اقرا هاري بوتر بالمصري ( مبارزة نص الليل )

 

انت بتهزر ، صح؟ كانوا بيتعشوا في القاعة الكبيرة، وهاري كان بيحكي لرون عن اللي حصل بعد ما ساب الملاعب مع الأستاذة ماكونجال. أخد رون حتة فطيرة بس قبل ما يحطها في بقه قال ( باحث؟ بس طلاب سنة أولى ما.... ده انت كده اصغر لاعب يدخل فريق منزله مننننن) ( من قرن، من ١٠٠ سنة، وود قالي كده) وقطم هاري قطمة كبيرة من فطيرته، بعد كل اللي حصل النهاردة العصر كان جعان جدااا، اما رون فكان منبهر بهاري جدا لدرجة انه قعد يبص له وهو ساكت خالص ، كمل هاري كلامه ( هبدأ تدريب الأسبوع الجاي، بس ماتقولش لحد، وود عايز يخلي الموضوع سر ) وساعتها دخل فريد وجورج ويزلي للقاعة ولمحوا هاري ورون وراحوا ناحيتهم  وقالوا بصوت واطي ( ممتاز يا هاري، وود قالنا على اللي حصل، احنا كمان بنلعب في فريق جريفندور، احنا الضاربين(

قال فريد ( أقولكم حاجة، أنا متأكد اننا هنفوز بكاس الكويديتش السنة دي، احنا مافزناش من يوم ماسابنا تشارلي، بس فريقنا السنة دي هيكون فريق عظيم، شكلك شاطر أوي يا هاري، وود كان بيتنطط من الفرحة وهو بيحكي لنا، احنا لازم نمشي دلوقتي ، لي جوردان بيقول انه لقى منر سري جديد يطلعنا من المدرسة، أراهن انه بيتكلم عن الممر اللي ورا تمثال جريجوري المحتال، الممر اللي اكتشفناه في أول اسبوع لينا في المدرسة، نشوفكم بعدين(

يادوب فريد وجورج خرجوا من القاعة، وظهر بدالهم اكتر واحد هاري ورون مش عايزين يشوفوه، جه مالفوي ووراه كراب وجويل كالعادة وقال ( ايه ده، بتاكل وجبتك الأخيرة في المدرسة يا بوتر، هتركب القطر اللي هيرجعك للعامة امتى؟( قال هاري ببساطة ( بقيت شجاع اوي دلوقتي يا مالفوي بعد ما رجعت للأرض ، وحواليك اصحابك الصغيرين دول)

 طبعا ماكانش في اي حاجة صغيرة في كراب وجويل، بس الترابيزة الكبيرة كانت مليانة مدرسين، فماكانوش يقدروا يعملوا اي حاجة أكتر من انهم يكشروا ويطقطقوا صوابعهم. بس مالفوي قال ( ممكن اواجهك لوحدي في اي وقت، الليلة لو حبيت، مبارزة سحرة ، بالعصاية بس، ماحدش يلمس التاني؟ ايه يا بوتر شكلك ماسمعتش عن مبارزة السحرة قبل كده؟( لف رون بسرعة وقال ( لا طبعا، هاري عارف كل حاجة عن مبارزة السحرة، وانا هكون بديله، مين هيكون بديلك؟(

بص مالفوي لكراب وجويل وكأنه بيقيس مين فيهم أضخم من التاني وبعدين قال ( كراب هيكون بديلي ، نتقابل الليلة، نص الليل بالظبط، في أوضة الجوايز ، دايما بتكون مفتوحة)

 مشي مالفوي وبص هاري ورون لبعض وقال هاري ( هو ايه مبارزة السحرة دي، ويعني ايه هتكون بديلي؟)

 ( بص، وظيفة البديل انه يكمل مكانك لو مت) قالها رون ببساطة وهو بياكل اخيرا الفطيرة اللي المتعلقة في ايده بقالها كتير، ولما شاف وش هاري واللي حصله قال بسرعة ( بس الناس مابيموتوش الا في المبارزات اللي بحق وحقيق، لما يكون اللي بيتخانقوا سحرة كبار ، اكتر حاجة ممكن تعملها انت ومالفوي انكم ترموا شوية شرار على بعض ، ماحدش فيكم يعرف سحر كفاية انه يضر التاني بجد، أراهن انه كان فاكرك هترفض أصلا) ( واعمل ليه لو حركت عصايتي وماخرجش منها حتى الشرار ده )

