قصة حياة فولدمورت-5- هاري بوتر ونبوءة المختار

 

نبوؤة المختار

اتكلمنا الحلقة اللي فاتت عن بداية وأحداث الحرب السحرية الأولى، وازاي قدر فولدمورت يكون جيش قوي جدا من اكلة الموت ، من السحرة والكائنات السحرية الخطيرة زي العمالقة والمستذئبين، ونشر الرعب والموت في العالم السحري لأكتر من 10 سنين.

وزارة السحر وجماعة العنقاء الأولى كانوا بيحاربوا بكل قوتهم، وقتلوا وقبضوا على كتير من أكلة الموت ، لكن ده ماكانش كافي للقضاء على فولدمورت وجيشه، بالعكس كل يوم كان بيثبت أكتر من اللي قبله ان فولدمورت لا يقهر ، وان مقاومته نوع من الجنون ورغبة في الانتحار، وده اللي خلى بعض السحرة اللي كانوا على الحياد أو اللي كانوا بيقاوموه ، يضعفوا ويخافوا وينضموا لأكلة الموت، زي بيتر بيتجرو عضو جماعة العنقاء، اللي نقل لفولدمورت كل تحركات أعضاء الجماعة، وكان السبب في موت كتير جدا منهم.

في وسط الموت بيتمسك الإنسان بالحياة على أد ما يقدر، عشان كده كان السحرة من الجانبين بيحاولوا يعيشوا حياتهم وبيتجوزوا ويخلفوا ، وفي سنة 1980 اتولد كتير من السحرة الصغار ، زي هاري بوتر ابن جيمس وليلي بوتر، ونيفيل لونجبوتم ابن فرانك وأليس لونجبوتم، ورون ويزلي ابن ارثر ومولي ويزلي ودراكو مالفوي ابن لوسيوس ونارسيسا مالفوي، وجريجوري جويل ، وفينسنت كراب.

ولأن دامبلدور كان الساحر الوحيد اللي بيخاف فولدمورت من مواجهته، فضلت هوجورتس المكان الوحيد الآمن في العالم السحري، وفضل الطلاب يتعلموا فيها فنون السحر كالعادة. وفي ذروة قوة فولدمورت، قدمت الساحرة سيبيل تريلاوني على وظيفة مدرسة مادة التنجيم في هوجورتس، وراح دامبلدور عشان يقابلها ويقيمها في حانة راس الخنزير، وفي أثناء اللقاء، دخلت تريلاوني في حالة سحرية مكنتها من تتنبأ بأهم نبوؤة في العالم السحري في الوقت ده، تنبأت بهزيمة فولدمورت.

النبوؤة كانت بتقول ( الشخص اللي عنده القوة لهزيمة سيد الظلام ، قرب يظهر، الشخص ده هيتولد لوالدين هزموا سيد الظلام 3 مرات، هيتولد مع انتهاء الشهر السابع، وسيد الظلام هو اللي هيختاره كند ومساوي ليه، لكنه هيمتلك قوى ما يعرفهاش سيد الظلام، واحد منهم لازم يموت على ايدين التاني، لأن ما ينفعش الاتنين يعيشوا في نفس الوقت، الشخص اللي عنده القوة لهزيمة سيد الظلام هيتولد مع نهاية الشهر السابع)

سيبيل تريلاوني ما عرفتش إنها تنبأت بالنبوؤة دي، لنها بتكون غير واعية بحالة التنبأ، لكن في حد تاني سمع النبوؤة، او على الأقل جزء منها.

سيفروس سنايب اللي كان من اهم أكلة الموت وأقربهم لفولدمورت في الوقت ده، سمع جزء من نبوؤة سيبيل ، قبل ما يمسكه صاحب الحانة ( ايبرفورث دامبلدور) اخو ألباس دامبلدور والعضو السري في جماعة العنقاء، ويطرده من الحانة.

