللي بالصدفة لقاه توم في القسم المحظور من مكتبة هوجورتس ، واللي أخده دامبلدور بعد ما بقى مدير المدرسة، واحتفظ بيه في مكتبه بعيد عن الطلاب.

بس للأسف ده حصل بعد وقت طويل من وجود توم ريدل في هوجورتس، وقرائته للكتاب.

الكتاب كان بيقول، عشان يقدر الساحر يقسم روحه ويحفظ جزء منها في الهوركروكس، لازم يقوم بأفظع جريمة ممكن يرتكبها انسان، لازم يقتل.

المعلومات اللي كانت في الكتاب ماكانتش كافية لتوم، كان عايز يعرف أكتر ، كان عايز يعرف ازاي يقدر يقسم روحه، بس مش لجزئين ، كان عايز يقسم روحه لسبع أجزاء، كان عايز يضمن انه يهرب من الموت للأبد، ويوصل للخلود، وان لو اي واحد من الهوركوركسات دي اتحطم، يبقى فيه غيره يحميه من الموت، ده غير انه كان مؤمن بالقوة السحرية للرقم 7، وعنده اعتقاد ان لو قسم روحه ل7 أجزاء ، ده هيديه قوة أكبر ويخليه لا يقهر.

توم لجأ لأستاذه هوراس سلجهورن رئيس منزل سليزرين، اللي كان بيحبه جدا وبيقربه منه، وبيتكلم معاه زي الأصحاب،واللي كان برده طيب وصافي النية، وشايف توم ريدل ملاك، وقدر يعرف منه، انه من الممكن تقسيم الروح لأكتر من قسم، نظريا طبعا، وبالرغم من تحذير سلجهورن، ورعبه من بشاعة مجرد الكلام عن الهوركوركس، الا ان ده ماغيرش رأي توم أبدا.

القتل فعل شنيع بيسيب أثر في روح القاتل، أثر من شدته بيؤدي لتقسيمها

بعد الساحر ما يقتل، وجزء من روحه يتكسر، بيعمل تعويذة تنقل الجزء المكسور من روحه للهوركوركس، وبيقوم بفعل بشع، من شدة بشاعته احتفظت بيه رولينج،  ورفضت تقولنا ايه هو، تفتكروا ممكن يكون ايه؟

بعد ما تتم عملية صنع الهوركوركس بيخفيه الساحر في مكان سري  وبيحمي المكان بالتعاويذ الدفاعية واللعنات، اللي تضمن منع أي ساحر تاني من الوصول إليه، وكمان بيحمي الهوركوركس نفسه باللعنات اللي ممكن تقضي على أي حد يحاول يحطمه.

الهوركوركس ممكن يكون جماد، وممكن يكون كائن حي، بس الجماد أفضل، لأن حفظه وتأمينه أسهل، وتدميره طبعا أصعب، أما الكائن الحي فصعب الاحتفاظ بيه بعيد عن الخطر، ده غير ان له عقل وتفكير، وإرادة مستقلة ممكن تأثر بالسلب على الروح المحفوظة فيه.

ولأن الهوركوركس جزء من روح الساحر، فهو بيحتوي على ذاكرة وطباع وشخصية الساحر في الوقت اللي صنعه فيه، ولو تجسد بياخد نفس شكله في الوقت ده، زي ما شفنا توم ريدل لما خرج من مذكراته في الجزء التاني (حجرة الأسرار) كان الهوركوركس واخد شكل توم ريدل في عمر السادسة عشر ، وقت ما تم صنعه، وعنده ذكرياته وصفاته وشخصيته.

تدمير الهوركوركس بيحتاج سحر قوي جدا، مش أي ساحر يقدر عليه، مستحيل تكسره أو تحرقه أو تحطمه بالطرق العادية، أو التعاويذ السحرية المعروفة، يلزمك شيء أقوى بكتير، شيء زي سم البازيليسك ، أو النار الشيطانية، ، أو سيف جريفندور، وده في حالة الهوركوركس الصلبة، لكن الهوركوركس لو كان كائن حي فلازم نستخدم تعويذة القتل افاداكيدافرا، أو نفصل راسه عن جسده بشكل كامل، بأداة قوية زي سيف جريفندور المشبع بسم البازيليسك.