 قاله رون ( ارميها واضرب مالفوي بايديك)

( من فضلك )

بصوا لفوق وشافوا هرميوني جرانجر فقال رون ( هو الواحد ما يعرفش ياكل في هدوء هنا )

هرميوني تجاهلت رون وبصت لهاري وقالت له ( ما اقدرتش امنع نفسي من اني اسمع اللي كنت بتقوله انت ومالفوي)

قال رون بصوت واطي ( لا، بجد، لو حاولتي كنت قدرتي )

( غلط تتمشى في المدرسة بالليل، فكر هتخسر جريفندور كام نقطة لو مسكوك، فكر في منزلك، اللي هتعمله ده منتهى الأنانية) قال هاري ( اللي هعمله ده مايخصكيش خالص)

وقال رون ( مع السلامة )

مش هي دي النهاية السعيدة اللي كان هاري مستنيها لليوم ده، هي دي الفكرة اللي كانت بتدور في دماغه وهو نايم على سريره بيسمع صوت تنفس دين وشيموس اللي رايحين في النوم، اما نيفيل فلسة ما رجعش من المستشفى.

رون طول الوقت كان بيدي لهاري نصايح ( لو حاول يرميك بلعنة أحسن لك تبعد وتتفاداها، أصلي مش قادر افتكر ازاي تصد اللعنات دلوقتي) كان في احتمال كبير ان ان فليتش او مسز نوريس يمسكوهم، هاري كان حاسس ان بيدخل نفسه في مخاطرة كبيرة وبيختبر حظه أكثر من اللازم، معقولة يكسر قانون تاني كمان من قوانين المدرسة النهاردة؟ بس وش مالفوي اللئيم وضحكته الخبيثة مابيفارقوش خياله، دي فرصة عشان يهزم مالفوي وجها لوجه، فرصة مش ممكن يضيعها.

أخيرا قال رون بصوت واطي ( الساعة بقت 11 ونص، لازم نمشي دلوقتي )

لبسوا أرواب الحمام فوق البيجامات وخدوا عصيانهم السحرية، وخرجوا يتسحبوا من أوضة النوم ونزلوا على السلالم اللي بتفصل جناح الولاد عن جناح البنات ودخلوا غرفة جريفندور العامة. الفحم في الدفاية كان لسة مانطفاش ، والنور الضعيف الخارج منه حول الكراسي الكبيرة في الغرفة العامة لأشباح ضخمة محدبة، وقبل ما يوصلوا لفتحة الخروج المتغطية باللوحة سمعوا صوت طالع من الكرسي القريب منهم ( مش قادرة أصدق انك هتروح فعلا يا هاري )

نور اللمبة اترعش، وشافوا هرميوني جرانجر لابسة روبه الوردي مكشرة وغضبانة.

قال رون بغضب ( انت؟ ارجعي أوضتك )

انفجرت فيه هرميوني ( أنا كنت خلاص هقول لأخوك بيرسي، هو رائد الفصل، وأكيد يقدر يمنعكم من المصيبة اللي هتعملوها دي )

هاري ماكانش مصدق ان في أي حد ممكن يتدخل في ظامور الناس بالشكل ده، قال لرون ( ياللا بينا ) وزق لوحة السيدة السمينة وطلعوا من فتحة الخروج. بس هرميوني ماكانش ممكن تستسلم بالسهولة دي، خرجت من الفتحة ورا رون وهي بتتكلم زي الوزة الغضبانة ( انتم مابتهتموش بجريفندور خالص، مابتهتموش بحد غير نفسكم، أنا مش عايزة سليذرين يفوزوا بكاس المنازل السنة دي، وانتم هتكونوا السبب في اننا نخسر كل النقط اللي اخدتها من بروفيسور ماكونجال عشان عرفت تعاويذ التبديل)

( ياللا امشي )

( ماشي، انا حذرتكم، ابقوا افتكروا كلامي وانتم راكبين القطر اللي هيرجعكم البيت بكرة، انتم ...)

