اقرا هاري بوتر بالمصري -8- أستاذ الوصفات

8- أستاذ الوصفات

- بص هناك

-فين

- جنب الولد الطويل أبو شعر احمر

- اللي لابس نضارة؟

-انت شفت وشه؟

- انت شفت ندبته؟

من ساعة ما طلع هاري من برج جريفندور تاني يوم الصبح، والكل بيتوشوش عليه. الطلاب كانوا بيطلعوا من الفصول ويقفوا في الممرات على طراطيف صوابعهم عشان يشوفوه كويس، وفيه اللي كان بيفضل رايح جاي من جنبه عشان يشوفه من قريب، هاري كان بيتمنى انهم يبطلوا اللي بيعملوه ده، لأنهم كانوا بيخلوه يتلخبط ويتوه وما يعرفش يوصل لفصله. هوجورتس كان فيها 142 سلم ، سلالم واسعو ونضيفة، وسلالم ضيقة ومكسرة، وسلالم بتوصل لمكان مختلف يوم الجمعة بس، وسلالم فيها سلمة ناقصة، ولازم كل مرة تفتكر تنط فوقها عشان ماتقعش. أما الأبواب بقى فكانت حكاية تانية، في أبواب ما بتفتحش إلا لو طلبت منها بأدب، وأبواب لازم تزغزغها في مكان معين عشان تفتح، وأبواب ماكانتش أبواب أصلا، كانت حيطان بتمثل إنها أبواب. في هوجورتس صعب تفتكر مكان أي حاجة، عشان كل حاجة بتغير مكانها كل شوية. كل الناس اللي في اللوح بيروحوا يزوروا أصحابهم في اللوح التانية، هاري كان متأكد إن حتى الدروع الحديد بتقدر تتحرك.

الأشباح كانت بتخلى الأمور أسوء، مهما الموضوع يحصل مرة واتنين وتلاتة، كان لازم تتخض لما تحاول تفتح باب وتلاقي شبح طالع منه. نيك شبه مقطوع الراس كان بيساعد طلاب جريفندور الجداد بكل سعادة، ويوصف لهم الطريق الصح، لكن بيفيز الروح الشريرة، كان أسوء من السلالم اللي بتغير مكانها والبيبان المقفولة ، لو قابلك وانت متاخر على الحصة، لازم يعطلك، يرمي فوقك سلة الورق، أو يشد السجادة من تحت رجليك، أو يحدفك بالطباشير، أو يختفي ويجي من وراك ويمسك مناخيرك ويصرخ. الأسوء من بيفيز، ده لو ينفع نقول إن في حاجة أسوء من بيفيز، هو المشرف أرجوس فيلتش. من أول يوم لهاري ورون في المدرسة ، عملوا معاه مشكلة ومن ساعتها حطهم في دماغه. فيلتش مسكهم وهم بيحاولوا يفتحوا باب بالعافية، بس مش أي باب ، ده باب الممر اليمين في الدور التالت، اللي دامبلدور منبه ان ممنوع أي حد يدخله، ومهما حاولوا يشرحوله انهم كانوا تايهين ومايعرفوش هما فين، ماصدقهومش أبدا، وهددهم بالحبس في السرداب، لولا ان البروفيسور كويريل اللي كان معدي بالصدفة ساعتها أنقذهم منه. فليتش كان عنده قطة اسمها مسز نوريس، قطة رفيعة لونها زي لون التراب بس عنيها منفجلة زي عنين فيلتش تمام. مسز نوريس كانت بتلف في الممرات ليل ونهار لوحدها، وياويلك لو عملت حاجة غلط قدامها أو كنت في مكان المفروض ماتدخلوش، هتلاقيها اختفت وفي ثانية رجعت ووراها فيلتش اللي ماحدش يعرف ممرات المدرسة السرية كلها زيه، إلا يمكن التوأم ويزلي، وعشان كده تلاقيه فجأة ظهر قدامك وكأنه شبح . كل الطلاب كانوا بيكرهوا مسز نوريس ونفسهم يشوطوها برجليهم ، بس يا خسارة مايقدروش. وأخيرا وبعد ما توصل للفصل، هتلاقي الحصة نفسها هي مشكلتك الجديدة. هاري اكتشف ان السحر مش حركات بالعصاية وكلام مش مفهوم ، عشان تتعلم السحر لازم تتعلم حاجات كتيييير، لازم مثلا تتعلم أسماء النجوم وحركة الكواكب، وعشان كده كان عندهم حصة كل يوم أربع في نص الليل يدرسوا فيها السما بالتليسكوب . وكمان كانوا بيدرسوا علم النبات ٣ مرات في الأسبوع في البيوت الإزاز اللي ورا القلعة، وكانت المدرسة ساحرة قصيرة ومليانة اسمها بروفيسور سبراوت، وفي حصتها كانوا بيدرسوا استخدامات وطرق العناية بأنواع كتيرة وغريبة من الفطر والنباتات السحرية. تاريخ السحر كان أكتر مادة مملة، وكمان المادة الوحيدة اللي بيدرسها شبح. الأستاذ بينز كان عجوووووز جدا وفي مرة نام على الكرسي قدام الدفاية في أوضة المدرسين، وتاني يوم الصبح صحي عادي وراح لفصله وشرح حصصه كالعادة، الحاجة الوحيدة اللي اتغيرت يومها، انه ساب جسمه على الكرسي وبقى شبح. وفي الحصة، كان الأستاذ بينز بيتكلم طول الحصة من غير ما يسكت خالص، بيتكلم بالراااحة ، بطريقة مملة جدا وبنغمة مابتتغيرش ، والطلاب بيكتبوا وراه أسامي وتواريخ، ويتلخبطوا بين ايميتيك الشرير ويوريك الغريب. الأستاذ فليتويك مدرس مادة التعاويذ كان ساحر قصير وصغير ، لدرجة انه كان لازم يقف على كوم من الكتب عشان يقدر يشوف التلاميذ من ورا مكتبه. في أول حصة تعاويذ، مسك الستاذ فليتويك قايمة الأسماء وبدأ ياخد الغياب، واول ما وصل لاسم هاري بوتر هلل ونط من الفرحة لدرجة انه وقع من على كومة الكتب.

