قصة حياة فولدمورت (7) عودة سيد الظلام

 عودة اللورد فولدمورت، سيد الظلام

في الحلقة اللي فاتت وصلنا عند فولدمورت لما نجح بمساعدة بيتر بيتجرو في صنع جسم بائي تسكنه روحه، وبدأ في التخطيط للحصول على جسم كامل عن طريق وصفة قديمة جدا وقوية جدا من السحر الأسود، لكن الوصفة كانت محتاجة مكونات مش موجودة غير في بريطانيا، وهي عظمة من جسم توم ريدل الأب، والموجود طبعا في مقبرته في ليتل هالينجتون، ودم العدو، واللي أصر فولدمورت إنه يكون هاري بوتر ، عشان يقضي على أسطورة هاري بوتر الولد اللي نجا من الموت، وكمان بسبب سحر الحماية والحب اللي أنقذ هاري من تعويذة القتل قبل كده، وفضل يحميه من فولدمورت ويمنعه من لمسه أو استخدام أي تعويذة سحرية عليه. ولأن فولدمورت كان مستحوذ على جسم كويريل وكان بيحاول يقتل هاري، فسحر الحب والحماية عمل درع وحماية لهاري وأثر على الجسم اللي بيحمل روح فولدمورت ودمره زي ما دمر جسم فولدمورت الأصلي قبل كده، وخرجت روح فولدمورت من جسم كويريل قبل ما يموت، وإن كنت شايفة انه حتى لو مات فده ماكانش هيأثر على روح فولدمورت لأنها متعلقة بالعالم المادي بسبب الهوركوركس.

وده السبب اللي خلى فولدمورت يصر انه يستخدم دم هاري بوتر في وصفة السحر الأسود اللي هترجع جسمه تاني، عشان يضمن ان دم هاري بقى جزء منه، وانه يقدر يتخطى حماية سحر الحماية والحب ويقدر يلمس هاري من غير ما جسمه يتضرر ويقدر يوجه له أي تعويذة ويقضي عليه.

بس عشان ده كله يحصل، كان لازم فولدمورت يرجع بريطانيا.

 أخد بيتر بيتجرو فولدمورت ورجعوا لبريطانيا تاني، واستقروا في بيت عيلة ريدل القديم في ليتل هانجليتون.

في نفس الوقت كان بدأ كاس العالم للكويدتش، وقدرت قزمة المنزل وينكي إنها تقنع بارتي كراوتش الأب إنه ياخد بارتي الابن معاه تحت عباية الإخفاء، لحضور المباريات اللي كان بيحبها جدا، ودي كانت أول مرة يخرج من البيت بعد سنين من الحبس، لكن بارتي الابن خدع وينكي وسرق عصاية هاري بوتر اللي كان قاعد قدامه، وهرب منها بعد انتهاء المباراة، واستغل الفوضى اللي حصلت لما مجموعة من أكلة الموت عذبوا عيلة من العامة، وقام برسم علامة سيد الظلام في السما وده أرعب كل السحرة بما فيهم أكلة الموت نفسهم.

لكن حريته مادامتش غير دقايق، وقدر أبوه يقبض عليه تاني ويرجعه للبيت تحت تأثير تعويذة التحكم.

فولدمورت كان محتاج  لمساعد جديد ينفذ خطته، لأنه بيحتاج بيتجرو معاه بشكل مستمر، يغذيه ويخدمه زيه زي الطفل الرضيع، ولأن فولدمورت كان شايف نفور بيتر من شكل جسمه البدائي، وأد إيه هو جبان وماعندوش ولاء غير لنفسه واللي يوفر له الحماية وبس، كان بيشك إنه لو بعته في أي مهمة، هيروح ومش هيرجع تاني ، فلما عرف بوجود تابعه الأمين شديد الولاء، واللي كان ساحر موهوب كمان، بارتي كراوتش الابن، قرر يخلصه من سيطرة أبوه، ويستخدمه لتنفيذ خطته في الحصول على جسم كامل.

 راح فولدمورت وبيتجرو لبيت بارتي كراوتش الأب، وحرر فولدمورت بارتي الابن من تعويذة التحكم، وسيطر على الأب بنفس التعويذة وأمره يتابع شغله في الوزارة عادي عشان مايلفتش الأنظار بغيابه.