بس هما مالحقوش يعرفوا هي كانت هتقول عنهم ايه تاني، أصلها لما لفت عشان ترجع غرفة جريفندور العامة مالقتش السيدة السمينة في اللوحة، اللوحة كانت فاضية، السيدة السمينة راحت تزور أصحابها في اللوح التانية، وهرميوني اتحبست برة برج جريفندور، صرخت ( هعمل ايه دلوقتي؟)

قال رون ( دي مشكلتك انت، احنا هنتأخر ولازم نمشي)

قبل مايوصل لنهاية الممر كانت هرميوني لحقتهم وهي بتقول ( أنا هاجي معاكم )

( لا مش هتيجي معانا )

( انتم فاكرين اني هقف هنا واستنى فيلتش يمسكني؟ لو مسكنا احنا التلاتة هقوله الحقيقة، هقوله اني كنت بحاول أمنعكم، وساعتها انتم هتأكدوا كلامي)

قال رون بصوت عالي ( ايه الجرأة دي )

قال هاري بحدة ( اسكتوا انتم الاتنين، انا سامع حاجة )

قال رون وهو بيبحلق في الضلمة ( ايه، مسز نوريس؟)

بس دي ماكانتش مسز نوريس، كان نيفيل نايم متكوم على الأرض بس صحي أول ماعدوا من جنبه.

( الحمد لله، انا بقالي ساعات هنا، ماقدرتش أفتكر كلمة السر عشان ادخل البرج)

قال هاري ( وطي صوتك يا نيفيل، كلمة السر هي بيج سنوت، بس مش هتنفعك دلوقتي، السيدة السمينة مش في اللوحة، دراعك عامل ايه دلوقتي)

مد نيفيل دراعه وقال ( كويس، مسز بومفري عالجته في ثواني)

( طيب كويس، بص يا نيفيل، احنا لازم نكون في مكان تاني دلوقتي، نشوفك بعدين)

قال نيفيل وهو بيقوم من على الأرض بسرعة( لا، ماتسيبونيش هنا لوحدي، البارون الدامي عدى عليا مرتين لحد دلوقتي)

بص رون في ساعته وبعدين بص بغضب لهرميوني ونيفيل وقال ( لو واحد فيكم اتسبب في اننا نتمسك مش هرتاح غير لما اتعلم لعنة البوجي اللي قال عليها كويريل، وارميها عليكم)

فتحت هرميوني بقها عشان تتكلم، يمكن كانت هتقول لرون ازاي يعمل لعنة البوجي بالظبط، بس هاري شاور لها عشان تسكت وبعدين شاور لهم كلهم عشان يمشوا وراه.

اتسحبوا بالراحة في الممرات اللي بينورها نور القمر اللي بيدخل من الشبابيك العالية، وفي كل مرة يدخلوا ممر جديد، بيتوقع هاري انهم هيلاقوا فيلتش او مسز نوريس، بس هما كانوا محظوظين وماقابلوش حد خالص. طلعوا السلم اللي بيوصل للدور التالت بسرعة، ومشوا على طراطيف صوابعم ناحية غرفة الجوايز.

مالفوي وكراب ماكانوش وصلوا لسة. خزاين الجوايز الكريستال كانت بتلمع تحت ضوء القمر، كئوس ودروع وأطباق وتماثيل من الدهب والفضة بتلمع رغم الضلمة. سندوا على الحيطة وعيونهم مركزة على البيبان من الناحيتين، طلع هاري عصايته عشان يكون مستعد لو دخل مالفوي فجأة وبدأ النزال على طول. مرت الدقايق ببطء، همس رون ( اتأخر، يمكن خاف )

سمعوا صوت دوشة في الأوضة اللي جنبهم خلتهم نطوا في مكانهم ، ورفع هاري عصايته، بس سمعوا صوت حد بيتكلم، حد تاني غير مالفوي ( دوري عليهم ياعزيزتي، يمكن مستخبيين في ركن هنا ولا هنا) ده كان فليتش بيكلم مسز نوريس.

الرعب سيطر على هاري، فشاور للباقيين عشان يجوا وراه، وراحوا كلهم بسرعة ناحية الباب التاني بعيد عن صوت فيلتش، من غير ولا كلمة. يادوب خرجوا من أوضة الجوايز وسمعوا صوت فيلتش بيدخلها، وسمعوه كمان بيقول ( انا متأكد انهم مستخبيين هنا )