 دامبلدور وافق على تعيين سيبيل تريلاوني في هوجورتس عشان يحميها من فولدمورت اللي كان متأكد ان سنايب هيوصله النبوؤة.

وفعلا سنايب نقل الجزء اللي سمعه من النبوؤة لفولدمورت، اللي اترعب منها وقرر يعمل أي حاجة تخليها ماتتحققش.

للأسف في فجوة زمنية ماقدرتش أملاها في النقطة دي، المفروض ان النبوؤة حصلت قبل شهر يوليو 1980 ، لأنه تنبأت بمولد المختار مع نهاية الشهر السابع، لكن فولدمورت ما حاولش يقتل المختار إلا في 31 أكتوبر 1981 يعني بعد ليلة النبوؤة بسنة وأربع شهور على أقل تقدير.

مش عارفة ده خطأ من المؤلفة في تتابع القصة، ولا البحث عن المختار وتحديده وتحديد مكانه بعد كده ممكن ياخد من فولدمورت العظيم سنة وأربع شهور.

ومع نهاية الشهر السابع، اتولد نيفيل لونجبوتم يوم 30 يوليو، وبعده بيوم واحد ، اتولد هاري بوتر يوم 31 يوليو.

كل واحد منهم ، أبوه وأمه كانوا أعضاء في جماعة العنقاء، وهزموا فولدمورت 3 مرات، طبعا ماهزموهوش شخصيا، لكنهم رفضوا الانضمام إليه وحاربوا أكلة الموت ونجوا منهم 3 مرات.

الشرطين كانوا منطبقين على هاري ونيفل، لكن فولدمورت اختار هاري بوتر يكون هو الند والمساوي ليه وفي اللحظة اللي اختاره فيها إداه القوة لهزيمته، زي ما النبوؤة قالت، سيد الظلام هو اللي هيختاره ويعلمه كند ومساوي ليه.

لكن ليه فولدمورت اختار هاري مش نيفيل؟ فولدمورت اختار هاري لأن كان بينهم شيء مشترك، وهو انه كان هجين الدم زيه ، لكن نيفيل كان ساحر نقي الدم، ويمكن ولادة هاري في آخر يوم من الشهر وولادة نيفيل قبله بيوم، خلته كمان يشوف ان النبوؤة تنطبق على هاري بشكل أدق.

سفيروس سنايب، آكل الموت اللي نقل النبوؤة لفولدمورت، صدم لما عرف انه اختار هاري ، ابن ليلي بوتر ، لأنها كانت صديقة طفولته الوحيدة، وكان بيحبها جدا بالرغم من انها قطعت علاقتها بيه في سنتهم الخامسة في المدرسة، لما اتصاحب على مجموعة من الطلبة اللي بيمارسوا السحر الأسود وبيخططوا ينضموا لأكلة الموت بعد ما يتخرجوا من هوجورتس، وبعد ما اتخرجوا انضم سيفروس فعلا لأكلة الموت، في الوقت اللي انضمت فيه ليلي لجماعة العنقاء واتجوزت جيمس بوتر عدوه اللدود.

سيفروس طلب من فولدمورت انه يقتل هاري وجيمس لكن يبقي على حياة ليلي، ولأنه كان خادمه الوفي وتابعه المطيع، وافق فولدمورت انه مايقتلش ليلي، لكن سيفروس ما كانش واثق ان فولدمورت هيوفي بوعده، وخصوصا انه متأكد إن ليلي هتدافع عن ابنها لآخر نفس ، وعمرها ما هتتخلى عنه وتسيبه لفولدمورت يقتله، وطبعا لو واجهت فولدمورت فهو هيقتلها بدون تردد.

عشان كده راح سيفروس سنايب لدامبلدور يترجاه إنه يحمي ليلي، حتى لو ده معناه انه لازم يحمي عدوه اللدود جيمس وابنه. دامبلدور وافق انه يحمي ليلي وزوجها وابنها، لكنه طلب في المقابل انه يكون جاسوس لجماعة العنقاء على أكلة الموت وفولدمورت، وفعلا وافق سنايب على طلب دامبلدور.