أمر فولدمورت بيتجرو وبارتي كراوتش الابن، انهم يخطفوا الكشاف السابق اليستور مودي، واللي هيدرس مادة الدفاع ضد فنون السحر السود في  هوجورتس السنة دي. وفعلا قدروا انهم يخطفوه، واتحكم فيه بارتي كراوتش الابن عن طريقة تعويذة امبريوس كيرس وحبسه في صندوقه السحري اللي كان من برة شكله زي صندوق هدوم عادي جدا، لكنه من جوة زي الزنزانة السحرية اللي بتتوسع لدرجة انها تاخد شخص بالغ. اتنكر بارتي الابن في شكل اليستر مودي عن طريق وصفة البولي جوس، وأخد مكانه كمدرس لمادة الدفاع ضد فنون السحر الأسود في هوجورتس. وطبعا اكتفى بحبس مودي و ماقتلوش عشان يحصل على مخزون مستمر ومتجدد من شعره لوصفة البولي جوس اللي هيحتاجها لمدة سنة دراسية كاملة، وتحت تأثير تعويذة التحكم كان بيعرف منه كل المعلومات اللازمة عن حياته وتاريخه وطباعه وعلاقته بكل اللي حواليه. أتقن بارتي الابن دور اليستر مودي لدرجة إن ماحدش شك فيه للحظة، ويمكن اللي ساعده كمان ان مودي كان معروف بغرابة تصرفاته، يعني لما كان دايما ماسك في ايده ازازة صغيرة بيشرب منها وصفة البولي جوس باستمرار عشان يحافظ على شكل مودي، الكل كان فاكر انه ما بيشربش من أي حاجة تتقدم له وبيحضر مشروبه الخاص لأنه مصاب بالباراونيا وخايف حد يسممه.

بدأت دورة ألعاب السحرة الثلاثية في هوجورتس، باشتراك مدرسة بوباتون ومدرسة درامسترونج مع هوجورتس طبعا، وكان اختيار المتسابقين بيتم عن طريق وضع اسماء كل الطلاب اللي عايزين يشتركوا من كل مدرسة في كاس النار المسحور، والكاس كان بيختار اسم طالب واحد بس من كل مدرسة، عشان يمثل مدرسته، وكان في شرط وضعه منظمين المسابقة، لازم يتوفر في الطالب اللي يحط اسمه في كاس النار، لازم يكون سنه مايقلش عن ١٧ سنة، ومن لحظة اختياره بيكون وافق على عقد سحري لا يمكن حله او الرجوع عنه بأي شكل ، بيمنعه عن التراجع او ترك المسابقة الا بعد انتهائها تماما. وفي يوم اختيار المشاركين اختار كاس النار سيدريك ديجوري عشان يمثل هوجورتس، واختار فلور ديلاكور عشان تمثل بوباتون، وفيكتور كرام عشان يمثل درامسترونج. لكن بعد ما تم اختيار المشتركين التلاتة بلحظات، خرجت من كاس النار ورقة رابعة عليها اسم هاري بوتر. سادت حالة ذهول بين الحضور، ازاي الكاس يختار ٤ مشاركين مع ان الدورة ثلاثية بين ٣ مدارس بس؟ وازاي يختار هاري وهو يا دوب لسة ١٤ سنة بس؟ ازاي هاري قدر يتجاوز تعويذة خط العمر اللي رسمه دامبلور بنفسه عشان يمنع الطلاب الأصغر من السن المطلوب من انهم يحطوا اسمهم في كاس النار؟ ولما قال هاري انه ماحطش اسمه في الكاس زادت حيرتهم، امال مين اللي حط اسمه وبيقصد ايه بكده؟ وبالرغم من انهم كانوا شبه متأكدين ان اللي حط اسم هاري قاصد يوصله لهلاكه ويتخلص منه، الا انهم ماقدروش يخرجوا هاري من المسابقة، زي ماقلنا اختيار كاس النار للمتسابق عقد ملزم مستحيل التراجع عنه.

 كل اللي حصل ده كان جزء من خطة فولدمورت وبارتي كراوتش الابن للوصول لهاري بوتر واستخدام دمه في وصفة السحر الأسود اللي هترجع فولدمورت لجسمه الكامل واستعادته  لقواه السحرية.