حرك هاري شفايفه وقال من غير صوت ( تعالوا، من هنا ) كانوا بيمشوا بالراحة على طراطيف صوابعهم في ممر طويل مليان بالدروع الحديدية. كانوا سامعين صوت فيلتش وهو بيقرب منهم، من كتر الرعب، نيفيل صرخ وبدأ يجري، بس للأسف اتكعبل ومسك في رون عشان مايقعش، لكنهم وقعوا الاتنين فوق درع من الدروع. صوت وقوع الدرع وخبط الحديد كان كفاية انه يصحي القلعة كلها، صرخ فيهم هاري ( اجروا بسرعة )

بدأوا يجروا في ممر الدروع بأقصى سرعة من غير حتى ما يبصوا وراهم عشان يعرفوا اذا كان فيلتش وراهم ولا لأ. مروا من بيبان كتير وراحوا من ممر للتاني، وهاري قدامهم، بس ماكانوش عارفين هما فين، أو رايحين على فين. لقوا قدامهم سجادة مزخرفة متعلقة على الحيطة ولما رفعوه لقوا نفسهم في ممر سري، فضلوا يجروا لحد ما خرجوا منه ولقوا نفسهم جنب فصل التعاويذ اللي كان بعيد جدا عن غرفة الجوايز.

قال هاري وهو بينهج ( أظن اننا قدرنا نهرب منه) وسند على الحيطة الباردة ووراه وهو بيمسح العرق من على وشه، نيفيل كمان كان  بينهج جدا لدرجة ان صدره بيصفر، قالت هرميوني وهي بتحاول تتنفس ( مش قلت لكم، مش قلت لكم )

قال رون ( لازم نرجع برج جريفندور بسرعة )

وقالت هرميوني لهاري ( مالفوي خدعك، فهمت ده ولا لسة؟ ماكانش ناوي يجي أصلا، فيلتش كان عارف ان في حد في غرفة الجوايز في الوقت ده،أكيد مالفوي هو اللي فتن عليك)

هاري كان عارف ان كلامها صح، بس عمره ما كان هيقول لها، كل اللي قاله ( ياللا نمشي )

بس الموضوع ماكانش ممكن يعدي بالسهولة دي، يادوب مشوا خطوتين ولقوا باب فصل بيتفتح وحاجة بتطلع بسرعة من الفصل وتقف قدامهم، كان بيفيز، اللي أول ماشافهم صرخ بفرح ، ( اسكت يا بيفيز، لو سمحت، انت كده هتتسبب في طردنا من المدرسة) ضحك بيفيز بصوت عالي وقال ( بتتمشوا في المدرسة بالليل يا طلاب سنة أولى الصغننين، آه يا أشقيا، هيمسكوكم)

( لو سكت ماحدش هيعرف مكانا يا بيفيز، من فضلك )

قال بيفيز بصوت مليان طيبة، لكن بعينين مليان مكر وخبث ( بس انا لازم أقول لفيلتش، لازم أقوله، ده لمصلحتكم طبعا، انتم أكيد عارفين)

زعق له رون وهو بيجري ناحيته ( ابعد عن طريقنا ) بس دي كانت غلطة كبيرة، بفيز قعد يصرخ ( تلاميذ برة سرايرهم، تلاميذ برة أوضهم، بيتمشوا في ممر التعاويذ)

عدوا من تحت بيفيز وبدأوا يجروا عشان ينقذوا نفسهم، وفي آخر الممر لقوا باب مقفول، قال رون بيأس وهما بيحاولوا يزقوا الباب من غير فايدة ( هي دي النهاية، رحنا في داهية)

كانوا سامعين صوت رجلين فيلتش وهو بيجري بسرعة ناحية صوت بيفيز، بصت لهم هرميوني بغيظ وقالت ( ابعدوا شوية ) وسحبت عصاياتها ونقرت بيها الباب وهي بتهمس (ألوهومورا)، طقطق القفل واتفتح الباب، دخلوا وقفلوه وراهم بسرعة، وحطوا ودانهم عليه عشان يسمعوا اللي بيحصل برة.

فيلتش كان بيكلم بيفيز ( هما راحوا منين يا بيفيز، قولي بسرعة)

( قول من فضلك الأول )

( ماتلعبش معايا يابيفيز، قولي حالا، راحوا من اي ناحية ؟)

( مش هقول أي حاجة غير لما تقول من فضلك) قالها بيفيز وكأنه بيغني بطريقة مزعجة جدا.

( ماشي، من فضلك )

( أي حاجة، ههههه، ان قلت لك مش هقول أي حاجة غير لما تقول من فضلك، هههه) وسمعوا صوت بيفيز وهو بيبعد وفيلتش بيشتم وهو غضبان ومتغاظ.