في روايات بتقول ان حتى من قبل النبوؤة، من بعد حمل ليلي على طول ، اضطرت هي وجيمس للاختباء لأنهم كانوا مستهدفين بشدة من أكلة الموت، وان مكانهم في جودريكس هولو ماكانش معروف غير للمقربين منهم بس، زي دامبلدور وسيريوس ولوبين وبيتجرو لكن بعد النبوؤة، وبعد ما سنايب حذر دامبلدور من ان فولدمورت شايف ان ابن ليلي وجيمس هو المقصود بيها، كان مجرد الاختباء مش كفاية، فلجأ دامبلدور لاستخدام سحر الفيديلوس، وهو سحر قديم وقوي جدا ، بيقدر الساحر عن طريقه، انه يخبي شيء أو مكان زي بيت جيمس بوتر في جودريكس هولو مثلا عن كل العيون، المكان بيكون مخفي تماما، ماحدش يقدر يشوفه أو يحس بوجوده أو يسمع أي صوت بيحصل جواه، كأنه فعلا مش موجود، لكن لازم يكون في حافظ للسر يحفظ سحر الفيديلوس جواه ، وبيكون هو الوحيد القادر على إفشاء السر ده ، ولازم يقوله بإرادته، ماينفعش معاه ليجليمنسي ولا فريتاسيروم. جيمس كان مصر ان سيريوس يكون حافظ السر، لكن سيريوس رفض، وقال ان أي حد في الدنيا هيعرف ان هو حافظ السر لأنه أقرب صديق لجيمس، وحافظ السر لازم يكون آخر واحد الناس ممكن تفكر فيه، عشان كده اقترح انهم يختاروا بيتر بيتجرو، اللي في نظر الناس ساحر عادي جدا، صديق عادي لعيلة بوتر وعضو عادي وغير معروف في جماعة العنقاء، وبالفعل تم إلقاء سحر الفيديلوس على بيت عيلة بوتر وأصبح بيتر بيتجرو حافظ سرهم ، واختفوا تمام عن كل العيون واطمنوا ان مستحيل أي حد هيعرف مكانهم . لكن اللي ماكانوش عارفينه ولا عاملين حسابه، إن بيتر بيتجرو كان في الوقت ده أصبح من آكلي الموت وغير ولائه من الجماعة لفولدمورت. وفي اللحظة اللي راح فيها بيتر بيتجروا لفولدمورت وقاله على مكان عيلة بوتر بكامل إرادته، بطل سحر الفيديلوس وأصبح بيتهم واضح للعيان بدون أي خفاء .

وفي يوم ٣١ أكتوبر ١٩٨١ بينتقل فولدمورت لجودريكس هولو، وبيدخل بيت عيلة بوتر بمنتهى السهولة ومن غير ماحد يحس بيه

. بيقابل في الأول جيمس بوتر اللي كان بدون عصايته السحرية، لأنه طبعا متوقع ان سحر الفيديلوس بيخفيهم عن الأنظار ومافيش عليهم أي تهديد من أي نوع، جيمس بيصرخ أول ما يلمحه وبقول لليلي اللي كانت بعيد شوية ده هو، خدي هاري واهربي بسرعة ، انا هحاول أعطله. لكن ولأنه من غير عصايته، ماكانش عنده أي فرصة للقتال او الدفاع عن نفسه او تعطيل فولدمورت ولو لثواني وفي لحظة كان فولدمورت قتله بالتعويذة القاتلة بدون اي تردد