سيف جريفندور هنا ماكانتش قوته المباشرة، هي السبب في تدمير الهوركوركس، لكن قدرته على امتصاص أي مادة بتلمسه، وبتتنقل له  قدراتها اللي بتضيف له قدرات جديدة ، فلما استخدمه هاري في قتل البازيليسك ، السيف تشبع من سمه، وامتصه واكتسب منه القدرة على تحطيم الهوركوركس.

وعشان الهوركوركس يتدمر، وجزء الروح اللي فيه يموت ، لازم الشيء اللي بيحتويه يحصله ضرر غير قابل للإصلاح أبدا، لا بالطرق العادية ولا السحرية. ولما يتدمر بشكل كامل ونهائي، بينزف كأنه كائن حي، ممكن ينزف حبر زي ما حصل مع المذكرات، أو سائل أسود لزج يشبه الدم، زي ما حصل مع تاج روينا ريفنكلو، ومع موت الروح اللي جواه بيطلق صرخة قوية مدوية.

طيب هل الساحر صاحب الهوركوركس ده بيحس بتدميره وموت  جزء من روحه؟ لأن مافيش حد جرب الهوركوركس عشان يوصف لنا ، فصعب نتأكد من ده، وفي حالة فولدمورت فهو ماحسش بتدمير الهوركوركس ، لأن روحه اتقسمت لأجزاء كتير، وعاش منفصل عن الأجزاء دي مدة طويلة جدا، ففقد الإحساس بيها والاتصال معاها ، وده واضح في الكتب، وان كان الفيلم صور لحظة ألم بيحس بيها فولدمورت وحتى هاري وناجيني عند تحطيم واحد من الهوركوركسات، زي التاج والكاس، وكمان لحظة قتل فولدمورت لهاري في الغابة ، فولدمورت فقد الوعي لثواني.

سؤال ناس كتير بتسأله، إذا كان سم البازيلسيك قادر على تحطيم الهوركوركس، ليه هاري ماماتش أو جزء روح فولدمورت اللي جواه اتدمر، لما ناب البازيليسك اتغرس في دراعه، والسم مشي في دمه؟

لأن هاري كان هوركوركس حي مش جامد ، لما أصابه سم البازيليسك، لحقه فوكيس قبل ما يموت ووقف تأثير السم، وعالجه بدموعه اللي ليها قدرة شفاء سحرية قوية جدا تقدر على علاج كل حاجة تقريبا، وبالتالي هاري نجا من الموت ونجا معاه الجزء الموجود جواه من روح فولدمورت، لأن الوعاء اللي بيحميها ماتمش تدميره بشكل كامل غير قابل للإصلاح، وده شرط لتدمير الروح.

لما الساحر اللي عمل الهوركوركس ده بيتعرض لحادث مميت، جسمه بس اللي بيتدمر ، لكن لأن الهوركوركس فيه جزء من روحه، بيفضل متعلق بالدنيا ، روح هايمة، طيف، أقل من شبح، لحد ما يقدر بتعويذة تانية من السحر الأسود برده يصنع جسم جديد تسكنه روحه.

لكن ليه فولدمورت في سعيه للخلود والهروب من الموت فضل استخدام الهوركوركس على بشاعته ومافكرش مثلا في اكسير الحياة اللي بينتجه حجر الفيلسوف؟

فولدمورت كان متكبر ومغرور ومابيحبش يعتمد على أي شيء أو أي حد غير نفسه وذاته بس، الهوركوركس هو جزء من روحه يعني امتداد لذاته وشخصه، ومع غروره كان شايف انه محمي تماما وبأمان بسبب تعاويذه الدفاعية واختياره لأماكن إخفاء صعب أي حد يكتشفها، وعشان يضمن استمرار خلوده، عمل أكتر من هوركوركس، عشان لو واحد تم اكتشافه أو تدميره بالصدفة طبعا، يبقى الباقي موجودين وضامنين استمراره في الهروب من الموت، لكن حجر الفيلسوف لازم يكون في مكان قريب منه، لأنه لازم يستهلك اكسير الحياة بشكل مستمر ومتكرر، وده يخليه عرضة للسرقة، ويجبر فولدمورت انه يكون معتمد على تناول الاكسير والا هيموت، وده شيء مايقدرش يقبله.