قال هاري ( هو فاكر ان الباب ده مقفول، اعتقد اننا هنكون بخير، ابعد يا نيفيل، في ايه ) نيفيل كان متعلق في كم هاري وبيشده

لما هاري لف ، شاف كويس اوي في ايه

للحظة كان بيفكر انه أكيد نايم وده كابوس مخيف، اللي كان شايفه ده كان كتير، حتى بعد كل اللي شافه لحد دلوقتي، ده كان كتير اوي. ماكانوش في اوضة زي ما كان فاكر، كانوا في ممر، الممر الممنوع في الدور التالت، ودلوقت بس عرفوا هو ليه ممنوع. كانوا دلوقتي بيبصوا في عيون كلب ضخم جدا، ضخم لدرجة انه مالي المكان كله من السقف للأرض، كلب عنده 3 رؤوس، كلب عنده 6 عيون بتدور بغضب وجنون، كلب عنده 3 أنوف بتترعش وتشمشم فيهم، كلب عنده 3 أفواه مليانة بالأسنان الصفرا الحادة، وبينزل منها اللعاب زي الحبال.

الكلب كان واقف ساكت، وعيونه الستة بتبرق لهم. هاري كان عارف ان السبب الوحيد اللي خلاهم لسة عايشين لحد دلوقتي ان دخولهم كان مفاجأة أربكت الكلب وجمدته للحظات، لكنه بدأ يفوق خلاص، مافيش حد مايعرفش معنى الزمجرة دي.

حسس هاري على الباب لحد ماوصل للأكرة، مابين الموت وفيلتش، أكيد هيختار فيلتش. فتح هاري الباب ورجعوا لورا لحد ما وقعوا برة الباب وقفلوه بقوة وبدأوا يجروا بأقصى سرعة في الممر، تقريبا فيلتش راح يدور عليهم في مكان تاني لنهم ماشافوهوش في أي مكان، بس هما ماكانوش مهتمين ان فيلتش يشوفهم، كل اللي كانوا بيفكروا فيه انهم يبعدوا على أد مايقدروا عن الوحش ده. فضلوا يجروا وماوقفوش خالص غير لما وصلوا للوحة السيدة السمينة في الدور السابع. بصت لأروابهم المتعلقة على أكتافهم ، ووشوشهم الحمرة العرقانة وقالت ( ايه ده، انتم كنتم فين لحد دلوقتي؟)

قال هاري وهو بينهج ( ماتشغليش بالك، بيج سنوت، بيج سنوت)

اتحركت اللوحة ودخلوا كلهم للغرفة العامة، وقعوا على الكراسي وهما بيترعشوا

فضلوا ساكتين شوية، ماحدش فيهم نطق بحرف، نيفيل كان شكله مش هيتكلم تاني خالص، واخيرا قال رون ( ازاي يربوا حاجة زي دي في مدرسة، الكلب ده محتاج يتمشى كتير)

قدرت هرميوني تتنفس بهدوء أخيرا، ورجع لها طبعها السيء كمان وقالت بغضب ( انتم مابتشوفوش، صح؟ مافيش ولا واحد فيكم شاف الكلب ده كان واقف على ايه؟)

قال هاري ( كان واقف على الأرض، أنا أصلا كنت مشغول برؤوسه، ماشفتش رجليه)

بصت لهم هرميوني بغضب وقالت ( لا ، ما كانش واقف على الرض، كان واقف على باب سحري مخفي، واضح انه بيحرس حاجة، أتمنى تكونوا مبسوطين من نفسكم، كان ممكن نموت كلنا، او السوء من كده، يطرودونا من المدرسة، ممكن أروح أنام بقى) وسابتهم وطلعت تنام.

رون كان بيبرق وبقه مفتوح على الاخر وبعدين قال ( اللي يسمعها يقول اننا شديناها معانا غصب عنها )

بس كلام هرميوني خلا هاري يفكر في فكرة سيطرت عليه وهو بيحاول ينام، الكلب ده بيحرس حاجة، هو هاجريد قاله ايه؟ أأمن مكان في العالم تقدر تعين فيه حاجاتك الغالية، هو جرينجوتس، بس هوجورتس أأمن منه طبعا.

تقريبا كده، هاري اكتشف المكان الجديد اللي خبوا فيه اللفة الصغيرة اللي أخدوها من الخزنة 713