ليلي بتاخد هاري وبتجري على أوضته وبتقفل الباب ، ولما فولدمورت بيقتحم الأوضة ، بتحط هاري في سريره وتقف قدام السرير وتترجى فولدمورت انه يسيب هاري ومايأذيهوش، فولدمورت اللي كان بيعتبر سنايب خادمه الوفي المطيع وأقرب آكلي الموت ليه، حب يكافئه ويوفي بوعده ومايقتلش ليلي، وطلب منها أكتر من مرة تنقذ نفسها وتبعد عن سرير هاري لكنها رفضت طبعا فقتلها بتعويذة القتل وبعدين رمى نفس التعويذة ( تعويذة القتل المحرمة أفاداكديفرا) على هاري بوتر الرضيع اللي يادوب عنده سنة وكام شهر، لكن في اللحظة دي حصل شيء غريب جدا ومش مفهوم، شيء مستحيل حد يتوقعه، تعويذة القتل ماسببتش لهاري أي ضرر، غير يادوب علامة صغيرة في قورته تشبه البرق، لكنها ارتدت على اللورد فولدمورت سيد الظلام، ولأن الهوركوركسس اللي صنعها بتربط روحه بالحياة وتمنع موته طول ماهي موجودة، التعويذة دمرت على جسمه وسابته روح ضعيفة ، طيف، أقل من شبح، عاجز عن استخدام السحر ، عاجز عن أي شيء تماما، ولأن مع التعويذة حصل انفجار ضخم، دمر بيت عيلة بوتر، وأكيد العالم السحري كله هيعرف باللي حصل، ماكانش قدام طيف سيد الظلام غير إنه يهرب بسرعة قبل ما أي ساحر من جماعة العنقاء أو وزارة السحر يوصل له ويقضي عليه بسبب ضعفه الشديد في الحالة دي

قبل ما نشوف لورد فولدمورت راح فين، والعالم السحري حصل فيه ايه بعد الليلة دي، عايزين نعرف ونفهم، ليه تعويذة القتل ما أثرتش على هاري بوتر وارتدت على فولدمورت، وايه اللي حصل لروحه ساعتها، وايه تأثير ده على هاري؟ لما ليلي ضحت بنفسها عشان تحمي هاري، فعَّلت نوع من السحر القديم القوي جدا ، سحر الحب والحماية، اللي حمى هاري من تعويذة القتل ومنعها من إيذاؤه وماسبتش فيه غير الندبة البسيطة في قورته، لكن ليه تضحية ليلي بالذات فعلت سحر الحماية؟ كتير جدا بيضحوا بنفسهم لحماية أحبابهم وتضحيتهم مابيكونش لها الأثر السحري ده؟ جيمس لسة حالا مضحي بنفسه عشان يحاول ينقذ ليلي وهاري وتضحيته ما وفرتش لهم أي حماية سحرية، ايه المختلف في تضحية ليلي؟ سحر الحب والحماية عشان يكون له تأثير لازم يتحقق فيه شرط مهم جدا، إن اللي يضحي بحياته يكون عنده اختيار انه ممكن ينقذ نفسه لكنه بيختار التضحية بنفسه بكامل إرادته عشان ينقذ اللي بيحبهم، جيمس ماكانش عنده الخيار ده، لأن فولدمورت قتله بدون تردد، من غير ولا كلمة، لكن ليلي كان عندها فرصة تنقذ نفسها لما فولدمورت طلب منها تبعد عن هاري وتسيبه يقتله، لكنها اختارت انها تضحي بنفسها بإرادتها الكاملة عشان تحاول تنقذ ابنها، وهو ده السبب اللي فعل سحر الحماية وأنقذ هاري فعلا

وهنا في نقطة صغيرة ناخد بالنا منها ، سنايب كان هو السبب الأساسي في سحر الحماية اللي أنقذ هاري، لانه هو اللي طلب من فولدمورت انه مايقتلش ليلي، وعشانه فولدمورت اعطى ليلي الفرصة لإنقاذ نفسها ولولاه كان قتلها بدون تردد زي جيمس وماكانش هبيقى في سحر حب ولا حماية وكان هيقتل هاري بمنتهى السهولة