الأستاذة ماكونجال أثبتت تاني إنها فريدة من نوعها، ومافيش منها اتنين. هاري كان عنده حق لما فكر إنها أستاذة ماينفعش تعارضها أو تعمل معاها مشاكل. كانت حازمة وذكية، ومع أول دقيقة لهم في فصلها قالت لهم ( مادة التحويل من أصعب وأخطر أنواع السحر اللي هتتعلموها في هوجورتس، أي طالب مش هيلتزم في حصتي، هيخرج من الفصل ده ومش هيرجعه تاني أبدا، ده تحذير بقوله مرة واحدة بس)

حولت الأستاذة ماكونجال مكتبها لخنزير، وبعدين رجعته مكتب تاني.

الطلاب انبهروا باللي شافوه، وكل واحد فيهم كان بيفكر، ياترى هقدر احول مكتبي لحيوان بعد اد ايه، بس بعد شوية اكتشفوا ان لسة قدامهم كتيييييير قبل ما يقدروا يحولوا المكاتب لحيوانات. بعد ما كتبوا ورا الأستاذة ماكونجال تعليمات كتير وملاحظات صعبة وخطوات معقدة، كل واحد فيهم أخد عود كبريت وبدأ يجرب انه يحوله لإبرة، وعلى آخر الحصة كانت هرميوني جرانجر هي الوحيدة اللي قدرت تغير شكل عود الكبريت شوية، الأستاذة ماكونجال عرضته عليهم ووريتهم ازاي لونه بقى فضي وبقاله سن مدبب، وابتسمت لهرميوني وده كان شيء نادر طبعا.

اما الحصة اللي كلهم كانوا مستنيينها بفارغ الصبر، فكانت حصة الدفاع ضد فنون السحر الأسود، بس للأسف الحصة طلعت أي كلام.  فصل الأستاذ كويريل كان مليان توم، والطلاب قالوا ان ده عشان يبعد مصاص دماء قابله في رومانيا، وخايف انه يجي وراه لحد هنا. الأستاذ كويريل قالهم ان عمته الغريبة هدية من أمير أفريقي، بيشكره عشان اتخلص من زومبي كان مسبب له مشاكل كتير، بس هما ماصدقهوش لسببين، أول سبب ان شيموس فينيجان لما طلب منه يحكي لهم اتخلص ازاي من الزومبي، وشه احمر وقعد يتوه في الكلام ويتكلم عن الجو، والسبب التاني، ان كان في ريحة غريبة طالعة من العمة، والتوأم ويزلي كانوا متأكدين انها محشية توم عشان تحمي الأستاذ كويريل من مصاص الدماء منين مايروح. هاري حس بالراحة لما لقى انه مش متأخر عن زمايله أوي زي ما كان فاكر، كتير من الطلبة كانوا من عائلات عامية، وزيهم زيه، لحد قريب خالص ماكانوش يعرفوا انهم سحرة ولا يعرفوا أي حاجة عن السحر، وكان قدامهم حاجات كتير أوي لازم يتعلموها.  حتى الطلبة اللي من عائلات سحرية زي رون، ماكانوش يعرفوا عن السحر حاجة ليها لازمة ممكن تساعدهم في الدراسة.  