تاريخ السحر مافيهوش غير ساحر واحد بس، معروف انه نجح في صنع هوركوركس واحد بس، الساحر اليوناني القديم هيربو ذا فول.

مافيش ساحر قبل كده حاول انه يقسم روحه لأكتر من جزء، ويصنع أكتر من هوركوركس، كانوا خايفين، وشايفين ان النتيجة ممكن تكون كارثية، ده غير ان السحر المستخدم في صنع الهوركوركس، وطريقة صنعه كانت أبشع من ان حد يعملها مرة واحدة، يبقى ازاي هيكررها ويصنع أكتر من واحد، والحالة اللي بتكون عليها روح الساحر بعد تدمير جسمه ، حالة أسوء من الموت نفسه، أي انسان سوي يرفض يعيشها، كمان السحر المستخدم في صنع جسد جديد للساحر، لا يقل بشاعة وإظلام عن سحر صنع الهوركوركس نفسه.

فولدمورت وصل لأقصى حد في تقسيم روحه وصنع الهوركوروكس، وده معناه ان في حدود لتقسيم الروح، بيصبح التقسيم بعدها خطر جدا، وبتصبح الروح الباقية في جسم الساحر مشوهة وغير مستقرة، ومعرضة للانقسام بدون إرادة الساحر.

فولدمورت كان عارف ده ، ولذلك كان عايزيعمل ستة هوركوركس بس عشان مع روحه الموجودة في جسمه يكونوا سبعة، الرقم السحري اللي هيزود قوته ويجعله منيع ضد الموت، وده فعلا اللي حصل لما قسم روحه لست أجزاء وصنع المذكرات والخاتم والقلادة والكاس والتاج،وكان لسة هيصنع هوركوركس كمان عشان تكون روحه سبع أجزاء،لكن قبل ما يلحق يصنع الهوركوركس السادس أصبحت روحه الموجودة في جسمه غير مستقرة ، ولما حاول يقتل هاري بوتر وانقلبت تعويذة القتل عليه، جزء من روحه اتكسر بدون قصده ولا ترتيبه، واحتمى بالكائن الحي الوحيد الموجود في المكان(هاري بوتر)، ولأنه ما عرفش ان جزء من روحه بقى جوة هاري، لما رجع تاني لجسمه حول تعبانه ناجيني لهوركوركس، وكان فاكر انهم كده بقوا ستة ، ولأنه عارف ان في حدود لتقسيم الروح، ما حاولش يعمل هوركوركس جديد، حتى بعد ماعرف بتدمير بعض الهوركوركسات اللي صنعها قبل كده.

لكن هاري بوتر ماكانش هوركوركس بالمعنى الكامل للكلمة، تقسيم روح فلدمورت لحظة ارتداد تعويذة القتل عليه ، كان فعل لا إرادي، ناتج عن عدم استقرار روح فلدمورت الموجودة في جسده، يعني فلدمورت ما قصدش انه يصنع الهوركوركس ده ، ولا عمل التعويذة اللازمة لحفظ روحه في جسد هاري، عشان كده هاري ماكانش هوركوركس حقيقي ، ماكانش شرير ومظلم زي باقي الهوركوركسس، لأن فولدمورت ما كملش علية صنعه ولا وضع عليه تعاويذ دفاعية مظلمة عشان يحميه، جزء روح فولدمورت اللي جواه ماقدرش يلوث روحه ويدفعه للجانب المظلم، يمكن لأنه كائن حي له إرادة وعقل وروح خيرة هتحارب لو اي شيء حاول التأثير عليها، ويمكن عشان قوة سحر الحب والتضحية اللي كان سبب في نجاته ، ويمكن عشان الحب والتوجيه اللي أحاطه بيه أصدقاؤه ومدرسينه وكتير من السحرة الطيبين، أو كل دول مع بعض.

بس تأثير الروح ده كان بيظهر بشكل ضعيف  في بعض المواقف ،منها احساس قبعة التصنيف بأثر روح فولدمورت واقتناعها التام انه بينتمي لسليزرين ، وشك هاري نفسه في بعض الأوقات انه كان المفروض يدخل سليزرين مش جريفندور.

