قصة حياة فولدمورت ( سيد الظلام ) 1 - أصل الوريث

 ميلاد الوريث

فولدمورت، سيد الظلام، انت تعرف من، الذي لا ينبغي ذكر اسمه، وبالبلدي كده اللي مايتسمى، لكن قبل ما يبقى ده كله كان اسمه توم ريدل

 بس مين هو توم ريدل ؟ مين ابوه ومين امه، هل هو فعلا وريث سلازار سليزرين، ازاي وصل لملجأ من ملاجيء العامة واتربى فيه مش في العالم السحري؟ وليه اصلا اتربى في الملجأ مع ان امه بس اللي ماتت وابوه كان لسة عايش لحد ما وصل عمره ١٧ سنة

 أسئلة كتير عن أصل توم ريدل( زي ما كان بيحب يناديه دمبلدور) وأسئلة أكتر عن طفولته وشبابه قبل ما يبقى فولدمورت، وأسئلة أكتر وأكتر عن حياة فولدمورت وموته

 كل ده وأكتر هنجاوب عليه في حلقاتنا عن اللي ما يتسمى

 والنهاردة هنبدأ الحكاية من البداية وهنحكي عن أمه وأبوه وازاي لدنيا السحر جابوه

 فولدمورت ساحر هجين أبوه من العامة وامه ساحرة من نسل سحرة أنقياء الدم بيمتد نسبهم من ناحية للساحر العظيم سالازار سليزرين أحد مؤسسي مدرسة هوجورتس ومن ناحية تانية للساحر العظيم برده كادميوس بيفريل أحد الأخوة الثلاثة، الملاك الأصليين لمقدسات الموت

 أبوه توم ريدل الأب كان ولد وحيد لعائلة غنية بتعيش في ليتل هانجلتون في بريطانيا كان غني جدا ووسيم جدا ومدلل ومتعجرف جدا

 أما أمه ميروب جاونت فكانت ابنة مارفولو جاونت الساحر نقي الدم المنحدر من عيلة سحرية كانت يوما ما غنية جدا والحفيد الوحيد الباقي المعروف لسالازار سليزرين لكنه كان فقير جدا ، بيعيش في كوخ متهدم في منطقة قريبة من ليتل هانجلتون وكان عنده كمان ولد اسمه مورفن. عيلة جاونت كانت بتعاني من مشاكل جسدية وعقلية ناتجة عن أجيال متعاقبة من زواج الأقارب ( وده طبعا للحفاظ على نقاء الدم)

 كانوا مهملين جدا في نضافتهم ونضافة بيتهم ، شعرهم طويل تقيل منكوش وعليه أطنان من الأوساخ لدرجة ان لونه الطبيعي مش واضح وهدومهم قديمة مقطعة ومتوسخة، ومع اهمالهم لنضافتهم ومظهرهم كان تكوينهم الجسدي مش مضبوط، راس كبيرة بشعر كثيف وايدين اطول بكتير من الطبيعي وعنين ضيقة فيها حول،حتى بيتهم كان متوسخ بتحيط بيه الأشجار والأعشاب والطحالب زي ما يكون بيت مهجور من سنين طويلة جدا

كانوا بيعيشوا حياة الصعاليك المتشردين زي ما كان بيسميهم العامة حواليهم

وكانوا معروفين بطباعهم العنيفة واحتقارهم للعامة وتقديسهم لفكرة نقاء الدم، لكن بالرغم من فقرهم وحالتهم الجسدية والعقلية الغير سليمة كانوا سحرة أقويا العيلة كلها كانت بارسلماوث ( بتتكلم لغة الثعابين يعني) وكانوا بيتكلموها بينهم وبين بعض خصوصا في وجود أي غريب عشان مايفهمش كلامهم

 مارفولو ومورفن كانوا أقوياء في المبارزة بالعصا وإلقاء التعاويذ

 مورفن كان بيتقن السحر الأسود ومتمكن من القاء اللعنات من غير مايقولها بلسانه وده شيء بيحتاج ساحر قوي ومتمرس جدا

 مارفولو جاونت وابنه مورفن كانوا بيعاملوا ميروب معاملة سيئة جدا ، أقرب لمعاملة العبيد، يمكن حتى أسوء من معاملة أقزام المنازل