 بارتي الابن كان ساحر ذكي وموهوب وقوي، قدر يخدع كاس النار باستخدام تعويذة قوية جدا من سحر الخداع، وأوهمه ان المسابقة بيشترك فيا ٤ مدارس مش ٣ ، وحط اسم هاري كمتسابق وحيد عن المدرسة الرابعة عشان يكون هو الخيار الوحيد قدام كاس النار، اللي اختاره بالفعل كممثل للمدرسة المزعومة، وأصبح هاري بوتر متسابق رسمي في دورة السحرة.

لكن دي كانت الخطوة الأولى بس، الخطة هدفها ان هاري بوتر يكسب المسابقة مش بس يشارك فيها، لكنه سنه أصغر من باقي المشاركين، وطبعا خبرته أقل، ومعرفته بالتعاويذ اللي ممكن تساعده على الفوز تعتبر شبه معدومة، عشان كده كان لازم بارتي كراوتش الابن المتنكر في شكل ماد اي مودي، يساعد هاري بوتر على الفوز، لكن مساعدته لازم تكون غير ملحوظة بالمرة ولا حتى لهاري نفسه.  في المهمة الأولى لفت نظر هاجريد انه يقول لهاري عن ان المهمة هتكون عن التنانين، وبشكل مش مباشر أرشد هاري لاستخدام موهبته في الطيران عشان ياخد البيضة من التنين.

بارتي كمان قال لسيدريك على طريقة فتح البيضة الذهبية وهوعارف انه أكيد هيرد لهاري مساعدته له لما عرفه ان المهمة الأولى عن التنانين، وهيقوله على الطريقة الصح لفتح البيضة ومعرفة المهمة التانية. ولأن هاري لسة ماعندوش خبرة، فكان بارتي عارف انه مستحيل يقدر يتوصل لوحده لطريقة تخليه يتنفس تحت المية في المهمة التانية، وحاول يساعده عن طريق ان يدي لنيفيل لونجبوتم كتاب عن الأعشاب بيتكلم في جزء منه عن عشب جليويد اللي بيساعد اللي ياكله على التنفس تحت المية، ولما نيفيل ما أخدش باله من العشب ده، اتعمد بارتي انه يتكلم عن العشب مع الأستاذة ماكونجال قدام دوبي القزم صديق هاري، اللي بالفعل أخد العشب من دولاب أعشاب الأستاذ سنايب واداه لهاري.

وفي آخر مهمة كان لازم اللي يفوز يوصل للكاس الموجود جوة المتاهة بعد ما يتخطى بعض العقبات السحرية.

تطوع بارتي كراوتش المتنكر في شكل ماد اي مودي انه يحط الكاس في المتاهة، لكن قبل مايحطه كان حوله لبورتكي او ناقل سحري، اللي هيلمسه هيتنقل لمقبرة ليتل هانجليتون عند فولدمورت. أكيد خطر على بالكم السؤال ده، ليه بارتي كراوتش ماقبضش على هاري بوتر طول السنة الدراسية او حول اي غرض تاني لبورتكي يوصل هاري للمقبرة؟ ليه كل التعب ده في إنه يدخله المسابقة ويساعده يوصل للكاس، بس عشان ينقله للمقبرة؟ اختفاء هاري بوتر كان هيلفت الأنظار بالتأكيد والكل هيدور عليه وعلى سبب اختفاؤه وممكن يمنعوا فولدمورت من تنفيذ خطته في الرجوع، ويقضوا عليه تماما، لكن اختفاء هاري بوتر من المتاهة في دورة السحرة، كان هيتفسر على إنه حادثة سحرية مؤسفة زي كل الحوادث اللي حصلت في الدورات السحرية اللي قبل كده، وخصوصا ان هاري سنه صغير وخبرته ماتساعدوش خالص في تخطي عقبات المتاهة، وبالتالي الموضوع هيعدي بدون شوشرة ولا بحث وفولدمورت هياخد كل الوقت اللي محتاجه للرجوع لكامل قوته.

عشان بارتي كراوتش الابن يضمن ان هاري يوصل للكاس، صعق فلور ديلاكور وخرجها من المسابقة، وسحر فيكتور كرام وخلاه يهاجم سيدريك ديجوري، لكن هاري لحقه في الوقت المناسب وأنقذه ووصلوا الاتنين للكاس في نفس الوقت، واتفقوا انهم يمسكوه مع بعض ويقتسموا المركز الأول، وفي لحظة لمسهم للكاس اتنقلوا هما الاتنين لمقبرة عيلة ريدل في ليتل هانجليتون.