من الأوقات اللي كانت روح فولدمورت قوية وليها حضور جوا هاري ، كان بعد موت سيدريك ورجوع فولدمورت، هاري كان بيمر بوقت صعب جدا والعالم السحري كله تقريبا كان ضده ، في الوقت ده بدأت الروح زي عادة الهوركوركس تتغذى على  كل الحزن والخوف والمشاعر السلبية دي، وتستمد منها القوة لدرجة ربط عقل هاري وفولدورت وقراءة كل واحد لأفكار التاني وقدرته انه يشوف بعينيه أحيانا، بس ده كان اتصال مؤقت قدر هاري يتغلب عليه بمساعدة اللي حواليه طبعا، لكن بشكل أكبر لعدم استقرار فولدمورت والألم الرهيب اللي حسه لما حاول يستحوز على هاري، ده غير انه كان بيفقد قدرته على منع هاري من دخول عقله، وماكانش فاهم الرابط اللي بينهم ،لأنه طبعا ماكانش يعرف ان في جزء من روحه بيعيش جوا هاري.

كان في رابط تاني بين فولدمورت والجزء من روحه الموجود في هاري، رابط ضعيف لكنه أكثر استمرارا من اي رابط تاني، الرابط ده كان الألم اللي بيشعر بيه هاري في الندبة الموجودة في جبهته كل ما يكون فولدمورت قريب منه، واللي بيزيد مع ازدياد قوة فولدمورت.

الألم ده وصفته المؤلفة جي كي رولنج، انه كان محاولة الجزء الموجود من روح فولدمورت في جسم هاري ، انه يخرج من نفس المكان اللي دخل منه، اللي هو الندبة، ويرجع تاني يجتمع بالجزء الرئيسي من الروح في جسد فولدمورت.

الهوركوركس كغرض سحري له قوى سحرية متعددة، أهمها طبعا حماية الجزء المحفوظ فيه من روح الساحر،عشان يضمن له الخلود، أو على الأقل البقاء على قيد الحياة، طول ما في ولو هوركوركس واحد محفوظ بأمان، ولشدة أهمية الهوركوركس، بيتخذ الساحر إجراءات مشددة لحمايته وإخفائه، وبالتالي قدراته ماتمش استكشافها او تجربتها بشكل كامل، لكن بعضها قدرنا نعرفه من هوركوركسات فولدمورت، اللي كانت على اتصال بالعالم الخارجي.

أهم قدرات الهوركوركس انه بيقدر يفكر ويتفاعل، وبيكون له تأثير سيء جدا على اللي بيكون قريب منهم لفترة طويلة، زي ما شفنا اللي حصل لهاري ورون وهيرميوني، لما لبسوا قلادة سالازار سليزرين، فبدأوا بلإحساس بالحزن والاكتئاب والاحباط ، واستحوذ عليهم الشك ، وكل مازادت مدة حملهم للقلادة، كل ما أثرت فيهم أكتر، وأظهرت أسوء ما فيهم ، ولأن رون كان أكتر واحد لبسها ، أثرت عليه بشكل أكبر، خلاه يسيب هاري وهرميوني ويمشي، بعد ما شك انهم بيتآمروا عليه ومش عايزينه معاهم، ومش مقدرين خوفه على عيلته.

لكن أول ما الشخص بيبعد عن الهوركوركس، بينتهي تأثيره وبيرجع لحالته الطبيعية، زي برده ما حصل لرون أول ما قلع القلادة وبعد عنهم شوية، لكنه للأسف ماقدرش يرجع لهم، بسبب سحر الإخفاء اللي كانت عملاه هيرميوني، عشان يخبيهم من أعوان فولدمورت.

الهوركوركس كمان كان بيمنعهم، من انهم يقدروا يقوموا بسحر الباترونس، لأن روح فولدمورت المظلمة الموجودة جواه، كانت بتزود أفكارهم المؤلمة والمحبطة، وتمنعهم من التفكير في أي ذكرى سعيدة.