 كانت هي المسئولة عن كل الأعمال المنزلية وكانت بتتعرض للضرب والتحقير بشكل مستمر لأن أبوها كان شايف إنها سكويب ماعندهاش أي قدرات سحرية ومهما حاولت تستخدم عصايتها السحرية او تنفذ أي تعويذة كانت بتفشل فشل زريع، وده كان بيزود غضب ابوها عليها فيستمر في إهانتها وضربها وأخوها كمان كان بيعاملها بنفس الطريقة وكان بيضحك جدا كل ما ابوها يزعق لها او يضربها

 طيب ازاي توم ريدل اتعرف على ميروب جاونت؟

 زي ما قلنا ، عيلة جاونت كانت بتعيش على أطراف البلدة اللي بتسكنها عيلة ريدل ، وكان توم ريدل دايما بيمر على كوخ عيلة جاونت وهو بيتفسح بحصانه، بس ما كانش يعرف عنهم غير ان مارفولو جاونت راجل متشرد فقير عنيف مابيحبش الناس وبيعاملهم معاملة سيئة، وعنده ابن بيشبه تماما في كل شيء وبنت مايعرفش عنها حاجة ولا كانت بتخطر في باله أبدا

 لكن ميروب جونت كانت بتشوف توم ريدل الوسيم على حصانه كل ما يمر من جنبهم ومع الوقت اتعلقت بيه جدا ، من غير مايعرف طبعا

 لكن أخوها مورفن شافها وهي بتبص على توم كل يوم وعرف انها معجبة بيه ، وده طبعا مصيبة كبيرة ازاي ساحرة من عيلة جونت أنقياء الدم تتعلق بولد قذر من العامة، ولأن مورفن عقله مش مضبوط ومابيلتزمش كمان بقوانين السحرة ألقى لعنة على توم ريدل الأب اتسببت في اصابته بالدمامل المؤلمة

 وصل الموضوع لوزارة السحر وبعد ما عالجوا توم ريدل ومسحوا ذاكرته، بعتوا رئيس قسم تنفيذ القانون السحري شخصيا عشان يبلغ مورفن باستدعاؤه لجلسة استماع في محكمة السحرة

لكن مورفن صرخ فيه وهدده بعصاه وسكينه ومارفولو كمان زعق له لأنه تجرأ على استدعاء سحرة أنقياء الدم من نسل السحرة العظام بس لأن ابنه لعن واحد قذر من العامة

 في الوقت اللي كان مارفولو بيوري مندوب الوزارة خاتم وقلادة هي كل  ممتلكاته اللي وارثها عن جدوده العظماء عشان يثبت له عظمته وانه فوق المساءلة ( الخاتم كان عليه شعار كادميوس بفيريل والقلادة عليها شعار سلازار سلزرين) مر توم ريدل الأب على حصانه من جنب كوخهم المتهدم ومعاه صديقة له اعترضت على وجود الكوخ القذر ده في أرضه فقال لها توم ان الكوخ والمنطقة دي مش من أملاكهم لكنها ملك لمتشرد قذر عنيف غريب الأطوار اسمه مارفولو جاونت واللي عنده ابن زيه بالضبط ويمكن أسوء

عيلة جاونت كانت سامعة كل كلامه ، عشان كده حاول مورفن انه يطلع له عشان يلعنه تاني لكن ابوه منعه عشان وجود مندوب وزارة السحر، لكن لما مورفن سمع توم ريدل بيتكلم مع صديقته وبيقول لها ياعزيزتي ، ضحك على أخته ميروب وقال لها ان العامي القذر اللي هي معجبة بيه مش شايفها ومعجب بالعامية اللي زيه

 ابوهم ماكانش لسة يعرف حاجة عن اعجاب ميروب بتوم ريدل، عشان كده أول ما مورفن شرح له الحكاية وشرح له ان ده سبب لعنه لتوم ريدل في الأساس، اتجنن مارفولو وبدأ يهاجم بنته ويختقها ويحاول يلعنها بعصاه كل ده في وجود مندوب الوزارة اللي كان غاضب جدا لأنه مش فاهم ولا كلمة من كلامهم ومتضايق أكتر من صويت الفحيح اللي مالي المكان، ولما حاول مارفولو خنق ميروب ، تدخل مندوب الوزارة والقى تعويذة تفرقهم عن بعض ، وده خلى مارفولو ومورفن الاتنين يهاجموه بسيل من التعاويذ الغير منطوقة ويبارزوه بالعصيان ولأنهم كانوا سحرة أقويا زي ما قلنا، ماقدرش عليهم مندوب الوزارة وانتقل بسرعة للوزارة ورجع بمجموعة من السحرة ، اللي حاولوا القبض على مارفولو ومورفن ونجحوا بعد مقاومة كبيرة منهم ومبارزة وتعاويذ بتطير في كل مكان. تمت محاكمة مارفولو جاونت بتهمة إساءة معاملة وتعريض حياة ساحرة للخطر ومقاومة الاعتقال وتم الحكم عليه بالسجن في أزكبان لمدة ٦ شهور ، أما مورفن فتمت محاكمته بتهمة استخدام السحر على العامة وتعريض حياة عامي للخطر ومقاومة الاعتقال وإصابة مندوب الوزارة وتم الحكم عليه ب٣ سنين كاملة في سجن أزكبان.