لما التعويذة ارتدت على فولدمورت ودمرت جسمه، ولأن روحه من كتر ما قسمها عشان يعمل هوركوركسس، ماكانتش مستقرة، انقسم جزء صغير منها من غير مايقصد ولجأ للشيء الحي الوحيد الموجود في الأوضة ساعتها، هاري بوتر، ودخل لجسمه من الندبة الموجودة في قورته، ونقله جزء من قدرات فولدمورت، زي البارثلتونج او الكلام مع التعابين، وحوله بدون أي ترتيب لشيء يشبه الهوركوركس بيحفظ روح فولدمورت الموجودة جواه وبيضمن بقاءه في عالم الأحياء.

 بعد الانفجار وهروب طيف فولدمورت بدقايق، وصل بيتر بيتجرو لبيت عيلة بوتر، ولما مالقاش فولدمورت وشك انه ممكن يكون مات، خاف إن أكلة الموت يتهموه بالخيانة لأن وشايته بعيلة بوتر كانت السبب في موت فولدمورت، وطبعا جماعة العنقاء هتعرف انه هو اللي أفشى السر وسلم عيلة بوتر لفولدمورت ، فقرر انه ياخد عصاية فولدمورت اللي كانت بين حطام البيت، واختفى تماما عن الأنظار

وصل بعده للبيت المحطم سيريوس بلاك وروبيوس هاجريد اللي بعته دامبلدور عشان ياخد هاري من وسط الحطام. حاول سيريوس ياخد هاري من هاجريد لأنه كان أبوه الروحي والوصي عليه في حالة ان يحصل لجيمس وليلي أي حاجة، لكن هاجريد رفض وقاله ان دامبلدور طلب منه يجيب هاري لمكان سري ، وهو لازم ينفذ كلامه ، فسابه سيريوس ياخد هاري، واداه كمان دراجته الطائرة عشان يوصله بيها.

خرج سيريوس من بيت جيمس بوتر وراح لبيت بيتر بيتجرو عشان يشوفه ويعرف ازاي سحر الفيديلوس اللي كان على البيت اتكسر، ولما وصل ومالقاهوش في بيته، ومالقاش اي علامة ان في حد هاجمه او خطفه، اتأكد انه خانهم وسلم عيلة بوتر لفولدمورت وبدأ يدور عليه في كل مكان، وبالفعل قدر يلمحه في شارع في وسط لندن مليان بالعامة، وقبل ما يقدر يمسكه، استخدم بيتر بيتجرو عصاية فولدمورت السحرية وعمل تعويذة انفجار قوية جدا لدرجة إنها شقت الشارع نصين واتسببت في قتل عدد كبير من العامة، ولأنه كان انيميجوس غير مسجل، بيتحول لفار ، لكن ماحدش كان يعرف غير جيمس وسيريوس وريموس، قطع بيتجرو صابع من صوابعه وسابه في مكان الإنفجار كدليل على موته، واتحول لفار وهرب بعيد عن موقع الإنفجار من غير ماحد يشوفه، وأخد عصاية فولدمورت وخباها في مكان سري واختفى. وزارة السحر وصلت لمكان الانفجار ولقت سيريوس بلاك، ووجهت له تهمة قتل العامة وقتل بيتر بيتجروا بعد ما افتكروا ان سيريوس هو الخاين اللي سلم عيلة بوتر لفولدمورت وان بيتجروا كشفه وواجهه دفاعا عن اصدقائه وانتقاما ليهم، فقتله سيريوس بالانفجار وماتبقاش منه غير الصابع ده . ولأن الجرايم اللي اتوجهت لسيريوس كانت فظيعة جدا ، وشهد الشهود انهم شافوا سيريوس بيرفع عصايته قبل الانفجار، حكموا عليه بالسجن مدى الحياة في أزكبان بدون أي محاكمة.