يوم الجمعة كان يوم مهم جدا لهاري ورون، ده أول يوم يوصلوا فيه للقاعة الكبيرة ساعة الفطار من غير مايتوهوا في القلعة.  سأل هاري رون وهو بيحط سكر على طبق الشوفان (احنا عندنا حصص ايه النهاردة ؟ )

 قال رون ( عندنا حصتين وصفات ورا بعض، هناخدهم مع منزل سليذرين، سنايب هو رئيس منزل سليذرين وبيقولوا انه دايما بيفضلهم على باقي التلاميذ، أدينا هنشوف النهاردة الكلام ده بجد ولا ايه)

 قال هاري ( ياريت كانت الأستاذة ماكونجال بتفضلنا على باقي التلاميذ)

 الأستاذة ماكونجال كانت رئيسة بيت سليذرين، بس ده مامنعهاش من إنها تديهم واجبات بالكوم امبارح.

وفي اللحظة دي وصل البريد، اول يوم لهاري في هوجورتس، اتخض لما لقى يجي ١٠٠ بومة داخلين من باب القاعة الكبيرة وبيلفوا ويدوروا بين الترابيزات، لحد ما كل بومة تلاقي صاحبها وتحدف عليه جواب او لفة، بس هاري خلاص اتعود وماعادش بيتخض.

هدويج ماجابتش لهاري أي بريد لحد دلوقتي، بس ساعات كانت بتيجي تنقره في ودنه لحد مايديها لقمة عيش ، تاكلها وتروح تنام مع باقي البوم في برج البوم، بس النهاردة الصبح جات هدويج ووقفت بين طبق المربى والسكرية وحدفت لهاري ورقة صغيرة متطبقة فتحها هاري فورا ولقى فيها كتابة بخط وحش جدا زي نبش الفراخ بتقول ( عزيزي هاري، عارف ان عندك وقت فاضي يوم الجمعة بعد الضهر، ايه رأيك تيجي تشرب معايا الشاي في حدود الساعة ٣؟ عايز اسمع منك كل اللي حصل في المدرسة الأسبوع ده، ابعت لي الرد مع هدويج.              هاجريد

أخد هاري ريشة رون وكتب على ضهر الورقة ، ( أكيد هاجي ، شكرا) وبعت الورقة مع هدويج تاني.

من حسن حظ هاري ان كان عنده ميعاد مع هاجريد يستناه، لأن حصة الوصفات اللي هياخدها بعد شوية، هتبقى أسوء حاجة حصلت لهاري لحد دلوقتي.

في احتفال بداية الدراسة، حس هاري ان الأستاذ سنايب مش بيحبه، لكن بعد حصة الوصفات اكتشف انه كان غلطان، سنايب مش ماكانش بيحب هاري، سنايب كان بيكرهه.

صف الوصفات كان تحت في السرداب، الجو كان أبرد من باقي القلعة، والصف كان شكله مخيف كفاية، حتى من غير البرطمانات المرصوصة على الجدران وفيها حيوانات محفوظة بتعوم في سائل غريب.

سنايب كمان أخد الغياب في أول الحصة زي فليتويك، وزيه برده وقف عند اسم هاري، بس سنايب على عكس فليتويك قال بهدوء ( اه، هاري بوتر، نجمنا المشهور الجديد)

 دراكو مالفوي واصحابه كراب وجويل غطوا بقهم بإيديهم وضحكوا من تحت لتحت.

بعد ما سنايب أخد الغياب ، بص للطلاب، عينيه كانت سودة زي عنين هاجريد، بس ما كانتش طيبة وحنينة زيهم، كانت باردة وفاضية وتفكر اللي يبص فيها بالأنفاق الضلمة.