 بعد التخلص من معاملة أهلها السيئة وإهانتهم وتعذيبهم لها ، بدأت قوى ميروب السحرية في الظهور بوضوح وتبين انها مش سكويب ولا حاجة وان عنف ابوها وأخوها وتعذيبهم لها كان السبب في كبت موهبتها السحرية

 ميروب كانت مش جميلة ولا غنية ولا متعلمة، ده غير انها كانت بتفقد أقل مقومات إقامة علاقة اجتماعية مع أي حد عشان كده كان من الصعب ، ويمكن المستحيل، انها بس تلفت انتباه توم ريدل الغني الوسيم المدلل

 مش معروف ازاي ميروب اتعلمت السحر لأن مافيش أي حاجة تقول انها راحت هوجورتس، ممكن يكون أهلها علموها بس الأكيد انها نمت موهبتها الفطرية بعد تخلصها من سيطرة وعنف ابوها واخوها

وبعد فترة بسيطة ميروب سابت كوخ عيلة جاونت وسابت ورقة صغيرة بتقول فيها إنها هتتجوز توم ريدل.

 ماحدش عارف اللي حصل بالضبط، بس فجأة توم ريدل أخد ميروب وهربوا على لندن واتجوزوا هناك، وده كان صدمة لكل العامة اللي بيعيشوا في القرية، ازاي توم ريدل الغني الوسيم الشاب ابن صاحب الأرض يسيب كل ده ويهرب مع ميروب القبيحة بنت المتشرد .

 الحاجة الوحيدة اللي ممكن تفسر اللي حصل، ان ميروب ساحرة ، وساحرة قوية كمان، متمكنة من فنون السحر الأسود وتصنيع الوصفات، لأن دي الطريقة الوحيدة اللي تخليها تقدر تقنع توم ريدل يتجوزها ، يا إما عن طريق تعويذة تحكم ( امبريوس كيرس) او عن طريق وصفة حب (لوف بوشن).

وزي ما توم ساب القرية فجأة ، رجع فجأة بس من غير زوجته ميروب، ولما سألوه عنها وازاي اصلا اتجوزها ، قال انها خدعته وضحكت عليه ، هو كان يقصد انها سحرته لكن ماقدرش يقول كده عشان طبعا هيتهموه بالجنون، واهل القرية قالوا انها أوهمته أنها حامل في ابنه عشان كده اتجوزها.

بس يا ترى ايه اللي حصل وخلى توم ريدل يسيب ميروب ويرجع القرية التاني؟

ايه اللي خلى مفعول تعويذة التحكم او وصفة الحب يبطل؟

لأن ميروب ماقالتش لحد ايه اللي حصل ، وتوم ريدل كمان ماقالش ، ده ان كان عرف فعلا ، كان على دمبلدور انه يخمن .

ميروب كانت بتحب زوجها جداا ،  وحقيقة انه كان معاها بس لأنه تحت تأثير تعويذة أو وصفة ، كانت بتألمها

لما عاشت معاه فترة، وبعدين حملت في ابنهم، فكرت انه ممكن يكون حبها بصدق لما عاش معاها وعرف شخصيتها الحقيقية ومقدار حبها ليه، أو انه على الأقل هيختار يكمل معاها بإرادته عشان خاطر ابنهم الجاي

لكن للأسف أول ما تأثير السحر راح عن توم ريدل واسترد وعيه ساب ميروب من غير تردد وماسألش عنها أو عن ابنه المنتظر تاني أبدا ، ولا فكر للحظة يا ترى هيكون ايه مصيرهم من بعده.