أما لو كان الشخص اللي على اتصال مباشر مع الهوركوركس، ساحر ظلام شرير أصلا، فالهوركوركس بيزود قوته ، زي ما حصل مع دولوريس أمبريدج، لما لبست قلادة سليزرين، وكانت قادرة في نفس الوقت، إنها تصنع باترونس مكتمل لفترة طويلة جدا، وخلينا نقول كمان، ان تعذيب الناس والحكم عليهم بالحبس في أزكبان وساعات بالموت، ده كان أكتر شيء سعيد بتعمله دولوريس في حياتها، عشان كده كان البتروناس بتاعها قوي جدا في الوقت ده.

لكن لو الشخص المتصل بالهوركوركس ضعيف نفسيا ومش عارف ان ده هوركوركس، وبالتالي مش بيقاومه، ساعتها الهوركوركس هيكون تأثيره أقوى عليه، زي ما حصل مع جيني ويزلي ومذكرات توم ريدل.

لأنها كانت طفلة ، ووثقت في المذكرات، وكانت بتحكي لها أسرارها ومخاوفها وأحزانها ، المذكرات تغذت على مشاعرها دي، وزادت قوتها مع الوقت لحد ماقدرت تستحوز على جيني تماما، وتخليها تعمل حاجات بدون وعي منها ، واهمها طبعا فتح غرفة الأسرار، وإطلاق وحش البازيليسك الموجود فيها.

المذكرات بعد ما زادت قوتها، قدرت انها تسحب قوة الحياة من جيني بالتدريج، وقدرت روح توم ريدل الموجودة جواها، في انها تتجسد بالفعل وتاخد عصاية هاري وتمارس السحر، وكان فاضل لحظات بسيطة قبل انتهاء حياة جيني تماما، وتجسد توم ريدل بشكل حسي كامل، لولا ان هاري طعن المذكرات بناب البازيليسك وقدر يدمر الهوركوركس.

لكن ليه تأثير الهوركوركس كان قوي على جيني لدرجة الاستحواز، لكنه ماكانش بنفس القوة مع هاري ورون وهيرميوني؟ لأن هاري ورون وهيرميوني كانوا عارفين انه هوركوركس، وكان بيقاوموه وبيبدلوا في لبس القلادة، عشان ماتقدرش تسيطر عليهم مع مرور الوقت، على عكس جيني اللي وثقت في المذكرات وكانت معاها لفترة طويلة.

القوة السحرية التانية اللي بيمتلكها الهوركوركس، انه عنده احساس باقتراب الخطر ، وبيدافع عن نفسه ضد التدمير، بس عشان القوة دي تكون فعالة لازم الهوركوركس يكون على اتصال بالعالم الخارجي، فيستمد من مخاوف وأحزان المحيطين بيه القوة اللازمة للدفاع عن نفسه، وده اللي حصل لما قلادة سلازار سليزرين،حاولت تخنق هاري عشان مايوصلش لسيف جريفندور في قاع البحيرة، وجسدت مخاوف رون على شكل خيالات، عشان تشتته وتمنعه من تدميرها، لكن كاس هيلجا هافلباف وتاج روينا ريفنكلو ، لأنهم فضلوا سنين طويلة محفوظين بعيد عن أي اتصال بالعالم الخارجي، ما كانش عندهم قوة الإحساس بالخطر، وما دافعوش عن نفسهم ضد التدمير.

في قوى تانية للهوركوركس لكنها مش نابعة من طبيعته، هي قوى بيضعها فيه الساحر اللي بيصنعه، زي ما كانت مذكرات توم ريدل مضادة للمياة وانسكاب الحبر ، وزي اللعنة القاتلة اللي وضعها فولدمورت على خاتم مارفولو جاونت، وزي عدم قدرة السحر العادي وحتى سحر أقزام المنزل على تدمير قلادة سالازار سليزرين، وإنها ما بتفتحش غير باستخدام البارسلتونج، اللي مايعرفوش غير قلة نادرة من السحرة.

بعد ماعرفنا ايه هو الهوركوركس، وإيه قدراته السحرية وفايدته للساحر اللي صنعه، هنتكلم عن آثاره الجانبية، ماهو مش معقول سحر بالظلام، ده والشر ده، مش هيكون له آثار جانبية.