 بدأ سنايب يتكلم ( انتم هنا عشان تتعلموا علم الوصفات، ده علم دقيق ومعقد وفن شديد الإتقان) كان بيتكلم بصوت واطي زي الهمس، بس كانوا سامعين كل كلمة وكل حرف بيقوله، سنايب كان زي ماكونجال بالظبط، عنده موهبة التحكم في الفصل ومنع الكلام من غير أي مجهود ( مافيش في المادة دي حركات غبية بالعصاية السحرية، عشان كده كتير منكم مش هيقتنعوا ان اللي بنعمله هنا سحر ، انا مش منتظر منكم انكم تفهموا روعة الوصفة وهي بتغلي في المرجل بهدوء والبخار بيلمع حواليها، ولا قوتها الناعمة وهي بتسري في العروق وتسحر العقل وتسبي الحواس، أنا أقدر أعلمكم ازاي تصنعوا الشهرة والمجد ، أقدر أعلمكم حتى ازاي توقفوا الموت ، بس ده طبعا لو مكنتوش شوية أغبيا ومتخلفين زي اللي بعلمهم دايما)

 الفصل كان ساكت تماما، هاري ورون كانوا بيبصوا لبعض بقلق ودهشة، أما هرميوني جرانجر فكانت قاعدة على طرف الكرسي مش على بعضها، مستنية الفرصة عشان تثبت انها مش متخلفة ولا غبية.

 فجأة قال سنايب ( بوتر، لو حطيت مسحوق جزور البروق على منقوع الشيح هيديني ايه ؟)

 بص هاري لرون لقاها مذهول زيه تماما، بس هرميوني رفعت ايدها لفوق عشان تجاوب على السؤال الغريب.

قال هاري ( مش عارف يا أستاذ )

 لوى سنايب شفايفه في سخرية وقال ( الظاهر ان الشهرة مش كل حاجة )

 تجاهل ايد هرميوني اللي لسة مرفوعة وقال ( نجرب سؤال تاني يا بوتر، لو قلت لك هاتلي بيزور هتجيبه منين؟)

 رفعت هرميوني ايدها لفوق أوي، لأعلى ارتفاع ممكن توصله من غير ماتقوم من مكانها، بس هاري ماكانش عنده أي فكرة ايه هو البيزور ده أصلا.

حاول مايبصش ناحية مالفوي واصحابه اللي كانوا بيتهزوا من الضحك وقال ( مش عارف يا أستاذ)

 (انت مافتحتش ولا كتاب قبل ما تيجي المدرسة يا بوتر؟؟ ) هاري أجبر نفسه انه يفضل يبص لعنين سنايب الباردة، طبعا هاري فتح كتبه لما كان في بيت عيلة درسلي وقرا فيها شوية، بس هو سنايب مستني انه يفتكر كل اللي مكتوب في كتاب الف عشب وفطر سحري؟

 سنايب فضل متجاهل ايد هرميوني المرفوعة على آخرها وقال ( ايه هو الفرق بين نبات قلنسوة الراهب ونبات خانق الذئب يا بوتر؟)

هنا هرميوني ماقدرتش تفضل قاعدة، وقفت ورفعت ايدها اكتر لحد ما كانت هتلمس السقف.

رد هاري بهدوء ( مش عارف، بس تقريبا هرميوني عارفة، ليه ماتسألهاش هي أحسن؟)

 شوية من الطلبة ضحكوا، وشيموس غمز لهاري لما بص له، بس سنايب ماكانش مبسوط باللي قاله هاري، زعق لهرميوني وقالها ( اقعدي ) وقال لهاري ( لمعلوماتك يا بوتر، لو خلطت البروق ومنقوع الشيح، هيديك وصفة منومة قوية جدا لدرجة انهم بيسموها بروفة الموت الحي، والبيزور حصوة متاخدة من معدة معزة، وتقدر تنقذك من معظم السموم، أما قلنسوة الراهب وخانق الذئب فالاتنين هما نفس النبات وبيسموه كمان اكونتين او تاج الملوك، انتم ما بتكتبوش اللي بقوله ليه؟)

 أخد الطلاب ريشاتهم وأوراقهم وبدأوا يكتبوا اللي قاله، ومن وسط الدوشة قال سنايب ( هخصم نقطة من جريفندور بسبب وقاحتك يا بوتر )

للأسف الأمور ما تحسنتش بالنسبة لطلبة جريفندور في الوقت الباقي من الحصة.