أول ما اتنقلوا للمقبرة، ظهر فولدمورت في جسمه البدائي مع بيتر بيتجرو، وأمر بيتر بقتل سيدريك ديجوري فقتله بتعويذة القتل المحرمة أفاداكاديفرا، وربط هاري في شاهد قبر توم ريدل الأب.

بيتر كان محضر مرجل كبير كفاية إنه ياخد شخص بالغ، وفيه المكونات الولية لوصفة السحر الأسود اللي هترجع جسم فولدمورت. وضع بيتر فولدمورت في المرجل، ووضع معاه عظمة طلعها من قبر توم ريدل الأب، وأخد سكينته  وقطع ايده اللي ضحى بيها بإرادته وحطها في المرجل، وأخيرا جرح ايد هاري المربوط في شاهد القبر، واخد  نقط من دمه أضافها كمكون أخير للوصفة السحرية. وبدأت مكونات الوصفة تغلي ولونها يتحول من الأزرق للأحمر الناري وبعدين للأبيض الساطع، لحد ماتحولت لدخان ظهر منه فولدمورت في جسمه الجديد.

صحيح ملامح فولدمورت ماكانتش بشرية بشكل كامل، كانت عينيه حمرا زي الدم، وجلده شاحب جدا زي تمثال الشمع، وخالي من الشعر، ومناخيره كانت مجرد شقين بالطول زي مناخير التعبان، لكن في النهاية كان بيمتلك جسد كامل قوي قادر على ممارسة السحر.

طلب فولدمورت عصايته اللي كان بيتر محتفظ بيها من يوم سقوطه في بيت عيلة بوتر من ١٣ سنة، وأخد  إيد بيتجروا السليمة اللي كان عليه علامة الظلام، ومع عودته عادت ألوان العلامة للحياة هي كمان وأصبحت ظاهرة بشدة على إيد بيتر، استدعى فولدمورت دائرته القريبة من أكلة الموت الأقوياء الموالين له، طبعا كان في منهم اللي مات، وفي اللي في السجن في أزكبان زي بيلاتريكس ليسترانج وزوجها واخوه، وفي اللي هرب أول ما حس ان العلامة بتنذره بعودة فولدمورت زي ايجور كاراكوف، وفي اللي نفوا علاقتهم بيه لخوفهم من العقاب واندمجوا في العالم السحري، زي لوسيوس مالفوي وكراب وجويل وماكنير وغيرهم، وهما دول اللي حضروا للمقبرة أول ما استدعاهم.

فولدمورت كان غاضب منهم جدا لأنهم صدقوا انه مات ومادوروش عليه كويس، وماقبلش عذرهم بإنهم كانوا مستنيين أي إشارة تدلهم على مكانه، وكان شايفهم جبنا ومقصرين وأقرب للخونة كمان حتى بيتر لما قال انه دور عليه، قاله ده من خوفك بس لانك جبان ومحتاج حمايتي، لكن يكفي انك دورت عليا وساعدت في رجوعي وبدأ فولدمورت يحكي لأكلة الموت عن ليلة اختفاءه وازاي اللي خصل كان مجرد حظ، لأن تضحية ليلي بوتر فعلت سحر قديم جدا حمى هاري وخلاه مايقدرش يلمسه أو يأذيه،و تسبب في ارتداد التعويذة عليه ونجاة هاري. تفاخر فولدمورت بإنه وصل لنواحي من السحر الأسود والقوة خلته يتغلب على الموت ويصبح خالد تقريبا وحكى كمان ازاي التصق بكويريل وحاولوا يوصلوا لحجر الفيلسوف وازاي فشل كويريل في الحصول على الحجر واضطر فولدمورت يرجع للاختباء تاني لحد ما وصل له بيتجرو ورجعه ليهم النهاردة، وكافيء بيتجروا بإيد سحرية من الفضة بدل الايد اللي ضحى بيها. كل ده وهاري بوتر متعلق على شاهد القبر بيسمعه.