أما هاري بوتر، الولد اللي نجا من الموت، وكان السبب في تدمير أسطورة فولدمورت، وانتهاء فترة من أسوء الفترات اللي عاشها العالم السحري، فأخده دامبلدور ووداه يعيش مع الشخص الوحيد الباقي من عيلته، خالته بيتونيا، اللي هيقضي هاري معاها هي وزوجها فيرنون درسلي وابنهم دادلي ال ١٦ سنة الجايين من عمره

مع اختفاء فولدمورت وعدم وجود جثته، انقسم العالم السحري، معظم السحرة العاديين كانوا شايفين انه أكيد مات، بس هو من كتر انغماسه في السحر الأسود مابقاش انسان عشان يكون له جثة بعد ما مات، بعض أكلة الموت كانوا شايفين انه ماماتش هو بس اختفى شوية لحد ما يستجمع قوته وهيظهر تاني في الوقت المناسب ويسيطر على العالم السحري، دامبلدور وبعض السحرة من جماعة العنقاء وغيرهم كانوا شايفين انه ماماتش لكنه في حالة ضعيفة جدا، بيفتقر لأي قوة سحرية، لكن احتمال رجوعه كان وارد بالنسبة لهم ، وده اللي خلى دامبلدور يتفق مع نيكولاس فلاميل الساحر والكميائي المعروف ومالك حجر الفيلسوف، انهم يحفظوا الحجر في بنك جرينجوتس عشان يحموه لو حاول فولدمورت الاستيلاء عليه عشان يقدر يرجع تاني.

وباختفاء فولدمورت، انتهت حرب السحرة الأولى، وبدأت حملة القبض على أكلة الموت ومحاكمتهم، الباقيين من العمالقة هربوا واختفوا من بريطانيا كلها، ولجأوا لأماكن بعيدة وغير مأهولة في وسط جبال الدنمارك، والمستذئبين رجعوا تاني يعيشوا متخفيين بعيد عن أماكن تواجد السحرة، أما أكلة الموت من السحرة، فمنهم اللي اتمسك واتحكم عليه بالسجن مدى الحياة في أزكبان، ومنهم اللي ادعى انه كان تحت تأثير تعويذة التحكم المحرمة( امبريوس كيرس) زي عيلة مالفوي فخرجوا وكملوا حياتهم عادي ورجعوا لمكانتهم المحترمة بين السحرة، ومنهم اللي سلم أكلة موت تانيين كتمن لحريته زي ايجور كاراكوف، ومنهم اللي ماصدقش ان فولدمورت انتهى زي بيلاتريكس ورودلف ليسترانج وبارتي كراوتش الابن، اللي دوروا علي سيد الظلام وحاولوا يوصلوا لأي معلومات عنه، وشكوا ان كشافين وزارة السحر وأعضاء جماعة العنقاء فرانك وأليس لونجبوتم، ممكن يكون عندهم معلومات مخبينها عن مكان فولدمورت أو حالته، فمسكوهم وعذبوهم بتعويذة كروشيتوس المحرمة، مرات كتيرة ومتواصلة، لدرجة انهم فقدوا عقلهم من شدة التعذيب وتم وضعهم في مستشفى سانت مونجوس للأمراض والإصابات السحرية لبقية حياتهم.

أما بيلاتريكس ورودولف ليسترانج وبارتي كراوتش الابن فتم القبض عليهم ومحاكمتهم، والحكم عليهم بالحبس في أزكبان مدى الحياة.

بعد انتهاء المحاكمات بدأت الحياة في العالم السحري ترجع لطبيعتها، وبالرغم من اختفاء فولدمورت وإيمان ناس كتير إنه مات، لكنهم فضلوا يخافوا من ذكر اسمه ولما يحكوا حكايته يقولوا الذي لا ينبغي ذكر اسمه.

بس الحكاية لسة ماخلصتش، لسة لينا حكايات وحكايات مع الذي لا ينبغي ذكر اسمه، هنكملها معاكم في الحلقة الجاية.