بعد ما هجرها زوجها ، فضلت ميروب في لندن ومارجعتش تاني لكوخ ابوها، ولأنها توقف عن استخدام السحر تماما ماكانش قدامها اي مصدر رزق غير انها تبيع الحاجة الوحيدة اللي كانت بتملكها، قلادة سلازار سليزرين، واللي باعتها ب 10 جاليون بس لكاركتاكوس بورك، واحد من مؤسسي محل بورك اند بورجن سيء السمعة، وده كان قبل فترة قصيرة جدا من ولادتها لابنها.

وفي ليلة 31 ديسمبر سنة 1926 لما حست ميروب انها خلاص هتولد ، راحت لملجأ من ملاجيء العامة في لندن، كانت ضعيفة جسمانيا ونفسيا من الحزن وكسرة القلب وسوء المعاملة اللي شافتهم طول حياتها، وبعد ساعة واحدة من وصولها الملجأ ولدت ابنها الوحيد ، وبعدها بساعة فارقت ميروب مارفولو جاونت الدنيا.

وقبل ما تموت طلبت من موظفة الملجأ انهم يسموا ابنها توم على اسم ابوه ومارفولو على اسم ابوها وقالت لهم ان اسم عيلته ريدل

اسم مارفولو كان غريب ، عشان كده اعتقدوا في الملجأ إنها اكيد كانت بتشتغل في سيرك.

كانت امنيتها الأخيرة ان ابنها يكون شكل أبوه، وده فعلا اللي حصل.

إدارة الملجأ سمت الولد زي ما أمه طلبت، توم مارفولو ريدل واستنوا ان حد يجي يدور عليه، لكن مافيش أي حد اسمه توم أو مارفولو أو ريدل جه أبدا يسأل عن الطفل الصغير اللي اتربى وكبر في الملجأ.

لما مارفولو جاونت خرج من السجن ورجع كوخه لقاه فاضي ولقى الورقة اللي بتقول فيها ميروب انها هتتجوز العامي القذر توم ريدل، أصابته صدمة شديدة أثرت على صحته اللي كانت ضعيفة أصلا بعد تجربة السجن في أزكبان.

مارفولو ما تكلمش تاني ابدا عن ميروب ولا جاب سيرتها وبسبب ضعف صحته، أو يمكن بسبب انه ماقدرش يخدم نفسه بعد ميروب ، مات قبل ما ابنه مورفن يطلع من أزكبان.

مورفن خرج من أزكبان لقى جثة أبوه في الكوخ وبعد دفنه عاش في الكوخ لوحده. ماحاولش يدور على ميروب بالرغم من انه عرف ان توم ريدل الأب هجرها وسابها وحيدة في لندن، لأنه كان شايف انها خائنة للدم وتستاهل كل اللي يجرالها.

بس في حاجتين مش مفهومين في قصة ميروب، ليه بطلت تستخدم السحر بعد ماهجرها توم ريدل؟ وليه اختارت انها تولد ابنها في ملجأ العامة بدا ما تروح مستشفى سانت مونجو السحري؟

في فرضيتين للإجابة على الجزء الأول من السؤال

الأولى ان ميروب بعد صدمتها من هجر توم ريدل لها والحزن الشديد والقهر اللي سببه لها فقدت قواها السحرية ، أو على الأقل فقدت قدرتها على استخدامه زي ما كان بيحصل لها زمان من سوء معاملة أهلها لها.

الفرضية التانية ، وهي الأقوى وبتفسر كمان الجزء التاني من السؤال

ان ميروب كرهت السحر ورفضت استخدامه بإرادتها لأنها شافت ان السحر كان السبب في كل حاجة سيئة حصلت لها في حياتها بداية من سوء معاملة ابوها لها لعجزها عن استخدامه، وحبسهم بعيد عن الناس وإجبارهم على الحياة الفظيعة اللي كانوا عايشينها، لأنه شايف انهم كسحرة أنقياء الدم من نسل أقوى السحرة ماينفعش يختلطوا بالعامة ولا السحرة الهجين والمولودين للعامة، لأنهم طبعا أفضل وأنقى منهم، عشان كده توقفت تماما عن استخدام السحر وراحت لملجأ من ملاجىء العامة عشان تضمن ان ابنها يكون بعيد تماما عن السحرة وعالم السحر، لكنها للأسف فشلت في ده فشل زريع.

وبكده نكون عرفنا أصل وفصل فلدمورت، وفي الحلقة الجاية هنعرف حكاية توم ريدل الطفل والشاب لحد ما بقى فولدمورت.