 لما خلص فولدمورت كلامه مع أكلة الموت اتجه لهاري واتأكد انه خلاص بقى يقدر يلمسه بكل سهولة، وفضل يسخر منه شوية وبعدين حرره من شاهد القبر عشان يبارزه بالعصى السحرية ويتخلص منه للأبد، ويثبت قوته وضعف هاري وان اللي حصل كان مجرد صدفة وسوء تقدير مش أكتر، ويقتل أي ذرة شك في قلوب أتباعه من أكلة الموت.

 أمر فولدمورت هاري انه ينحني ليه عشان يبدأوا المبارزة ولما رفض هاري، ألقى عليه تعويذة امبريوس كيرس عشان يجبره ينحني ليه ويبدأ المبارزة.  انحنى هاري لكنه كان رافض يبارزه فاستخدم فولدمورت تعويذة التعذيب كروشيو على هاري مرتين. المرة الأولى كانت لفترة بسيطة لكنها سببت لهاري ألم فظيع. وفي تاني مرة وجهها له قدر هاري يقاومها بشكل جزئي خلاها مش مؤلمة أوي زي المرة الأولى وده أغضب فولدمورت جدا وأذهله في نفس الوقت، ازاي الولد ده قدر يقاوم تعويذة التعذيب ولو بمقدار صغير جدا، ماكانش يعرف ان خادمه المطيع بارتي كراوتش المتنكر في هيئة اليستر مودي، هو اللي علم طلبته في هوجورتس من غير مايقصد طبعا، ازاي يقاوموا التعاويذ المحرمة.

قام هاري وتفادى تعويذة تانية من فولدمورت واستخبى للحظات ورا شاهد من شواهد القبور واستمر فولدمورت وأكلة الموت في السخرية منه ووصفه بالجبن ولما اتأكد هاري ان مافيش مفر وانه خلاص كده هيموت على إيد فولدمورت، قرر يموت وهو بيحارب مش وهو هربان ومستخبي، وخرج من ورا شاهد القبر ووقف في مواجهة فولدمورت اللي صرخ افاداكدافرا في نفس اللحظة اللي قال فيها هاري اكسبيليراموس خرج من عصاية فولدمورت الضوء الأخضر الناتج عن تعويذة القتل، وخرج من عصاية هاري شعاع أحمر ناتج عن تعويذة التجريد من العصا، والتحم الشعاعين وكل عصاية بتحاول تهزم التانية. من عجائب القدر ان عصاية فولدمورت وعصاية هاري توأم  لأن قلبهم مصنوع من ريشتين متاخدين من طائر واحد هو طائر الفينيكس فاوكيس.

 لما عصايتين توأم بيجبروا على المبارزة، بيحصل بينهم اتصال بيؤدي لحدوث ظاهرة نادرة جدا اسمها برايوري انكنتاتوم. الشعاع الخارج من العصايتين بيتحول لخيط ذهبي بيربطهم ببعض، وبيخرج منه شرر متطاير بيكون حاجز زي القفص بين المتبارزين وكل اللي حواليهم، وبتتحول المبارزة لحرب إرادة، ياترى مين ايده هتتهز الأول ويفقد سيطرته على عصايته وتصيبه تعويذة خصمه. ومع استمرار الاتصال، واحدة من العصايتين بتجبر التانية انها تخرج صدى لآخر مجموعة عملتها من التعاويذ، وفي حالة ان التعاويذ دي تكون تعاويذ قتل، بيخرج من العصاية طيف الأشخاص اللي قتلتهم بترتيب عكسي وده اللي حصل لعصاية فولدمورت، خرج منها طيف سيدريك ديجوري وبعده فرانك بيرس العامي اللي كان بيحرس بيت عيلة ريدل وبعده خرج طيف بيرثا جوركينز وبعدين طيف ليلي وجيمس بوتر، وامتلأ المكان بصوت أغنية طائر الفينيكس. الأطياف طمنت هاري وشجعته وطلبت منه انه يركز ثواني كمان ومايفقدش السيطرة على عصايته ولا يسمح لفولدمورت يتغلب عليه، وإنهم هيشتتوا فولدمورت لثواني بسيطة عشان يمكنوا هاري من الوصول للبورتكي والرجوع لهوجورتس، وطلب منه سيدريك انه ياخد جثته معاه ويرجعها لأبوه.