الهوركوركس انتهاك صريح وواضح، للقانون الأول من قوانين السحرالأساسية، اللي بيقول ( لا تعبث بأكثر الظواهر غموضا، بجوهر الحياة، بأصل الذات، إلا إذا كنت مستعدا لمواجهة أخطر وأبشع العواقب)، وطبعا مافيش شيء هيعبث بجوهر الحياة، أكتر من كسر الروح وتقسيمها، واللي هيعمل كده، هيواجه فعلا أخطر وأبشع العواقب، اللي هتظهرله بالتدريج، يمكن عشان تحاول ترجعه عن طريق الشر لو فهم التحذير.

أول العواقب دي ( الفقدان التدريجي للصفات والملامح الإنسانية)

فولدمورت في محاولاته لإنه يكون انسان خارق، فقد انسانيته تماما، ماكانش قادر يفهم ان الروح لازم تفضل وحدة واحدة، كاملة، بدون تقسيم أو تشويه ، عشان يقدر يحافظ على انسانيته ، بس كل اللي كان شايفه ، انه لازم يلاقي طريقة للهروب من الموت، طريقة للخلود، حتى لو هيفقد كل الصفات اللي بتميز الإنسان عن الوحوش، حتى لو فقد كل ملامحه الإنسانية.

تقسيم الروح بيشوها وبيشوه الملامح الجسدية معاها. توم ريدل كان شاب وسيم جدا، ومع تصنيعه لهوركوركس ورا التاني ، بدأت ملامحه تتغير والوسامة يحل محلها قسوة

بعد ما صنع اتنين من هوركوركساته ( المذكرات وخاتم جاونت) كان التغير في ملامحه بسيط، مجرد ضمور في الخدين ، لكن بعد 10 سنين وبعد ما صنع تلاتة كمان من الهوركوركسات ( التاج والقلادة والكاس) ملامحه كانت مشوشة ، زي ما تكون محروقة، كان جلده شاحب جدا ، كان أقرب لتمثال الشمع اللي ملامحه مش ظاهرة ،أقرب منه لإنسان.

مش عارفين بالضبط إذا كان كل التغيير ده، كان بسبب صنع الهوركوركسات بس ، ولا جزء منه كان بسبب تجاربه في السحر الأسود وفنون الظلام، اللي ماحدش سبقه للوصول لأسوء مافيها، وقيامه بتجارب وتحولات عشان يحصل على القوة المطلقة.

وده يوصلنا لأهم سؤال بيتسأل طول الوقت؟ فين أنف فولدمورت؟ إزاي وصل لشكله اللي بيشبه التعبان اكتر من الإنسان،  بعد رجوعه لجسمه تاني ، بعيونه الحمرا زي الدم، والشقين الصغيرين اللي كانوا مكان الأنف.

المؤلفة ماقالتش إجابة صريحة عن السؤال ده، بس اتكلمت عن تشوه الملامح، اللي بيتبع تشوه الروح الناتج عن تقسيمها، والانغماس في تجارب السحر الأسود، واتكلمت كمان عن طريقة صنع الجسم الأولي لفولدمورت، بمساعدة السم اللي أخده وورمتيل من ناجيني تعبان فولدمورت، المؤلفة ما قالتش ان مساعدة ناجيني على صنع جسم فولدمورت المؤقت، أثرت على ملامحه وخلته بيشبهها، لكن ايه المانع ان يكون الهوركوركس والسحر الأسود، عملوا تشوه كبير في ملامحه، وكملته ناجيني بسمها.

تاني الآثار الجانبية هو عدم استقرار الروح وقابليتها للانقسام بدون إرادة صاحبها ، وده مش ضروري يحصل مع صنع أكتر من هوركوركس، وتقسيم الروح أكتر من قسم، عدم الاستقرار ده ممكن يحصل حتى مع صنع هوركوركس واحد بس. وده فعلا اللي حصل لما فولدمورت حاول يقتل هاري بوتر وانقلبت تعويذة القتل عليه، فانكسر جزء من روحه بدون قصده ولا ترتيبه، والتصق بالكائن الحي الوحيد الموجود في المكان(هاري بوتر)

تالت الآثار الجانبية وأسوأها بالطبع ، واللي بيعتبر نوع من الجزاء أو العقاب على الفعل الشنيع المتمثل في العبث بالروح وتقسيمها ، هو ان روح الساحر اللي بيعمل الهوركوركس، بتعلق بين الحياة والموت

لأن عواقب انتهاك القانون الأول من قوانين السحر،  بتشبه قانون الحركة الثالث، ( لكل فعل رد فعل، مساوي له في القوة، ومضاد له في الاتجاه)، كل ماترتكب أفعال أسوء ، كل ما بتكون العواقب أسوء، كل ما بتقسم روحك قسم زيادة، كل ما الآثار الجانبية بتكون كارثية، لو حاولت تهرب من الموت، هيكون مصيرك أبشع من الموت ، هتفضل للأبد متعلق بين الحياة والموت، لا قادر ترجع لعالم الأحياء، ولا حتى كشبح، ولا قادر توصل لعالم الأموات.