 قسم سنايب الطلبة لمجموعات من طالبين عشان يصنعوا وصفة بسيطة لعلاج الحبوب والدمامل، وفضل يلف بينهم بروبه الأسود الطويل ويراقبهم وهما بيوزنوا نبات القراص المجفف وبيطحنوا أنياب التعابين. كان بينتقدهم كلهم ماعدا مالفوي اللي كان واضح جدا انه تلميذه المفضل، سنايب طلب من باقي الطلاب يبصوا لوصفة مالفوي والطريقة المتقنة اللي سوى بيها الحلزون، بس فجأة سمعوا صوت زن وفوران والفصل اتملا بدخان اخضر حمضي.

ماحدش عارف ازاي، لكن نيفيل دوب مرجل شيموس والوصفة الحارقة اللي فيه سالت على الأرض وبدأت تاكل جزمهم، وفي ثواني كان الفصل كله واقف على الكراسي عشان يبعد عن الوصفة اللي غطت الأرض، اما نيفيل فالوصفة طرطشت عليه وملت ايديه ورجليه بالحبوب المؤلمة، وبدأ يأن من الألم.

قال سنايب بغضب ( انت ولد غبي ، أكيد حطيت شوكة القنفد في المرجل قبل ماتنزله من على النار) وحرك عصايته حركة واحدة شالت كل الوصفة من على الأرض.

نيفيل كان بيأن ويتأوه من الألم ، الحبوب بدأت تملا وشه كمان، قال سنايب لشيموس ( ياللا خده وديه المستشفى ) وبعدين بص لهاري ورون اللي كانوا بيشتغلوا جنب نيفيل وقال ( وانت يا بوتر، مامنعتوش ليه يحط شوكة القنفد على النار، كنت فاكر ان لما وصفته تبوظ ووصفتك تنجح، ده هيخليك تبان شاطر يعني، وادي كمان نقطة هخصمها من جريفندور)

 اللي حصل ده كان ظلم، مافيش كلام، بس لما حاول هاري يفتح بقه عشان يدافع عن نفسه، رون خبطه في رجله وقاله بصوت واطي ( بلاش تجادله، انا سمعت ان سنايب ممكن يكون سيء جدا ).

حصة الوصفات خلصت بعد ساعة تقريبا، هاري كان محبط جدا وبتدور في راسه أفكار سيئة وهو طالع على سلم السرداب بعد الحصة، معقولة يتسبب في خسارة جريفندور لنقطتين في أول أسبوع له في المدرسة، هو سنايب بيكرهه اوي كده ليه؟

قال له رون ( ماتزعلش، سنايب دايما بيخصم نقط من فريد وجورج كمان، ايه رأيك آجي معاك عند هاجريد؟)

الساعة تلاتة الا خمسة، طلع هاري ورون من القلعة ، وراحوا لكوخ هاجريد الخشبي على أطراف الغابة المحرمة. قدام باب الكوخ كان في جزمة بلاستيك عملاقة وقوس صيد ضخم، ولما خبط هاري على الباب، سمعوا صوت خربشة قوية ونباح عالي وعنيف، وبعدين سمعوا صوت هاجريد بيقول ( ارجع لورا يا فانج، ياللا ارجع لورا )

فتح هاجريد الباب شوية، وظهر وشه المتغطي بالشعر من ورا الباب وقال لهم ( استنوا ثواني، ارجع ورا يافانج، ياللا) وبعدين سمح لهم يدخلوا وهو لسة بيحاول يسيطر على كلب صيد اسود ضخم، وبيشده من طوقه عشان يبعده عن الباب.

كوخ هاجريد كان عبارة عن أوضة واحدة كبيرة، متعلق في سقفها لحم وطيور مدخنين، وعلى النار كان في غلاية نحاس كبيرة مليانة ماية بتغلي، وفي الركن سرير ضخم عليه مفرش مصنوع من مربعات كتيرة من القماش الملون.

قال هاجريد ( اتفضلوا، خدوا راحتكم، البيت بيتكم )

هاجريد ساب طوق فانج من ايده، فراح فانج على طول ناحية رون وبدأ يلحس ودانه، فانج كان زي هاجريد بالضبط، طيب وبيحب الناس، مش شرس زي ما شكله ممكن يخدعك.