أمرت الأطياف هاري انه ينزل عصايته بسرعة ويقطع الاتصال بينها وبين عصاية فولدمورت، وفي نفس اللحظة اتجهت ناحية فولدمورت وشتت انتباهه ومنعته من مواصلة الهجوم على هاري، وده أدى لهاري فرصة لمدة ثواني، جري بسرعة ناحية جثة سيدريك، واستخدم تعويذة استدعاء الأشياء اللي أحضرت الكاس أو البورتكي لإيده وأول ما لمسه اتنقل تاني لهوجورتس، وضاعت فرصة فولدمورت في التخلص من هاري بوتر للأبد.

رجع هاري لهوجورتس ومعاه جثة سيدريك وفي وسط بكاؤه الشديد وتمسكه بالجثة، قال لدامبلدور ووزير السحر والقريبين منه ان فولدمورت رجع وانه هو اللي قتل سيدريك. حصلت فوضى شديدة  وصراخ والدي سيدريك وبكائهم هما وباقي الطلاب والحاضرين ملا المكان.

بارتي كراوتش الابن اللي كان لسة متنكر في شكل اليستر مودي، انتهز الموقف وأخد هاري لمكتبه، وكان ناوي يتخلص منه بنفسه، لكنه في البداية استجوبه عن تفاصيل رجوع اللورد المظلم، وافتتانه الظاهر بفولدمورت خلا هاري يشك فيه، وبدأ بارتي يقول لهاري انه هو اللي حط اسمه في كاس النار وساعده طول المسابقة ووصله للكاس عشان ينقله للمقبرة.

دامبلدور شك ان في حاجة مش مظبوطة، لأن اليستر مودي عمره ما كان هياخد هاري بعيد عن اللي بيحصل في الملاعب والمأساة اللي كلهم حاسينها في الوقت ده. في آخر لحظة قبل ما يقدر بارتي كراوتش يقتل هاري، دخل دامبلدور وماكونجال وسنايب.صعقه دامبلدور قبل ما يستخدم تعويذة القتل على هاري، وسقاه سيفيروس سنايب وصفة الحقيقة ( فريتاسيروم )، وبدأ يحكي لهم كل شيء بالتفصيل، من أول مساعدة أبوه وأمه له على الهروب من أزكبان لحد اللي حصل الليلة دي.

تأثير وصفة البولي جوس كان اختفى لأن بارتي في وسط كل اللي حصل اليوم ده نسي ياخد جرعة منه في ميعادها. أمر كورنيليوس فادج وزير السحر بتسليم بارتي كراوتش جونيور للدمينتورز عشان يمتصوا روحه عقابا له على الهرب والتخفي في شكل اليستر، لكن وزير السحر رفض الاعتراف برجوع فولدمورت من الأساس، واعلن ان موت سيدريك كان حادث زي كل حوادث دورات السحرة السابقة.

بالرغم من ان اللي حصل في مقبرة ليتل هانجليتون، يعتبر ولادة جديدة لفولدمورت وبداية عودته  بشكل كامل لقوته السابقة، وجمع جيشه من اكلة الموت والمخلوقات المظلمة، وبداية فعلية لحرب السحرة التانية، إلا إن وزارة السحر وعلى رأسها الوزير كورنيليوس فادج، وكتير من السحرة، وخصوصا أصحاب المراكز منهم والجرايد والمتحكمين في الإعلام رفضوا رفض تام انهم يصدقوا رجوع فولدمورت، وأعلنوا بكل وضوح إن هاري بوتر كداب، وكمان دامبلدور كداب وبيسعى لزعزعة استقرار العالم السحري عشان يستولي على منصب وزير السحر ويفرض سيطرته على العالم السحري كله.

كل الإنكار ده أدى لفولدمورت فرصة ذهبية عشان يجمع اتباعه ويكون جيشه ويستجمع قوته ويفرض سيطرته على العالم السحري، ويسعى لفرض سيطرته على العالم كله.

قام فولدمورت بخطوات كتير عشان يضمن قوته وانتصاره في حرب السحرة التانية، وفي نفس الوقت قام دامبلدور وهاري بوتر وأعضاء جماعة العنقاء الجديدة بخطوات مضادة لمحاولة هزيمة فولدمورت والقضاء عليه للأبد، كل ده وأكتر هنتكلم عنه في الحلقة الجاية من قصة حياة فولدمورت.