فولدمورت لما حاول يهرب من الموت بالسحر الأسود، وصل لحالة أسوء من الموت ، فقد الحياة اللي عمل كل اللي يقدر عليه عشان يأمنها، وأصبح الموت اللي كان بيهرب منه ، حلم بعيد المنال، بعد ما اتسجن كروح مشوهة ضعيفة، في مكان بين عالم الأحياء والأموات.لو فكرنا شوية هنلاقي ان أمه ( ميروب جاونت) عملت شيء مشابه، مع اختلاف الانتهاك طبعا، ميروب جاونت حاولت تجبر توم ريدل الأب على حبها، بكل الطرق الغير طبيعية ، زرعت فيه شيء مش موجود بطرق سحرية ، عبثت بالروح والمشاعر، عشان كده كانت العواقب عكس ما أرادت تماما، توم ريدل هجرها هي وابنها، وبدل ماتعيش سعيدة وتشعر بمشاعر الحب، عاشت كل مشاعر الخذلان والرفض والاكتئاب، والأسوء من ده كله ، إنها في بحثها عن الحب ، كان نتاج الحب السحري اللي صنعته بإيدها، كائن عمره ماحس بالحب ، كائن هو التجسيد لكل شيء مضاد للحب.

ولرغبته في تأكيد مكانته كأعظم ساحر في تاريخ السحر، ولأن الحاجات التي لا تقدر بثمن  هي بس اللي تستاهل تكون وعاء لأجزاء روح الساحر الأعظم، صنع فولدمورت الهوركوركسس من أشياء ثمينة وقيمة جدا في العالم السحري،

في رحلته لصنع الهوركروكسس ، كان فولدمورت بيبحث عن الأشياء اللي كان بيملكها مؤسسين هوجورتس الأربعة، ونجح فعلا في انه يلاقي قلادة سليزرين، وكاس هيلجا هافلباف، وتاج روينا ريفنكلو، وقدر يحولهم لهوركروكسات، لكنه فشل في إيجاد سيف جريفندور.

يمكن مذكراته واللي كانت أول هوركوركس يصنعه، ماكانتش بنفس أهمية وقيمة باقي الهوركروكسات، بس هو لما صنعها كان بيقصد انها تكون سلاح يقدر يفتح بيه غرفة الأسرار، أكتر منها هوركوركس، وبالتالي كان لازم توصل لإيد حد من طلبة هوجورتس، عشان تسيطر عليه وتجبره يفتح غرفة الأسرار، ومش معقول انه يتخلى عن شيء ثمين وقيم ولا يمكن تعويضه، ويسيبه في ايد طالب صغير.

اما خاتم مارفولو جاونت واللي كان هوركروكسه الثاني، فكان له قيمة لا تقدر فعلا ، لكن فولدمورت ماكانش يعرف انه خاتم كادميوس بيفريل، وان الحجر اللي فيه كان حجر البعث، لكن قيمة الخاتم بالنسبة كانت قيمة عاطفية ، لأنه كان الدليل على عراقة أصله وانتماؤه لسليزرين، ده غير انه كان استكمال لعادته في أخد تذكار من ضحاياه، لأنه اخده من خاله بعد ما صعقه وأفقده الوعي وألصق بيه تهمة قتل أبوه توم ريدل الأب وجده وجدته من العامة.ناجيني كمان، واللي كانت الهوركوركس الأخير اللي صنعه، كانت كائن حي ، مش ثمينة ولا قيمة زي باقي الهوركوركسس، وده لأنه كان بيستخدمها برده كسلاح زي المذكرات، وبعتها في أكتر من مهمة، فكانت ناجيني والمذكرات أسلحة أكتر منها أوعية لحفظ روحه، ولأنه كان عنده هوركوركسات تانية بيعتقد انها مخفية بأمان، فماكانش عنده خوف من فقدان أسلحته دي لأن عنده بدائل لها.