قدم لهم هاجريد طبق كبير مليان بالكيك الصخري، وبدأ يصب المياة السخنة في براد الشاي ، قال هاري ( ده رون صاحبي )

بص هاجريد للنمش اللي في وش رون وقال ( اااه ، ويزلي تاني، أنا قضيت نص عمري بجري ورا اخواتك التوام عشان امنعهم يدخلوا الغابة)

الكيك الصخري كان اسم على مسمى، حتى الزبيب اللي فيه كان صخري، لدرجة انه كان هيكسر سنانهم اكتر من مرة، بس هاري ورون تظاهروا انه عاجبهم وأكلوا منه وهما بيحكوا لهاجريد عن كل اللي حصل لهم في المدرسة طول الأسبوع، ساب فانج ودان رون، ونام على رجل هاري وغرق روبه تماما باللعاب.

هاري ورون كانوا مبسوطين لما هاجريد قال عن فليتش انه عجوز سخيف، وقال كمان ( أما بقى مسز نوريس القطة دي، فنفسي اخليها تقابل فانج مرة، انا كل ما بطلع القلعة بتفضل ماشية ورايا خطوة بخطوة، أنا عارف ان فليتش هو اللي قالها تعمل كده)

حكى هاري لهاجريد عن اللي حصل في حصة الوصفات، وزي ما رون قال، هاجريد كمان قاله ما يزعلش، سنايب مابيحبش حد أساسا.

( بس ده شكله بيكرهني )

( ايه الكلام الغريب ده، وسنايب هيكرهك ليه؟)

هاري شك إن هاجريد كان بيحاول ما يبصش في عنيه وهو بيقوله الكلام ده.

سأل هاجريد رون ( ازيأخوك تشارلي، أنا كنت بحبه خالص لما كان طالب هنا في المدرسة، كان ممتاز في التعامل مع الحيوانات)

هاري كان بيشك ان هاجريد قصد يغير موضوع سنايب.

رون قعد يحكي لهاجريد عن أخوه تشارلي وشغله مع التنانين. هاري أخد ورقة كانت على التربيزة تحت براد الشاي، كانت خبر مقطوع من جريدة المتنبيء اليومي بيقول :

آخر أخبار اقتحام بنك جرينجوتس

لا تزال التحقيقات في حادث اقتحام بنك جرينجوتس الذي تم في ال31 من شهر يوليو مستمرة. ويسود الاعتقاد بأن وراء هذا الاقتحام مجموعة من سحرة الظلام مجهولي الهوية.

وأصر أقزام جرينجوتس أنه لم يتم سرقة أي شيء من خزائن البنك، وأن الخزينة التي تم اقتحامها كان قد إخلاؤها في وقت سابق من نفس يوم الاقتحام. وأضاف المتحدث الرسمي عن أقزام جرينجوتس في تصريح لها بعد ظهر اليوم ( ولكننا لن نخبركم بما كان في الخزينة، فلتكفوا عن التدخل فيما لا يعنيكم للحفاظ على سلامتكم)

هاري افتكر كلام رون في القطر عن محاولة اقتحام جرينجوتس، بس رون ماقالش امتى كانت المحاولة دي.

قال هاري ( هاجريد، اقتحام بنك جرينجوتس ده حصل يوم عيد ميلادي، ده يمكن حصل واحنا في البنك كمان)

هاري كان متأكد المرة دي، هاجريد فعلا كان بيحاول مايبصش في عينيه، ده حتى ما ردش عليه، بص كده كأن الموضوع مش مهم وقدم له حتة كيك كمان.

قرا هاري الخبر مرة تانية ، (، لقد تم إخلاء الخزينة المقتحمة في وقت سابق من نفس يوم الاقتحام) هاجريد أخلى الخزينة 713 في نفس اليوم، ده لو قلنا ان اخد اللفة الصغيرة اللي كانت فيها دي اسمه إخلا، هو ممكن يكون الحرامية كانوا قاصدين يسرقوا اللفة دي؟

رجع هاري ورون للقلعة وقت العشا، كانت جيوبهم مليانة بالكيك الصخري اللي اتكسفوا يرفضوه. هاري كان سرحان وبيفكر، زيارته لهاجريد دي شغلته أكتر من كل الدروس اللي أخدها طول الأسبوع. يا ترى هاجريد أخد اللفة من الخزينة في الوقت المناسب، قبل ما يسرقها اللي اقتحم جرينجوتس؟ وهي فين دلوقتي؟ يا ترى هاجريد عارف حاجة عن سنايب ومش عايز يقولها لهاري؟