فولدمورت صنع ستة هوركوركسات بإرادته، وهوركوركس واحد بدون قصد، كل هوركوركس له قصة، هنذكرهم النهاردة باختصار، وفي الحلقات الجاية، اللي هنكمل فيها حكاية فولدمورت، هنحكي عن كل واحد منهم بالتفصيل، بترتيب صنع فلدمورت لهم على مدار سنين حياته.

أول هوركوركس هو مذكرات توم ريدل، صنعها فولدمورت سنة 1943، بعد وحش البازيليسك ما قتل ميرتيل وارن، واداها للوسيوس مالفوي، اللي خباها في قصره، وبعدين حطها في وسط كتب جيني ويزلي من غير ماتعرف ،ودمرها هاري بوتر في غرفة الأسرار سنة 1993 لما طعنها بناب البازيليسك.

تاني هوركوركس هو خاتم مارفولو جاونت، صنعه فولدمورت سنة 1943، بعد ما قتل أبوه وأجداده بعصا خاله مورفن، وخباه في كوخ عيلة جاونت، ودمره ألباس دامبلدور بسيف جريفندور سنة 1996، في مكتبه في مدرسة هوجورتس.

تالت هوركوركس هو قلادة سالازار سليزرين، مش معروف وقت صنعها بالضبط لكنه في وقت ما بعد سنة 1946 ، وصنعها فولدمورت بعد ما قتل متشرد من العامة، وخباها في كهف المنحدر الصخري، وسرقها منه ريجيلوس بلاك وكريتشر اللي خباها في بيت عيلة بلاك، بعدين سرقها مندونجوس فليتشر واداها لدولوريس امبريدج كرشوة، لكن قدر هاري بوتر ياخدها منها، ودمرها رون ويزلي في غابة دين سنة 1997.

رابع هوركوركس هو كاس هيلجا هافلباف، صنعه فولدمورت سنة 1946، بعد ما قتل هيبزيباه سميث في بيتها، واده لبيلاتريكس ليسترانج اللي خبته في خزنة عيلتها في بنك جرينجوتس، ودمرته هيرميوني جرانجر بناب البازيليسك في غرفة الأسرار ، سنة 1998 أثناء معركة هوجورتس.

الخامس تاج روينا ريفنكلو، صنعه فولدمورت بعد سنة 1946، بعد قتل فلاح ألباني ، وخباه في غرفة الاحتياجات في هوجورتس، في الكتاب دمره فينسنت كراب بالنار الشيطانية في غرفة الاحتياجات، لكن في الفيلم طعنه هاري بناب البازيليسك وبعدين شاطه رون برجله جوة النار الشيطانية، أثناء معركة هوجورتس سنة 1998.

السادس التعبان ناجيني، صنعها فولدمورت سنة 1994 في غابة في ألبانيا، بعد قتل بيرثا جوركينز، وكانت دايما ملازمة فولدمورت ماخباهاش، ودمرها نيفيل لونجبوتوم، لما قطع راسها بسيف جريفندور على سلم المدرسة، أثناء معركة هوجورتس سنة 1998.

الهوركوركس السابع ، واللي زي ماقلنا قبل كده ماهواش هوركوركس أوي، هو الجزء من روح فولدمورت المخفي داخل هاري بوتر، واللي صنعه فولدمورت بدون قصد، لما فشل في قتل هاري، وارتدت عليه تعويذة القتل ودمرت جسمه، فانفصل جزء من روحه والتصق بهاري، وده حصل في بيت عيلة بوتر في جودريكس هولو سنة 1981، وتم تدمير الهوكوركس على إيد فولدمورت نفسه، من غير مايعرف انه هوركوركس، في الغابة المحرمة أثناء معركة هوجورتس سنة 1998.وبكده نكون غطينا تقريبا كل شيء عن الهوركوركس، لو عندكم أي سؤال اكتبوه في التعليقات وهرد عليكم.

وأشوفكم الحلقة الجاية مع توم ريدل ورحلته للبحث عن العظمة والخلود.